Panumpa ug Pakigsaad sa Priesthood

Tun-i sa mainampuong paagi kining materyal ug tinguhaa ang inspirasyon aron masayud unsay angay nga ipakigbahin. Sa unsang paagi ang pagsabut sa katuyoan sa Relief Society nag-andam sa mga anak nga babaye sa Dios alang sa mga panalangin sa kinabuhing dayon?

Imahe

Kansas City Missouri Temple

Kitang mga sister kon magkadako ang atong pagsabut sa panumpa ug pakigsaad sa priesthood nga magamit nato sa personal nga paagi, mas mohangop kita sa mga panalangin ug mga saad sa priesthood.

Si Elder M. Russell Ballard sa Korum sa Napulog Duha ka mga Apostoles miingon, “Ang tanan nga mihimo og sagradong mga pakigsaad sa Ginoo ug kadtong mituman niadtong mga pakigsaad mahimong makadawat og personal nga pagpadayag, mapanalanginan sa pagpangalagad sa mga anghel, makigsulti sa Dios, makadawat sa kahingpitan sa ebanghelyo, ug, sa katapusan, mahimong mga manununod kauban ni Jesukristo sa tanan nga anaa sa atong Amahan.”¹

Ang mga panalangin ug mga saad sa panumpa ug pakigsaad sa priesthood moapekto sa mga lalaki ug babaye. Si Sister Sheri L. Dew, kanhi magtatambag sa Kinatibuk-ang Kapangulohan sa Relief Society, miingon, “Ang kahingpitan sa priesthood nga nalakip diha sa pinakataas nga mga ordinansa sa balay sa Ginoo madawat lamang nga kauban ang lalaki ug babaye.”²

Si Sister Linda K. Burton, Relief Society General President, nanawagan niini, “dapiton ko kamo sa pagmemorya sa panumpa ug pakigsaad sa priesthood, nga makita sa Doktrina ug mga Pakigsaad 84: 33–44. Sa pagbuhat niini, mosaad ko nga ang Espiritu Santo mopalapad sa inyong pagsabut sa priesthood ug modasig ug mobayaw kaninyo sa talagsaong paagi.”³

Ang instruksyon ni Joseph Smith ngadto sa Relief Society gituyo aron pag-andam sa mga babaye nga “unsaon nga [sila] makabaton sa mga pribilehiyo, mga panalangin, ug mga gasa sa Pagkapari.” Kini matuman pinaagi sa mga ordinansa sa templo.

“Mga ordinansa sa templo mao ang mga ordinansa sa priesthood, apan sila [wala] sila nagtugyan sa eklesyastikal nga mga katungdanan diha sa mga lalaki o babaye. [Kini nga mga ordinansa matuman] ang saad sa Ginoo sa iyang mga katawhan—mga lalaki ug babaye—nga ‘pagatugahan uban sa gahum nga gikan sa kahitas-an’ [D&P 38:32].”⁴

Dugang nga mga Kasulatan ug Impormasyon

Doktrina ug mga Pakigsaad 84:19–40; 121:45–46; reliefsociety.lds.org