Ang Pagsabut sa Imong Patriyarkal nga Panalangin
Ang tagsulat nga si Allie nagpuyo sa Illinois, USA, ug si Margaret sa New York, USA.
Ang pagtino sa mga kabahin sa imong panalangin makatabang sa imong pagkaplag og direksyon sa imong kinabuhi.
Man in maze © Digital Vision Vections/Getty Images
Ang kinabuhi puno sa himuonong mga desisyon: Asa ko moeskwela? Unsa man ang akong tun-an? Magmisyon ba ko? Kinsa ang akong minyoan? Kon gihatagan ka og personal nga mapa nga gamiton sa paghimo og mga desisyon sa kinabuhi, sundon ba nimo kini?
Ang Langitnong Amahan ug si Jesukristo mihatag kanato og ingon niana nga mapa—ang patriyarkal nga mga panalangin—aron mahatagan kita og direksyon sa atong kinabuhi. Bisan og gihatagan kita sa gasa sa kabubut-on sa paghimo og desisyon sa atong kaugalingong kabubut-on, ang patriyarkal nga mga panalangin makahatag og giya asa nga dalan ang maghatud sa pinakatalagsaong kalipay.
Apan ang pag-angkon lang og mapa dili igo. Kinahanglan natong tun-an, sabton, ug gamiton ang kahulugan nga naa sa mapa. Sa samang paagi, kon masabtan na nimo ang mga pulong nga gigamit sa imong patriyarkal nga panalangin—nga kaugalingon nimong giya sa kinabuhi—imong—mahibaloan nimo kon si kinsa ka sa mga mata sa Dios ug unsay posible nimong maabut.
Pagdiskubre sa Imong Kaliwat
Una ug labaw sa tanan, ang imong patriyarkal nga panalangin mopahayag asa ka nga kaliwat o sa piho nga tribo sa napulog duha ka tribo ni Jacob (kinsa sa wala madugay gitawag og Israel) asa ka nahisakop. Bisan og dili kitang tanan literal nga mga kaliwat ni Jacob, ang mga kasulatan nagtudlo kanato nga ang mga miyembro sa Simbahan gisagop sa balay ni Israel: “Kay kutob sa modawat niini nga Ebanghelyo pagatawgon sunod sa imong ngalan, ug pagaiphon nga imong binhi, ug mobarug ug mopanalangin kanimo, ingon nga ilang amahan” (Abraham 2:10).
Si Shelisa Schroeppel sa Utah, USA, miingon, “Ang pagkahibalo nga ako gikan sa balay ni Jacob nakatabang nga akong masabtan ang katuyoan niini nga kinabuhi ug nganong gitawag ko niining piho nga calling sa Simbahan.”
Ang imong patriyarkal nga panalangin maghulagway usab sa bisan unsang susama nga mga panalangin mahitungod sa imong piho nga tribo. Sama pananglit, daghang miyembro sa Simbahan ang sakop sa tribo ni Ephraim, tribo nga dunay talagsaong responsibilidad sa pagpakatap sa mensahe sa gipahiuli nga ebanghelyo sa kalibutan (tan-awa sa Deuteronomio 33:13–17; D&P 133:26–34).
Pangitaa ang Personal nga Tambag
Kon gigamit sa tukmang paagi, ang mapa makatabang sa usa ka tigbiyahe nga dili masaag. Sa samang paagi, niining yutan-on nga biyahe, ang imong patriyarkal nga panalangin mohatag og tambag ug direksyon alang sa imong kinabuhi. Ang imong patriyarkal nga panalangin dili lamang magsulti unsay imong buhaton, apan makahatag kini og personal nga panabut kon asang mga dalan—nga kon subayon pinaagi sa hugot nga pagtuo—makatabang kanimo aron mahibalo kon nasubay ba ang imong kinabuhi sa kabubut-on sa Langitnong Amahan. Samtang tun-an nimo ang imong patriyarkal nga panalangin ug magpakabuhi sa paagi nga magdapit sa Espiritu sa Ginoo, makaplagan nimo ang kasiguroan, kalipay, ug direksyon.
