Ang Makapakabig nga Gahum sa Basahon ni Mormon
Ni Elder Kevin S. Hamilton
Sa Seventy
Ang tanang kamatuoran sa ebanghelyo madawat ug masabtan sa sakto kon atong masayran nga ang sukaranang bato sa atong pagpamatuod—ang Basahon ni Mormon—tinuod.
Isip usa ka batang lalaki, ganahan ko nga mopahimutang sa mga domino sa taas nga linya sa lisud nga pagkadesinyo ug dayon itulod ang unang domino. Ang nagkinadinang reaksyon makapatumpag sa mga domino nga nagsunod, usa ngadto sa lain hangtud sa katapusan nga linya. Mogahin ko og mga oras nga mainampingong mopahiluna sa mga domino aron malingaw nga makita kining mangatumba.
Ang usa ka pagpamatuod sa Basahon ni Mormon maoy usa sa unang mga lakang sa pag-angkon og pagpamatuod sa ebanghelyo ni Jesukristo. Sama sa unang domino nga sunod-sunod nga makapatumba sa ubang mga domino, kon mahibaloan nato una nga ang Basahon ni Mormon tinuod, nan mahibaloan usab nato nga si Jesukristo mao ang atong Manluluwas ug Manunubos, nga si Joseph Smith Iyang propeta nga pinaagi kang kinsa ang Pagpahiuli nahitabo, ug nga Ang Simbahan ni Jesukristo sa mga Santos sa Ulahing mga Adlaw mao ang tinuod nga Simbahan ni Jesukristo nga gipahiuli uban sa gahum ug awtoridad dinhi sa yuta karon.
Ang Basahon ni Mormon Mao ang Sentro sa Atong Mensahe
Kabahin sa Basahon ni Mormon, si Propeta Joseph Smith miingon, “Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon.”1
Si Joseph mipadayon sa pagtudlo nga kini ang sentro sa atong hugot nga pagtuo, mga tinuohan, ug pagpamatuod. “Kuhaa ang Basahon ni Mormon ug ang mga pagpadayag, ug asa na man ang atong relihiyon?” siya nangutana. “Wala kitay relihiyon.”2
Ang katahum sa mensahe sa ebanghelyo mao nga ang matag usa kanato mahimong makahibalo alang sa atong mga kaugalingon nga ang Basahon ni Mormon tinuod.
Isip presidente sa misyon sa France, Belgium, ug sa Netherlands pipila ka tuig nang milabay, aduna koy kahigayunan ug panalangin sa pag-interbyu sa mga indibidwal alang sa katakus nga magpabunyag. Dili gayud nako makalimtan ang akong pag-interbyu sa usa ka sister.
Panahon sa among interbyu nangutana ko kaniya kon sa unsang paagi iyang nahibaloan nga ang Simbahan tinuod. Siya mikab-ot sa iyang handbag ug mikuha sa daan na ug maayong pagkabasa nga kopya sa Basahon ni Mormon. Iyang giablihan ang basahon ngadto sa 3 Nephi 27 ug mipasabut nga kini mao ang unang kapitulo nga ang mga misyonaryo midapit kaniya sa pagbasa. Siya miingon nga samtang siya misugod sa pagbasa, siya natandog pag-ayo sa unsay iyang nabasa ug sa Espiritu nga iyang nabati. Napuno gayud siya sa espiritu sa Basahon ni Mormon nga siya mikuha og pula nga lapis ug misugod sa pagbadlis sa mga pulong nga labing nakapadani kaniya.
Dayon siya mipakita kanako sa iyang kopya sa Basahon ni Mormon, bukas ngadto sa 3 Nephi 27. Hapit ang matag pulong niana nga kapitulo gibadlisan og pula.
“Mao kana nganong mituo ko,” siya miingon. “Kini nga basahon namulong ngari kanako sa paagi nga ako dili makalimud. Ako nasayud nga kini tinuod, ug ako nasayud nga Ang Simbahan ni Jesukristo sa mga Santos sa Ulahing mga Adlaw tinuod.”
Siya nabunyagan ug nahimong matinud-anon nga miyembro sa Simbahan.
Ang Pasiuna sa Basahon ni Mormon.
