Pinmuur eo an Rilo̧mo̧o̧r eo: Pedped eo an Rikūrijin ro Rem̧ool
Jān juon kōnono, “Pinmuur eo,” kar waļo̧k ilo seminar eo n̄an mijen būreejtōn ro rekāāl ilo Provo Missionary Training Center ilo Juun 24, 2008.
Jenaaj jerkakpeje im erom ro rej jab wabanban kōn wōt kar katok in pinmuur eo an Jisōs Kraist.
Gethsemane,jān J. Kirk Richards
Rikanaan Josep Smith (1805–44) ekar kajjitōk, “Ta pedped in katak ko an kabun̄ eo am̧?” Ekar uwaak, “Pedped in katak ko an kabun̄ in ad rej kam̧ool ko an Rijilōk ro im Rikanaan ro, rejelōt Jisōs Kraist, bwe E eaar mej, kar kalbwine, im bar jerkak raan eo kein kajilu, im walōn̄ļo̧k n̄an lan̄; im aolep men ko jet ko tōļļo̧kin kabun̄ in ad ej itok ilo ekkejaak ko nai.”1
Ikōņaan lewaj ainikiō n̄an ennaan in an Rikanaan Josep. Dilep in aolep tōmak ko ad ej ad Rilo̧mo̧o̧r im katok in pinmuur eo An—ettā eo an Anij” (1 Nipai 11:16) ijoke Jemān ekar jilkintok Nejin n̄an laļ in n̄an kōttōbrak Pinmuur eo. Dilepen jibadbad in kōn mour eo an Jisōs Kraist eo ekar aolepān kar katok im pinmuur kake. Pinmuur eo ej pedped eo an Rikūrijin ro Rem̧ool.
Etke Pinmuur eo an Rilo̧mo̧o̧r eo ej dilepen pedped in katak ko an gospel ilo Kabun̄ in im ilo mour ko ad.
Laajrak in Tōmak ko 1:13
Laajrak in tōmak kein kajilu ej riit, “Kōmij tōmak bwe kōn Pinmuur eo an Kraist, aolep armej remaron̄ bōk lo̧mo̧o̧r, jān pokake kien ko im kain̄i ko an Gospel eo.”
“Lo̧mo̧o̧r” ilo meļeļe an naan in ej kōnono kōn tōprak ļo̧k degree eo eutiejtata ilo aiboojoj ilo aiboojoj eo an aļ. Jerkakpeje ej itok n̄an aolep armej ro rej itok n̄an laļ in, ak n̄an bōk mour indeeo, aolep kōjeraam̧m̧an ko an eddōkļo̧k indeeo, kajjojo armej rej aikuj pokake kakien ko, bōk kain̄i ko, im kōm̧m̧ani bujen ko an gospel.
Etke Jisōs Kraist, im E wōt, ekar pinmuur kōn jerawiwi ko an laļ? Ekar tōpar aolep mennin aikuj ko rekkar.
Anij Ekar E im Lōke E
Jisōs ekar ļo̧tak jān Jined im Jemedwōj Ilan̄ ilo mour eo m̧okta. Ekar Maanje eo an Jemedwōj Ilan̄. Kar kālet E jān jinoin. Ekar pokake ankilaan Jemān. Jeje ko rekwojarjar emakijkij aer kōnono kōn lan̄lōn̄ eo an Jemedwōj Ilan̄ n̄an Nejin.
Ilo Matu jej riit, “Im lo, ainikien jān lan̄, ej ba, E in Nejū jitōnbōro ippa, Ij m̧ōņōņō kake” (Matu 3:17).
Luk ekar reko̧o̧te, “Im ainikien ej itok jān kōdo̧ eo, im ba, E in Nejū, Eo Ij kāālōt E: Kom̧win karon̄jake” (Luk 9:35).