Si Gabriel Paredes sa Lima, Peru, miingon, “Pipila sa tambag nga gihatag kanako sa akong panalangin hingpit lang nakong nahimo sa akong pamilya human ko ma-seal sa akong asawa.
“Bag-ohay lang naglibug mi kon unsaon kaha namo sa paglig-on ug pagtukod sa among bag-ong pamilya. Ang among pangutana natubag pinaagi sa akong patriyarkal nga panalangin. Diha niini gitambagan ko nga akong i-prayoridad ang pagrespeto, pagsabut, ug gugma sa akong pamilya, tungod kay kini ang importanting mga pundasyon sa ebanghelyo ni Jesukristo.
“Samtang gitutukan namo kini, ako ug ang akong asawa nakabuntog sa mga problema. Panagsa aduna gihapon mi mga hagit sa pamilya, apan malipayon kami. Akong gibati nga ang Ginoo nagpahinumdom kon unsaon nako sa pag-angkon sa pamilya nga Iyang gisaad kanako. Nasayud ko nga ang Ginoo namulong pinaagi sa patriyarkal nga panalangin ug ang tambag nga anaa niini gamitunon sa atong kinabuhi.”
Mopatalinghug sa mga Pahimangno
Ang mapa wala magmarka sa tanang peligro sa atong agianan, apan maayo na lang kay ang patriyarkal nga panalangin naghatag kanato og pasidaan aron maprotektahan kita sa atong agianan. Pipila niining mga pahimangno makatabang nga maprotektahan kita gikan sa impluwensya ni Satanas; ang uban niini molamdag kanato kon unsaon sa pagbuntog ang kinaiyanhong pagkatawo nga naa kanato.
Para ni Caitlin Carr sa Utah, ang uban nga pahimangno sa iyang patriyarkal nga panalangin dili dayon tin-aw diha-diha, apan sa kadugayan niyang pagtuon sa panalangin mitumaw ang bag-ong mga panabut.
“Dihang akong nadawat ang akong patriyarkal nga panalangin, gipasidan-an ko mahitungod sa mga tawo nga mosulay sa pagbira kanako gikan sa kamatuoran pinaagi sa makadani nga mga pulong. Wala kaayo nako kini hunahunaa; Duna koy hugot nga pagtuo sa mga doktrina nga gitudlo kanako.
“Apan sa misunod nga tuig gisamok ko sa mga ideya ug pilosopiya nga kon tan-awon nanukad sa pagkapatas ug gugma apan dili diay. Kini nga mga mensahe daw naggikan lang bisan asa: sa media, eskwelahan, gani sa suod nga mga higala. Bisan og nasayud ko nga kini nga mga pilosopiya sukwahi sa plano sa Dios, gusto kong mosuporta niining kalibutanong mga ideya ug sa atong Simbahan. Wala madugay nakaamgo ko nga ‘walay tawo nga makaalagad sa duha ka mga agalon’ (Mateo 6:24) ug nga dili ko mosalig sa kaalam sa tawo. Gisulbad sa Langitnong Almahan ang akong mga pagduha-duha pinaagi sa mga kasulatan ug namulong og kalinaw sa akong hunahuna ug kasingkasing. Isip resulta, ang akong pagpamatuod nalig-on ug nahimo kong mas lig-on sa pagpanalipod sa butang nga nahibaloan nakong tinuod.”
Palamboa ang mga Gasa ug Talento
Ang imong patriyarkal nga panalangin posibling maghisgot usab og espirituhanong mga gasa ug talento nga gihatag sa Ginoo kanimo sa pagtukod sa Iyang gingharian. Kon ang imong panalangin naghisgot sa usa ka talento nga dili pamilyar kanimo, kini tungod tingali kay wala ka pa makahigayon sa pagdiskubre o pagpalambo niini nga talento. Pinaagi sa makugihong pagpangita ug sa tabang sa Ginoo, molambo ug mahanas ka niini nga talento ug sa daghan pa.
