Ļōmņak kōn Jisōs
Rijeje eo ej jokwe ilo California, USA.
Mía eaar m̧ōņōņō. Ej kab kein kajuon an pād ilo m̧ōn jar! Mijinede ro raar ba n̄an baam̧le eo an kōn kabun̄ in. Raar errā im itok.
Mía eaar reito reitak. Eaar lo juon kooj mouj ioon tabōļ eo. Jet men raar pād ium̧win.
“Ta en ium̧win kooj en?” Mía eaar kajjitōk ippān juon iaan mijinede ro.
Sister Hanson eaar ettōn̄dikdik. “Ej kwojkwoj.”
Kwojkwoj. Ekar juon naan ekajoor. Mía eaar ron̄ an mijinede ro ba n̄an Jinen im Jemān kake. Ak eaar jab lukkuun jeļā ta eo.
Aolep raar al juon al. Em̧m̧aan ro ruo raar kotak kooj mouj eo. Tōōre in pilawā ko raar pād ium̧win! Mía eaar lale aer ruje pilawā eo ilo m̧ōttan ko reddik.
Ālkin al eo em̧m̧aan eo eaar jar. Em̧m̧aan ro jet raar leto letak pilawā eo n̄an aolep.
“Pilawā eo ej jipan̄ kōj keememej ānbwinin Jisōs,” Sister García eaar unojdikdik.
Mía eaar bōk m̧ōttan pilawā eo. Eaar pijaik Jisōs ilo an jutak im̧aani.
Innām eaar bar wōr juon jar. Em̧m̧aan ro raar leto letak tōōre in dān eo.
“Dān in ej jipan̄ kōj keememej bōtōktōkin Jisōs,” Sister García ekar unojdikdik. “Eaar mej kōn kōj kōnke Ej iakwe kōj.”
Mía eaar bōk kap in dān eo. Eaar ļōmņak kōn ewi jon̄an an Jisōs iakwe e. Eaar en̄jake āinwōt n̄e Ej atbokwuji.
Tokālik Sister Hanson eaar leļo̧k n̄an Mía juon pijain Jisōs. “Jen m̧ōn̄ā im idaak dān eo n̄an keememej Jisōs im kallim̧ur n̄an ļoor E.” Eaar ettōn̄dikdik. “Ta eo kwōj ļōmņake kōn kwojkwoj e?”
Mía eaar kalimjōk pijain Jisōs. Eaar keememej en̄jake eo eaar en̄jake. Eaar ettōn̄dikdik. “Ekar em̧m̧an! Ij iakwe Jisōs.”