Im ilo tampeļ eo ilo Bountiful ālkin Jerkakpeje eo an Rilo̧mo̧o̧r eo, armej ro rekar ron̄ ainikien Jemān: “Lo in Nejū Jitōnbōro, eo ilo E, Ebun̄-buruō; ilo E Iaar kaiboojoj Eta—kom̧in ron̄jake E.” (3 Nipai 11:7).
Ej un̄ūr būruwō n̄e ij riiti iien eo Jisōs ekar en̄taan ilo Jikin Kallib Getsemane, Jemen, kōn iakwe eo An eļap im An tūriam̧o̧ kōn Nejin Eo Emake Wōt, ekar jilkintok juon enjeļ n̄an E jān lan̄ n̄an kaenōm̧m̧an im kakajoor E (lale Luk 22:43).
Jisōs Ekar Kōjerbal Anemkwoj eo An n̄an Pokake
Ecce Homo,jān J. Kirk Richards
Jisōs ekar m̧ōņōņō in leļo̧k mour eo An kōn kōj.
Ilo Ko̧o̧njeļ eo Eļap ilo Lan̄, Lucifer, “eo nejin jibbon̄” (Aiseia 14:12; K&B 76:26–27), ekar ba:
“N̄a e, kwōn jilkinļo̧k eō, inaaj eo nejūm̧ m̧aan, im inaaj lo̧mo̧o̧ren aolep armej, bwe en ejjeļo̧k juon enaaj jako, im em̧ool inaaj kōm̧m̧ane, kōn menin letok n̄an eō utiej eo Am̧.
“A, lo, Nejū Jitōnbōro, eo ej Aō Jitōnbōro im Rikāālet jān jinoin, Eaar ba n̄an Eō—Jema, Ankilam en kōm̧m̧an, im aiboojoj eo en Am̧ indeeo” (Moses 4:1–2; barāinwōt lale Ebream 3:27).
Kōnke iakwe eo eļap an Nejin n̄an Jemen im n̄an kōjwōj kajjojo, Ekar ba, “Jilkinļo̧k Eō.” Ke Ekar ba “jilkinļo̧k Eō,” Ekar kōjerbal anemkwoj in kālet eo An.
“Āinwōt Jema e jeļā N̄a, im N̄a I jeļā Jema; im Ij likūt Aō mour kōn sip ko. …
“Kōn men in Jema ej yokwe Eō, bwe Ij likūt Aō mour bwe In bar bōk e.
“Ejjeḷọk armej ej bōke jān Eō, a N̄a Ij make likūt e. Ij maron̄ bwe In likūt e, im Ij maron̄ bwe In bar bōke.” Kien in Iar bōk jān Jema” (Jon 10:15, 17–18).
Rilo̧mo̧o̧r eo ekar ke kōņaan, wōj in enjeļ ro remaron̄ kar bōk E jān ioon dōbwāāl eo kajim̧we ļo̧k n̄an ippān Jemān. Bōtaab Ekar kōjerbal anemkwoj in kālet eo An n̄an katok kōn E make kōn kōj, n̄an kamōj mijen eo An ilo mour in, im n̄an niknik n̄an jem̧ļo̧kin, kamōj katok in pinmuur eo.
Jisōs ekar kōņaan itok n̄an laļ, im Ekar ekkar bwe En itok. Im ke Ekar itok, Ekar ba, “Bwe Iar itok jān lan̄, jab bwe In kōm̧anm̧an ankil Aō, a ankilaan Eo ear jilkintok Eō” (Jon 6:38).
Jisōs Ekar Ekkapit Mokta jān Jān Jinoin Laļ
Piter ekar katakin bwe Jisōs “kar ekkapit mokta jān jinoin laļ” (lale 1 Piter 1:19–21).