Ang pagpalambo sa imong mga talento makatabang nga imong mahibaloan ang lahi nga mga butang nga imong ikatampo sa buhat sa Ginoo. Gipamalandungan ni Johanna Blackwell nga taga-California, USA ang mga gasa ug talento nga naa sa iyang panalangin kon mobati siya nga gitintal sa pagkumpara sa iyang kaugalingon ngadto sa uban: “Samtang motan-aw ko sa mga pulong sa akong patriyarkal nga panalangin, mapahinumduman ko nga ako napanalanginan og mga gasa nga personal nakong gikinahanglan sa pagbuntog sa mga pagsulay ug makaapil sa pagpadali sa buhat sa Ginoo.
“Ang akong panalangin nagsulti kanako sa akong abilidad sa paghigugma, pagpasaylo, ug pagbaton og kaisug sa pakig-uban niadtong naglibut kanako. Dihang gigamit nako kini nga mga gasa, gipanalanginan ko sa Ginoo og dugang nga tinguha sa paghimamat ug pakighigala og bag-ong mga tawo ug kultura. Agi’g sangputanan, milambo ang akong pagpamatuod nga tanan kita mga anak sa mahigugmaong Langitnong Amahan, ug nakaserbisyo ko sa uban samtang kaming tanan naningkamot nga mahimong mas mahisama ni Kristo.”
Pangitaa ang Gisaad nga mga Panalangin
Sa katapusan, ang atong patriyarkal nga mga panalangin mopadayag sa gisaad nga panalangin sa Langitnong Amahan kanato kon magpabilin kitang matinud-anon Kaniya. Walay garantiya kon kanus-a matuman kining mga saad, apan masayud kita nga samtang magmasulundon kita sa ebanghelyo matuman kini, niining kinabuhia o sa sunod.
Si Sergio Gutierrez sa Nevada, USA, misalig sa saad sa iyang patriyarkal nga panalangin sa matag higayon nga mobati siyag kabalaka mahitungod sa iyang mga plano sa umaabut nga panarbaho: “Usahay mobati kog kabalaka mahitungod sa kawalay siguro sa akong umaabut, apan dunay saad sa akong patriyarkal nga panalangin nga kanunayng maghatag og kalinaw sa akong hunahuna. Kini nga saad nakatabang nako nga mahibalo nga basta maningkamot lang ko ug magpabiling matinud-anon, maangkon nako ang gikinahanglang mga kapanguhaan aron makaatiman ko sa akong pamilya ug makapalig-on sa Simbahan. Wala pa ko masayud kon unsa gayud nga trabaho ang gusto nakong ipadayon, apan tungod niini nga saad nakabaton ko og pagtuo ug kamasaligon.”
Kon naglibug ka man kon unsay gusto sa Langitnong Amahan kanimo, wala ka mag-inusara. Ang Ginoo nakasabut nga mag-atubang ka og daghang lain-lain nga dalan nga mahimo nimong subayon sa imong kinabuhi, mao nga mihatag Siya kanimo og personal nga mapa aron padayon nga mahiuyon ang imong kinabuhi sa Iyang ebanghelyo. Ang patriyarkal nga mga panalangin dili makahimo og mga desisyon para kanato, apan mogiya kini kanato sa atong personal nga pagpadayag. Pinaagi sa atong patriyarkal nga mga panalangin, gipakita kanato kon sa unsang paagi kita mohaum sa plano sa Ginoo sa pagpundok sa Israel pinaagi sa pagkat-on bahin sa atong tribo; gihatagan kita og personal nga tambag, mga pahimangno, ug saad; gitudloan kita mahitungod sa talagsaong mga gasa ug talento nga gihatag sa Langitnong Amahan kanato sa pagserbisyo Kaniya. Samtang maningkamot ka sa pagpakabuhi nga magsubay sa tanan niining elemento nga naa sa imong kaugalingong patriyarkal nga panalangin, mahibaloan nimo kon ang imong mga desisyon mao ba ang kabubut-on sa Ginoo alang sa imong kinabuhi.