Ang pasiuna sa Basahon ni Mormon naghatag kanato og sumbanan diin kita mahimong masayud sa atong kaugalingon nga ang mensahe sa ebanghelyo tinuod. Ang pasiuna “unang namantala niadtong 1981 nga edisyon sa Basahon ni Mormon. Kini nagpaila sa Basahon ni Mormon ngadto sa bag-o nga mga magbabasa pinaagi sa paghatag og impormasyon sa kaagi niini ug usa ka paghulagway sa basahon.”3
Ang pasiuna nagsugod pinaagi sa pagsulti kanato sa tukma gayud kon unsa ang Basahon ni Mormon: “Usa ka balaan nga kasulatan nga ikatandi sa Biblia. Kini usa ka talaan sa Dios sa iyang mga pakigdumala sa karaan nga mga lumulupyo sa mga America ug naglakip sa kahingpitan sa walay katapusan nga ebanghelyo.” Atong makat-unan nga kini “gisulat sa daghan nga karaan nga mga propeta pinaagi sa espiritu sa pagpanagna ug pagpadayag” diha sa mga palid nga bulawan ug gipamub-an “pinaagi sa usa ka propeta nga tigsaysay nga ginganlan og Mormon.”
Painting ni Joseph Smith pinaagi ni Richard Burde, sa maayong kabubut-on sa Church History Museum; tuo: paghulagway pinaagi ni Ben Sowards
Ato usab makat-unan nga “ang labing madaugon nga hitabo nga nahisulat diha sa Basahon ni Mormon mao ang kinaugalingon nga pagpangalagad sa Ginoong Jesukristo taliwala sa mga Nephite human dayon sa iyang pagkabanhaw. Kini nagpahimutang sa mga doktrina sa ebanghelyo, naglatid sa plano sa kaluwasan, ug nagsulti sa mga tawo unsa ang kinahanglan gayud nga ilang pagabuhaton aron maangkon ang kalinaw niini nga kinabuhi ug ang kaluwasan sa kahangturan diha sa kinabuhi nga umaabut.”
Usa sa labing importante nga mga butang nga atong makat-unan gikan sa Basahon ni Mormon mao nga ang Simbahan nga gipahiuli ni Jesukristo pinaagi ni Joseph Smith tinuod.
Ang pasiuna nagdapit kanato “sa pagbasa sa Basahon ni Mormon, sa pagpamalandong diha sa [atong] mga kasingkasing sa mensahe nga gilakip niini, ug unya sa pagpangutana sa Dios, ang Amahan sa Kahangturan, sa ngalan ni Kristo kon ang basahon tinuod ba.” Gisaaran kita nga “kadtong kinsa mosunod niini nga pamaagi ug mangamuyo sa hugot nga pagtuo makaangkon og usa ka pagpamatuod sa iyang kamatuoran ug pagkabalaanon pinaagi sa gahum sa Espiritu Santo. (Tan-awa sa Moroni 10:3–5.)”
Kining dugang nga saad nagsunod: “Kadtong kinsa makabaton niini nga balaanon nga pagpamatuod gikan sa Balaang Espiritu modangat usab sa kamatuoran pinaagi sa sama nga gahum nga si Jesukristo mao ang Manluluwas sa kalibutan, nga si Joseph Smith mao ang Iyang tigpadayag ug propeta niining katapusan nga mga adlaw, ug nga Ang Simbahan ni Jesukristo sa mga Santos sa Ulahing mga Adlaw mao ang gingharian sa Ginoo nga sa makausa pa gitukod na usab dinhi sa yuta, pagpangandam sa Ikaduha nga Pag-anhi sa Mesiyas.”
Hunahunaa kini! Sa tinuod masayud kita sa atong kaugalingon nga:
-
Si Jesus mao ang Kristo, ang Manluluwas sa kalibutan, ug ang Manunubos sa tanang katawhan.
-
Si Joseph Smith usa ka tinuod nga propeta. Siya misulti sa kamatuoran. Siya nakakita sa mga butang nga siya miingon nga iyang nakita ug nakadungog sa mga pulong nga siya miingon nga iyang nadunggan.