Rikanaan ro ilo aolep epepen ko rekar kanaan kōn itok eo an Jisōs Kraist im ta naaj mijen eo An. Jān tōmak eļap, Inōk kar kwaļo̧k n̄an E juon visōn ekabwilōn̄lōn̄ kōn ļo̧tak, mej, Wanlōn̄ļo̧k eo An, im Itok eo Kein Karuo an Rilo̧mo̧o̧r:
“Im lo, Inok ar lo raan in itok eo an eo Nejin Armej, em̧ool ilo kanniōk; im jetōb eo an ar m̧ōņōņō, im ba: Eo Ewānōk em̧ōj kotake, im Lamb eo em̧ōj m̧ane jān foundasōn eo an laļ. …
“Im Irooj eba n̄an Inok: Kwōn reilo̧k, im eaar reilo̧k im lo eo Nejin Armej rej kotak ioon debwāāl eo, ilo̧kan jekjek eo an armej raņ;
“Im eaar ron̄ juon ainikien eļļaaj; im lan̄ ko rekar libobo; im aolep mennin kōm̧anm̧an ko an Anij rekar liaajlo̧ļ; im laļ eaar n̄irļo̧k; im dekā ko rekar potak; im ro rekwōjarjar rekar jerkak, im kar bōk kūrawūn ianbwijmaron̄ in eo Nejin Armej, kōn kūrawūn ko in aiboojoj. …
“Im Inok eaar lo eo Nejin Armej ej wanlōn̄ļo̧k n̄an Jemān. …
“Im ālikin men kein Inok eaar lo raan in itok eo an eo Nejin Armej, ilo raan ko āliktata, n̄an jokwe ioon laļ ilo wānōk n̄an tōrean eo juon to̧ujin iiō ko” (Moses 7:47, 55–56, 59, 65).
Enan̄in 75 iiō ko m̧okta jān ļo̧tak eo an Kraist, Amulek ekar kam̧ool: “Lo, ij ba n̄an kom̧, bwe ijeļā bwe Kraist enaaj itok ilubwiljin ro nejin armej, n̄an bōk ioon nana ko an armej ro An, im bwe Enaaj pinmuur kōn jero̧wiwi ko an laļ; bwe Irooj Anij Eaar kōnono men in” (Alma 34:8).
Jisōs Ekar Jenoļo̧k Kapāāl ko An
IA EO REKAR BŌK E N̄ANE?, jān J. Kirk Richards
Jisōs Kraist wōt emaron̄ kōm̧m̧ane katok in pinmuur eo—maron̄ ļo̧tak jān juon jinen ilo kanniōk, Meri, im kar bōk kajoor an mour jān Jemān (lale Jon 5:26). Kōnke kōn kajoor in mour in, Ekar anjo̧ jān mej in kanniōk, kajoor eo an lōb ekar jako maron̄ eo an, im Ekar erom ad Rilo̧mo̧o̧r im Rijojomar im Maajta eo an Jerkakpeje eo—meļeļein lo̧mo̧o̧r im jab wabanban emōj letok n̄an kōj aolep. Jenaaj jerkakpeje im erom ro rej jab wabanban kōn wōt kar katok in pinmuur eo an Jisōs Kraist.
Jisōs Ekar Mōņōņō in Pinmuur kōn Bōd eo an Adam
Laajrak in Tōmak kein karuo ej kwaļo̧k, “Kōmij tōmak bwe armej renaaj bōk kaje kōn jero̧wiwi ko aer make, im jab kōn bōd eo an Adam.”
Jān kōjerbal anemkwoj in kālet eo ad, jej kālet n̄an kōjerbal tōmak eo ad. Kōn tiljek, jemaron̄ ukweļo̧k, eļan̄n̄e eban Pinmuur eo, jejjab maron̄.
Ilo bok in Moses jej katak, “Jān men in eaar itok ennaan eo ijoko rettoļo̧k ilubwiljin armej ro, bwe eo Nejin Anij eaar pinmuur kōn bōd eo m̧oktata, eo jān e jero̧wiwi ko an ro jemād im jined rejjab maron̄ uwaak kaki ioon bōran ro nejier, bwe rōdipiio jān foundasōn eo an laļ” (Moses 6:54).
