Ainikien Armej ro Rekwojarjar ilo Raan-ko Āliktata
Ededeļo̧k!
Kōmeļeļe jān Allen Garns
Ilo iien intōrpiu eo aō āinwōt juon bisop juon rālepen Jabōt, iaar maron̄ in jijet ippān juon m̧ōtta eo em̧m̧an im kōnono kōn apan̄ ko ej iooni. Ālkin aō ron̄jake inepata ko an, Iaar en̄jake bwe men eo eļap an aikuji ej riit jen jeje ko rekwojarjar. Iaar bar āinwōt keememej bwe, āinwōt juon an bisop, iaar aikuj in barāinwōt riiti jeje ko aō rekwojarjar, eo me jet iien epen. Kōn menin iaar ba bwe komro nej “m̧ōttāik doon” n̄an kajjieon̄ ekkatak emakijkij.
Aolep raan n̄e ej m̧ōj am̧ro riiti jeje ko rekwojarjar, kom̧ro ej jeje n̄an doon kōn naan in Ededeļo̧k! Jeļā bwe ebar wōr juon ej kōttar n̄an eo̧ron̄ ennaan eļan̄n̄e eo juon eaar ak eaar jab riit ilo raan eo bwe ej juon menin kōketak kōm̧ro jim̧or. Eļan̄n̄e juon iaamro eaar meļo̧kļo̧k, kōm̧ro ej jeje im kakeememej doon. Eļan̄n̄e juon iaamro ej meļo̧kļo̧k in jeje, eaar jab jeje tok. Kom̧ro eaar kōm̧m̧ane idajon̄jon̄ in ilo am̧ro jab kōm̧m̧an bwe eo juon en nana an mour.
Kom̧ro eaar jino idajon̄jon̄ in jiljino allōn̄ ko remootļo̧k, im ijjab keememej juon raan in am̧ro likjab in riiti jeje ko rekwojarjar. Būratōr in eaar jutak ilo Jabōt in jitlo̧k eo jet allōn̄ remootļo̧k im kwaļo̧k an naan in kam̧ool kōn em̧m̧an eo ej waļo̧k ilo baam̧le eo an kōn an riiti jeje ko rekwojarjar kajjojo raan.
Ij m̧ōņōņō kōn būratōr in kōn jem̧jerā eo an, barāinwōt kōn an jeje tok aolep raan. Iaar lo ewi jon̄an an kein kapāāl ko, ilo ad kōjerbali, maron̄ kōkm̧anm̧anļo̧k mour ko ad. Ij barāinwōt m̧ōņōņō kōn jeje ko rekwojarjar im aer kam̧ool kōn Kraist. Ijela bwe pinmuur eo an Rilo̧mo̧o̧r eaar kōm̧m̧an n̄an kōj kajjojo bwe jen jepļaak im mour ippān juon raan.