-
Ang Simbahan nga gipahiuli ni Jesukristo pinaagi ni Joseph Smith “mao lamang ang tinuod ug buhi nga simbahan diha sa ibabaw sa tibuok yuta” (D&P 1:30). Kini mao ang Simbahan ni Jesukristo. Anaa niini ang kamatuoran, gahum, awtoridad, ug mga ordinansa. Kini personal nga gidumala sa Ginoo ug Manluluwas nga si Jesukristo pinaagi sa buhing mga propeta.
Kining tanan atong masayran kon kita masayud nga ang Basahon ni Mormon tinuod. Kini adunay makakabig ug makadani nga gahum.
Ang Akong Pagpamatuod kabahin sa Basahon ni Mormon
Isip usa ka batan-ong misyonaryo nga nagserbisyo didto sa France, gusto kong masayud sa akong kaugalingon nga ang Basahon ni Mormon tinuod. Ako mituo nga kini tinuod. Ako naglaum nga kini tinuod. Gani miadto ako sa misyon uban sa hugot nga pagtuo nga kini tinuod. Hinoon, samtang ako nagtrabaho matag adlaw isip usa ka misyonaryo ug misulti sa mga tawo kutob sa akong mahimo sa akong limitado nga French nga ako adunay pagpamatuod sa basahon, ako wala pa gayud masayud alang sa akong kaugalingon.
Ang among gamay nga apartment sa habagatang France bugnaw ug tun-ugon sa tibuok panahon nianang unang tingtugnaw. Matag buntag ug gabii, sa dili pa ug human sa trabaho sa adlaw, ako magbukot sa habol ug overcoat aron sa pagbasa ug pagtuon sa akong Basahon ni Mormon. Ako nasayud sa saad ni Moroni, nga kon ako magbasa, mamalandong, ug mag-ampo, ako usab makahibalo. Sulod sa mga adlaw ug mga semana mibasa ko, apan walay nahitabo. Walay kahayag, walay anghel, walay tingog—wala gawas sa pagbati sa kalinaw samtang nagbasa ko.
Nagpadayon ko sa pagbasa ug mibadlis sa makahuluganon nga mga tudling ug nag-ampo aron masayud nga ang Basahon ni Mormon tinuod. Ang milagro sa katapusan miabut. Sama sa gihulagway ni Elder David A. Bednar sa Korum sa Napulog Duha ka mga Apostoles, mas sama kini sa pagsubang sa adlaw kay sa kalit nga kahayag sa pag-switch sa suga.4 Ang kahayag misugod sa pagdan-ag sa akong hunahuna ug kasingkasing. Ako misugod sa pagkakita sa Basahon ni Mormon sa lahi nga paagi. Ang mga tudling nga akong nabasa kaniadto misugod nga adunay bag-ong kahulugan kanako. Ang labing maayo nga paagi nga akong mahulagway ang kasinatian mao nga nagsugod nga malamdagan ang akong hunahuna.
Sulod sa mga semana ug mga bulan, ako makasulti nga ako nakahibalo labaw pa sa bisan unsang butang nga akong nahibaloan nga ang Basahon ni Mormon mao ang pulong sa Dios. Ako nakaamgo nga kini gisulat ug gipreserbar alang sa atong panahon ug gipagawas isip usa ka gamhanan nga saksi ni Jesukristo ug sa Iyang Simbahan. Ang pagbati nga balik-balik nga miabut kanako pinaagi sa tingog sa Espiritu mao ang, “Kini tinuod, kini tinuod, kining tanan tinuod.”
Paglabay sa kwarenta ka tuig, kanang sama nga saksi nagpadayon uban kanako. Karon akong nabasa ang Basahon ni Mormon sa makadaghan, ug sa matag higayon—sa matag higayon—akong madunggan pag-usab ang mga pulong “Kini tinuod.” Kini naghatag kanako og kasigurohan nga si Jesukristo mao ang akong Manluluwas ug nga kini mao ang Iyang mahinungdanon nga buhat sa kaluwasan.
Sama sa domino nga gusto nakong dulaan isip usa ka batang lalaki ang tanang matumba kon akong itulod ang nag-una, mao usab ang tanan nga mga kamatuoran sa ebanghelyo mahan-ay sa hustong dapit samtang atong mahibaloan nga ang sukaranang bato sa atong pagpamatuod—ang Basahon ni Mormon—tinuod.