Ilo 2 Nipai jej bōk juon katak eļap:
“Bwe āinwōt mej eaar itok ioon aolep armej, n̄an kakūrm̧ool karōk in tūriam̧okake eo an Rikōm̧anm̧an Eļap, eaikuj wōr kajoor in jerkakpeje, im jerkakpeje eo eaikuj itok n̄an armej jān tokjān wōtlo̧k eo; im wōtlo̧k eo eaar itok jān tokjān bōd; im kōnke armej raar wōtlo̧k raar m̧wijkōk jān im̧aan mejān Irooj.
“Kōn menin, eaikuj bwe en pinmuur eo ejjeļo̧k jem̧ļo̧kin—n̄e ejjab juon pinmuur eo ejjeļo̧k jem̧ļo̧kin wabanban in eban maron̄ kōņak jab wabanban. Kōn menin, ekajet eo m̧oktata eo eaar itok ioon armej ej aikuj kar pād wōt ium̧win iien ejjeļo̧k jem̧ļo̧kin. Im n̄e āindein, kanniōk in en kar babuļo̧k n̄an kōt im n̄an m̧adeon̄eon̄ n̄an eo jinen bwidej, n̄an jab jerkak” (2 Nipai 9:6–7).
Jisōs Ekar Armej Eo Emake Wōt Wāppen
Ilo Katak im Bujen ko, Rilo̧mo̧o̧r eo ej ba “Jema, lo en̄taan ko im mej eo an Eo eaar jab kōm̧m̧an jero̧wiwi, ilo E Kwaar kanooj bun̄-būruōm̧; lo bōtōktōkin Nejūm̧ eo ar to̧o̧rļo̧k, bōtōktōkin E eo Kwaar leļo̧k bwe Kwōn maron̄ aiboojoj (K&B 45:4).
Jisōs ekar armej eo emake wōt ewāppen, ejjeļo̧k An jerawiwi. Katok ilo Kallim̧ur Mokta meļeļein juon katok in bōtōktōk—m̧aantak n̄an katok eo an ad Irooj im Ripinmuur ioon dōbwāāl eo n̄an kakūrm̧ool katok in pinmuur eo. Ke katok kōn bōtōktōk ekar kōm̧m̧an ilo tampeļ ko etto, pris ro rekar katok kōn juon lamb erreo, ewāppen ilo jabdewōt wāween. Rilo̧mo̧o̧r eo emākijkij an kōnono kake ilo jeje ko rekwojarjar āinwōt “Lamb an Anij” kōnke erreo eo An (lale, n̄an waanjon̄ak, Jon 1:29, 36; 1 Nipai 12:6; 14:10; K&B 88:106).
Piter ekar katakin bwe jej pinmuur “A ear bōtōktōk e aorōk, āinwōt an lamb ejjeļo̧k ņotaan im e kwojarjar, aet eo an Kraist” (1 Piter 1:19).
Jisōs Ekar Bōkļo̧k Jerawiwi ko an Laļ
Eoon kein rej kalikkar bwe jān Pinmuur eo An, Rilo̧mo̧o̧r eo ekar kōļļāik wōņāān eo kōn jerawiwi ko ad.
“Aolep kōj, āinwōt sip, jaar jebwābwe; jaar jeorļo̧k jabdewōt iaad kajjojo n̄an iaļ eo an; im Irooj eaar likūt ioon jero̧wiwi ko ad aolep” (Mosaia 14:6).
“A Anij ej kwaļo̧k kadkadin An yokwe n̄an kōj ilo men in, ke jar ri jero̧wiwi, Kraist Ear mej kōn kōj. …
“Bwe eļan̄n̄e, ke jaar ri kōjdat, mej an Nejin ear kōllaajrak kōj n̄an Anij, en ļapļo̧k, ke em̧ōj kōllaajrak, naaj lo̧mo̧o̧ren kōj ilo An mour.
