Bok ko Kar Meļo̧kļo̧ki, Naan in Kam̧ool eo kar Keememeje
Rijeje eo ej jokwe ilo Cagayan, Philippines.
Aolep māj raar reitok n̄an n̄a. Imaron̄ ke jurake Kabun̄ in kōn naan in kam̧ool eo aō ebwe?
Juon iiō eaar wōr juon aō jibadbad n̄an kōkm̧anm̧an jetōbin aō ekkatak. Ikōn bōktok bok ko an kabun̄, bok ko, bok in ekkatak ko, im jeje ko rekwojarjar ijoko jabdewōt, ekoba n̄an jikuuļ, ilo aō kar kwōle kōn naan ko an Anij. Ak kijejeto eo aō eaar dik bwe iaar jino boub in ekkatak n̄an juon teej.
Juon raan rūkaki eo eaar tōl juon unin kōnono im kar kajjitōk bwe aolep ro rejjab jān Catholic ren jutak. Iaar make wōt Armej ro Rekwojarjar ilo kūlaaj eo. Jiljino iaan rijikuuļ ro jet raar bar jutak.
Innām kar kajjitōk ippam̧, Kabun̄ ta eo ami? Wōn eo eaar kajutake? Elmen an kar kabun̄ eo ami jutak?
Iaar uwaak āliktata. Iaar ikum̧kum̧ ke ij lo ke iaar jab jibwe tok bok in jar ko aō, ak iaar kajjieon̄ in keememej men ko iaar ekkatak. Juon eoon ilo Baibōļ eaar jiktok ilo ļōmņak eo aō:
“Kwōn lōke Jeova kōn aolepen būruōm̧; im kwōn jab atartar ioon jeļāļo̧kjeņ ko am̧.
“Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧.” (Jabōn Kōnnaan Ko 3:5–6.)
Iaar jutak im̧aan kūlaaj eo kōn peran im kar meļo̧kļo̧k mijak ko aō. Iaar kwaļo̧k bwe ij juon eo uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata. Iaar kwaļo̧k bwebwenato eo kōn, Josep Smith, eo eaar lo Anij. Iaar en̄jake juon kajoor ilo būruwō, im dānin kōmjaļaļ raar wōtļo̧k jān meja. Iaar kwaļo̧k bwe Kabun̄ in eaar ejaak ilo Eprōļ 6, 1830, im iaar kam̧ool bwe juon rikanaan in Anij kar kūr im bwe priesthood eo eaar bar jepļaaktok. Iaar kam̧ool bwe ijeļā aolep men kein raar m̧ool.
Elōn̄ awa in ekkatak ko kōn gospel in raar wōr tokjāer. Eaar jipan̄ eō jurake tōmak eo aō im kwaļo̧k gospel in. Iaar m̧ōņōņō bwe, jet wiik tokālik, emān iaan ro ilo kūlaaj eo aō raar itok ippa n̄an m̧ōnjar eo.
En̄jake in eaar katakin eō kōn aorōk eo an naan in kam̧ool. Kar m̧okta iaar ļōmņak etke Irooj eaar jab im̧we eō bwe in bōk tok bok in jar ko raan eo. En kar em̧m̧an ļo̧k aer jipan̄ eō uwaaki kajjitōk ko rej litoki. Ak iaar lo bwe jejjab aikuj in kakilōklōki jabdewōt men kōn Kabun̄ in ak pedped wot ioon kein ekkatak ko—jej aikuj ekkatak, mour kake, im kwaļo̧k gospel eo, pedped wōt ioon Jetōb Kwojarjar. Emaron̄ kar jab wōr aō bok, ak ewōr aō naan in kam̧ool.