Ewi Wāween Aō Maron̄ Katak Ilo Ļōmņak Eo Aō im ilo BŪRUWŌ?
Pukot ta eo komaron̄ kōm̧m̧ane n̄e ewōr am kajjitōk.
Ta eo kwōj aikuj kōm̧m̧ane n̄e ewōr am̧ kajjitōk kōn jet katak, bwebwenato, ak an juon make? Elmen am̧ pukot juon uwaak? Irooj ej kallim̧ur, “I naaj ba n̄an eok ilo ļōmņak eo am im ilo būruwōm̧, jān Jetōb Kwōjarjar” (K&K 8:2). Elmen am̧ kōjerbal ļōmņak eo am̧ im būruwōm̧ n̄an kile juon im̧we? Erkein jet ļōmņak ko.
Ļōmņak
Katak, Jar, Ron̄jake
Elder Robert D. Hales jān Doulul eo an Jon̄oulruo Rijilōk ro eaar ba bwe n̄e jej kōm̧m̧ane “kālet ko reļļap an mour in … , Jemedwōj Ilan̄ ej kōņaan bwe jen kōjerbal anemkwoj eo ad, katak men ko ilo ļōmņak ko ad ekkar n̄an pedped in katak ko ilo gospel in” (“The Holy Ghost,” Liaona, Māe 2016, 105).
Ejja āinwōt n̄an aolep kajjitōk. Ilo am̧ katak, jar emakijkij kōn uwaak ko kwōj loi im̧aan am̧ iaļ. Jetōb Kwojarjar enaaj lewaj n̄an eok im̧we ko—men̄e kōn ļōmņak ko, naan ko ilo ļōmņak eo am̧, ak kakeememej ko jet—n̄an tōl eok n̄an lo uwaak ko kwoj aikuji.
Kōjerbal Kein Jipan̄ ko
Pukot jeje ko rekwojarjar, ekoba Unin Tōl n̄an Jeje ko rekwojarjar im kein jipan̄ ekkatak ko jet. Komaron̄ barāinwōt pukot kein jipan̄ ko jet ilo LDS āinwōt kōnono ko ilo kweilo̧k eo eļap, Gospel Topics ko ilo LDS.org, māākjiin ko an Kabun̄, im Josep Smith Papers Project ko, im ko jet. (Lale peij 54 kōn laajrak in kein jipan̄ ko an Kabun̄.)
Ļōmņak Kake
Jab mijak in kajjitōk jipan̄. Elder Ronald A. Rasband jān Doulul eo an Jon̄oulruo Rijilōk ro eaar rōjan̄, “Ij lewaj n̄an kom̧ juon idajon̄jon̄. … Kwōn ļōmņak kōn juon [eo me emaron̄ jipan̄ eok lo uwaak ko]—juon m̧ōttam̧ eo kwōj leke, juon jinen ak jemen, bubu ak jim̧m̧a, rikaki, bisoprik, [ak] rikakpilōklōk … —im kwōj aikuj in bōk uwaak ko an kajjitōk kein” (Face to Face broadcast, Jān. 20, 2016). Kajjieon̄! Kōnono ippān eo kwoj leke kōn kajjitōk ko n̄an pukot uwaak ko ippān doon.
Bōro
Katak, Jar, Ron̄jake
Erkein bun̄tōn nee ko raorōk n̄an kejōkļo̧kjeņ kaki jim̧or ilo ļōmņak eo am̧ im ilo būruwōm̧. Būreejtōn Dieter F. Uchtdorf, Rikakpilōklōk eo Kein Karuo ilo Būreejtōnji eo Kein Kajuon, eaar ba, “Eļan̄n̄e kwōj kōņaan kile m̧ool eo an jetōb, kwoj aikuj in kōjerbal kein jerbal ko rejim̧we. Kwojjab maron̄ in meļeļe m̧ool eo an jetōb kōn kein jerbal ko me rejjab ekkar” (“Receiving a Testimony of Light and Truth,” Liaona, No̧b. 2014, 22). Jetōb Kwojarjar ej kein jerbal eo jej ekkatak kōn men ko an jetōb. Kōn menin n̄e kwōj jar im ron̄jake Jetōb, ilo iien eo kwōj maron̄ in pukot uwaak ko.
Kwōn Kijenmej
Būreejtōn Uchtdorf eaar barāinwōt ba, “Toon wōt ad leļo̧k būruwōd im kōļmenļo̧kjeņ ko ad n̄an Anij, toon wōt an meram pād ippād. … Jidik kōn jidik, men ko m̧okta raar itinaar, marok, im kiiō raar jino alikar, meram, im waļo̧k n̄an kōj” (“Receiving a Testimony of Light and Truth,” 22). Pukot uwaak ko emaron̄ bōk iien. Ak eļan̄n̄e kwonaaj ron̄ uwaak ko, men̄e ebōk iien, kwonaaj loe.
Jeļā Kile Im̧we ko
Toon wōt am̧ kile im̧we ko im em̧akūt kōn unoojdikdik ko an Jetōb n̄an būruwōm̧, enaaj jino pidodo n̄an kile im̧we ko tok jet. Kwonaaj “en̄jake bwe e jim̧we” ak en̄jake juon “pok ilo ļōmņak” eļan̄n̄e ebōd (lale K&B 9:8–9). Komaron̄ barāinwōt en̄jake juon ememļo̧kjeņ, en̄jake aenōm̧m̧an, ak bar jet en̄jake me rekkar n̄an kwe. Irooj ejeļā kajiem̧, im Ejeļā elmen am̧ meļeļe Jetōb eo. Enaaj lewaj n̄an eok iakwe eo me ejejjet n̄an eok. Kōn menin ron̄jake im jerbale.