“Im jab men in wōt, a jej barāinwōt lan̄lōn̄ ilo Anij kōn ad Irooj Jisōs Kraist, kōn Eo kiiō jaar bōk pinmuur. …
“Bwe āinwōt kōn kipiliia an juon armej, elōn̄ rej ri jero̧wiwi, barāinwōt kōn kipiliie an juon elōn̄ renaaj ri wānōk” (Rom 5:8, 10–11, 19).
“Bwe en kam̧ool naan Aiseia ar kōnono im ba, E make wōt bōk m̧ōjņo̧ ko ad, im bōkļo̧k nan̄inmej ko ad” (Matu 8:17).
“A Anij ej jab bōjrak an Anij, im tūriam̧okake ej an riukeļo̧k, im tūriam̧o kake ej itok kōn pinmuur eo; im pinmuur eo ej kakūrm̧ool jerkakpeje eo an ro remej; im jerkakpeje eo an ro remej ej kōro̧o̧lļo̧k armej n̄an im̧aan mejān Anij; im āindein rej jepļaakļo̧k ilo im̧aan mejān, n̄an ekajet ekkar n̄an jerbal ko aer, ekkar n̄an kien im jim̧we. …
“Im āindein Anij ej kakūrm̧ool un ko reļļap im ejjeļo̧k jem̧ļo̧kier, ko kar kōpooji jān lōn̄tak ko an laļ. Im āindein ej kūrm̧ool mour im lo̧mo̧o̧ren eo an armej, im barāinwōt ko̧kkure im būrom̧ōj” (Alma 42:23, 26).
Jisōs ekar Niknik n̄an Jem̧ļo̧kin
Gray Day Golgotha,jān J. Kirk Richards
Jisōs Kraist ekar kijenmej e mālijjon̄ ko, en̄taan ko, kaarmejete ko, im kapan̄pan̄ ko ilo Gethsemane, barāinwōt en̄taan im metak eo ioon dōbwāāl ilo Golgotha. Innām, āliktata, Ekar ba, “Em̧ōj” (Jon 19:30). Ekar kamōj jerbal eo An ilo mour in im niknik n̄an jem̧ļo̧kin, barāinwōt kamōj katok in pinmuur eo.
Ilo jikin kallib eo Ekar ba, “O Jema, eļan̄n̄e e maron̄e en ilo̧k kab in jān Eō; a en jab ankil Aō, a ankil Am̧” (Matu 26:39).
Ilo Katak im Bujen ko jej katak:
“En̄taan eo eaar kōm̧m̧an bwe N̄a, em̧ool Anij, eo Eļaptata jān aolep, n̄an wūdiddid kōnke metak eo, im n̄an bōtōktōk ilo aolepān Ānbwinnū, im n̄an en̄taan jim̧or ilo ānbwin im jetōb—im Ikar kōņaan bwe In maron̄ kar jab idaak kap eo emeo̧, im jenlik—
“Mekarta, aiboojoj n̄an Jema, im Iaar bōke im kadedeļo̧k m̧aanjāppopo ko Aō n̄an ro nejin armej raņ (K&B 19:18–19).
Jisōs ekar ba n̄an Jemān, “Iar kaiboojoj Eok ioon laļ: Iar kam̧ōjļo̧k jerbal eo Kwaar letok n̄an Eō bwe In kōm̧m̧ane” (Jon 17:4).
Innām, ioon dōbwāāl eo, “Ke em̧ōj an Jisōs bōk vinegar eo, E ba, em̧ōj Im Ej jirļo̧k im kōtļo̧k An” (Jon 19:30).
Jisōs ekar itok n̄an laļ in, kōjparok kwojarjar eo An bwe En maron̄ kōm̧m̧ane katok in pinmuur eo, im niknik n̄an jem̧ļo̧kin.
Keememej E ilo Kwojkwoj eo
Rainin jej keememej katok in pinmuur eo an Rilo̧mo̧o̧r eo kōn kōkkaļļe ko an pilawā im dān—kōkkaļļe ko an Ānbwinnin im Bōtōktōkin—āinwōt kar kwaļo̧k kadkadin ilo Kwojkwoj in Kijone eo Āliktata ippān Rijilōk ro An.
