Uwaak ko jān Ritōl ro an Kabun̄ in
Ewi Wāween Ad Lo Aenōm̧m̧an eo Em̧ool
Jān Eprōļ 2013 ekōnono eo ilo kweilo̧k eo eļap.
Lan̄ ej mije armej ro rem̧m̧an ijoko jabdewōt im aolep iien naaj wōr aenōm̧m̧an ilo laļ in. Jen jab ebweer n̄an tōpar kōttōbar in. Ak, Būreejtōn Josep F. Smith (1838–1918) eaar kwaļo̧k, “Ejamin maron̄ itok n̄an laļ in jetōbin aenōm̧m̧an im iakwe … mae iien ro nejin armej renaaj bōk m̧ool eo an Anij im naan ko an Anij … , im kile kajoor im mālim eo an ekwojarjar.”
Jej lukkuun kōjatdikdik im jar kōn aenōm̧m̧an eo an aolep, bwe ro kajjojo im baam̧le ko ren bōk kain aenōm̧m̧an in me kar kallim̧ur kake kōn mour kwojarjar. Aenōm̧m̧an in ej juon menin letok kar kallim̧ur kōn jerbal im pinmuur eo an Rilo̧mo̧o̧r.
Aenōm̧m̧an in ejjab baj wōt kōn jekone, tariņae, ire, en̄taan, im jum̧ae. Aenōm̧m̧an ej itok jān jeļā bwe Rilo̧mo̧o̧r ejeļā wōn kōj im jeļā bwe kōj ewōr ad tōmak ilo E, iakwe E, im kōjparok kien ko An, im aaet eļaptata apan̄ im būrom̧ōj ko an mour in (lale K&K 121:7–8).
“Ia eo imaron̄ oktak ļo̧k n̄an aenōm̧m̧an? Ewi aō leke n̄e men ko jet rejako n̄an kōmour eō?” (“Ia eo imaron̄ oktak ļo̧k n̄an aenōm̧m̧an?” Al, nō. 129). Uwaak eo ej ilo Rilo̧mo̧o̧r, eo ej unjen aenōm̧m̧an. E ej “Prince in Aenōm̧m̧an” (Aiseia 9:6).
Kōttāik kōj make im̧aan Anij, jar aolep iien, ukweļo̧k jen jerawiwi ko, deļo̧n̄e dānin peptaij kōn juon bōro erup im jetōb ettā, im erom̧ rikaļoor rem̧ool an Jisōs Kraist rej kwaļo̧k waanjon̄ok ko an mour jim̧we me ej waļo̧k kōn aenōm̧m̧an.
Kabun̄ in ej juon jikin kone ijo ro rikaļooraņ Kraist rej lo aenōm̧m̧an ie. Jet armej ilo laļ in rej ba rejetōbtōb ļo̧k ak rejjab armej in jar. En̄jake jetōb ej bun̄tōn eo im̧aantata em̧m̧an. Ijoke, ej ilo Kabun̄ in jej jem̧jerā, katak, im naajjdik doon kōn naan eo em̧m̧an an Anij. Men eo eaorōtata, bwe kajoor eo an priesthood ilo Kabun̄ in ej letok kain̄i im bujen ko rekwojarjar n̄an liape baam̧le ko ippān doon im kakarbab e kōj kajjojo n̄an ro̧o̧l ļo̧k n̄an Anij eo Jemed im Jisōs Kraist ilo celestial kingdom. Kain̄i kein rej bōktok aenōm̧m̧an kōnke rej bujen ippān Irooj.
Tampeļ ko rej jikin ko kain̄i kein rekwojarjar rej kōm̧m̧an ie im rej barāinwōt unjen aenōm̧m̧an in jokone eo jān laļ in. Ro rej loļo̧k tampeļ im peļaakin ak bōk koņaer ilo aje ko an tampeļ renaaj barāinwōt en̄jake aenōm̧m̧an in.
Rilo̧mo̧o̧r eo ej kein jipan̄ kōnaenōm̧m̧an eo em̧ool. Men̄e apan̄ ko an mour, kōnke Pinmuur eo an Rilo̧mo̧o̧r im An tiraim̧o kake, mour jim̧we enaaj kōjolet kōj kōn aenōm̧m̧an eo an juon make (lale Jon 14:26–27; 16:33).