“Im Ej bōk pilawā im jar, im ruji, im leļo̧k n̄an er im ba, “Men in ānbwinnū eo leļo̧k kōn kom̧: kom̧win kōm̧m̧an men in ilo ememej Eō.
“Im āindein kab ālikin m̧ōn̄ā im ba, kab in kallim̧ur eo ekāāl ilo daō eo eto̧o̧r ļo̧k kōn kom̧” (Luk 22:19–20).
Ilo Jon 11:25–26 jej riit:
“N̄a jerkakpeje eo, im mour eo: eo ej lōke Eō, men̄e e mej, enaaj bar mour:
“Im jabdewōt eo ej mour im lōke Eō, e jāmin mej indeeo.”
Jej barāinwōt riit: “N̄a pilawā eo e mour ear wanlaļtak jān lan̄: eļan̄n̄e jabdewōt armej ej m̧ōn̄ā jān pilawā in, enaaj mour indeeo: im pilawā eo I naaj lewōj e kanniōkō, men eo Inaaj lewōj bwe en kemour laļ” (Jon 6:51).
Mour eo an laļ in” meļeļein mour indeeo.
Jej aikuj in kōpooj kōj make im baam̧le ko ad kajjojo wiik bwe jen erreo n̄an bōk m̧ōttan kwojkwoj eo im n̄an kōkāāl bujen ko ad kōn bōro rej ukweļo̧k.
Jemān im Nejin rej Iakwe Kōj
Doubt Not, Thomas,jān J. Kirk Richards
Jemān ekar jilkintok Nejin n̄an laļ in—iakwe eo—n̄an kōtļo̧k bwe En dōbwāāl im dōblo̧ki men otemjej Ekar aikuj dōblo̧ki. Ilo Jon jej riit.
“Jisōs ekar ba … , N̄a iaļ, im m̧ool, im mour. Ejjeļo̧k armej ej itok n̄an Jema, eļan̄n̄e jab kōn Eō.
“Eļan̄n̄e kom̧ ar jeļā N̄a, barāinwōt kom̧ naaj kar jeļā Jema: im jān iien in kom̧ jeļā E, im ar lo E” (Jon 14:6–7).
“Yokwe ej ilo men in, jab bwe jaar yokwe Anij, a bwe Ear yokwe kōj, im jilkintok Nejin, bwe En kein medek kōn jero̧wiwi ko ad” (1 Jon 4:10).
Medek meļeļein errā ak kōm̧anm̧an kōtaan.
Kōjjem̧ļo̧k
Aolep ro rej itok n̄an laļ in im bōk juon ānbwin kanniōk renaaj jerkakpeje, ak jej aikuj jerbal n̄an bōk kōjeraam̧m̧an ko an ijo eutiej tata jān ad tiljek, ak anemkwoj, ad pokake, im ad ukweļo̧k. Tūriam̧o̧ naaj letok kōn ekajet, kōtļo̧k ukweļo̧k.
Kōnke jekar kālet n̄an ļoor im bōk Jisōs Kraist āinwōt ad Ripinmuur, jej bōk Etan iood ilo ad peptaij. Jej bōk kakien eo kōn pokake. Jej kallim̧ur bwe jenaaj aolep iien keememej E im kōjparok kien ko An. Jej kōkāāl bujen ko ad n̄e jej bōk m̧ōttan kwojkwoj eo.
Jān kōkāāl bujen ko ad, jej bōk kallim̧ur n̄an bōk Jetōb eo An ippān iien otemjej. N̄e jej kōtļo̧k bwe Jetōb eo An en deļo̧n̄ tok ilo mour ko ad im tōl mour ko ad, jemaron̄ jepļaakļo̧k n̄an im̧aan mejān Jemedwōj Ilan̄ im Nejin, Jisōs Kraist, eo ej Aer karōk in m̧ōņōņō n̄an kōj—karōk in lo̧mo̧o̧r.