Ang Atong mga Panimalay, Ang Atong mga Pamilya
Ang Atong Labing Maayong Panalipod batok sa Pornograpiya
Ang tagsulat nagpuyo sa Washington, USA.
Sa usa ka bersikulo sa kasulatan, akong nakita ang paagi sa paglikay sa akong pamilya sa dayag nga mga hulagway nga daw anaa bisan asa.
Namalit ko og mga sinina sa eskwelahan uban sa akong nwebe anyos nga anak nga lalaki sa dihang ang among makalingaw nga panag-istoryahanay nahimong seryoso nga pangutana. “Ma, nganong ibutang man gyud nila kanang butanga sa tanang mga bintana sa tindahan?”
“Kanang butanga” ang gipasabut niya mao ang law-ay nga mga litrato nga gibutang diha sa mga bintana sa hapit matag tindahan nga among naagian. Bisan og ang mga litrato sama niini diha na kanunay, wala kaayo ko magtagad niini kaniadto. Apan ang pagsugod sa pagkamatikod sa akong kinamagulangan nga anak nga lalaki nakapahigmata nako. Sa misunod nga mga semana, nagsugod na ko sa pagkakita niini nga mga hulagway bisan asa: sa telebisyon, sa tindahan, sa mga restawran, sa mga advertisement nga gipadala agi sa koreyo. Dili ako makalikay gikan niini. Ang pipila ka mga hulagway klaro kaayo nga ako misugod sa pagkalibog, ug misugod sa pagbati og kabalaka sa akong kasingkasing. Sa unsang paagi ako makapanalipod sa akong pamilya gikan sa mga lit-ag sa pornograpiya?
Matag kinatibuk-ang komperensya atong madungog ang mga pasidaan kabahin sa grabeng mga epekto niini, ug kita nakaila sa mga biktima niini. Gidala namo ang tanang mga pahimangno sa panimalay uban sa among computer ug media nga gitugutan namo, apan klaro kaayo, gawas kon ang among mga anak mahilayo, ingon og walay paagi nga makalikay sa hingpit sa pagtan-aw sa dili maayo nga mga hulagway nga tingali mosangpot og dugang nga kakuryuso. Ang inosente kaha nga pagtan-aw sa akong anak nga lalaki didto sa tindahan mahimong tibuok kinabuhi nga problema sa pornograpiya? Ang akong kabalaka niini nga isyu midako, ug nagsugod ko sa pagbati nga walay mahimo ug pagkahuyang sa pagpanalipod sa akong mga anak.
Detalye gikan sa Kahoy sa Kinabuhi, ni Kazuto Uota
Dayon usa ka adlaw samtang ako nagbasa sa Basahon ni Mormon, sa wala damha nakaplagan nako ang kasiguroan sa 1 Nephi 15. Si Nephi nagpasabut sa panan-awon ni Lehi sa kahoy sa kinabuhi ngadto ni Laman ug Lemuel sa dihang sila nangutana sa kahulugan sa suba sa tubig. Si Nephi mitubag sa bersikulo 27: “Ug ako miingon ngadto kanila nga ang tubig diin nakita sa akong amahan mao ang kahugaw; ug hilabihan ka linga sa iyang hunahuna sa uban nga mga butang nga siya wala makakita sa kahugaw sa tubig” (emphasis gidugang). Ang hunahuna ni Lehi nakatutok sa kahoy sa kinabuhi ug sa pagpakaon sa iyang pamilya sa bunga niini! Wala gani siya makakita sa kahugaw tungod sa pagtutok niini.
Mao kana ang tubag! Ang pagkuha sa dili angay nga media gikan sa among panimalay mao ang sinugdanan, apan ang mas direkta ug mahunahunaon nga paningkamot sa pagtudlo sa among mga anak sa ebanghelyo mao ang ilang labing maayo nga panalipod batok sa bisan unsa nga makapahisalaag kanila.
Tungod niini nga kasinatian uban sa mga kasulatan, ang akong bana ug ako mihukom sa pagdoble sa among mga paningkamot sa pagtudlo sa among mga anak ug sa pagpabilin sa among panan-aw diha sa gugma sa Dios kay sa kahugaw sa kalibutan. Gibati namo nga motutok sa tulo ka lain-laing mga bahin*:
1. Pagpalambo sa among kaugalingong personal nga pagtuon sa kasulatan ug pagpakunhod sa “kasaba” nga naglibut kanamo. Sama ni Lehi, ang among mga hunahuna kinahanglang mapuno sa positibo nga mga butang aron makadungog sa mga aghat sa Espiritu ug aron kami makatutok sa pagpalig-on sa among pamilya diha sa ebanghelyo. Ang akong bana ug ako naningkamot sa kanunay nga mogahin og panahon sa paghisgut kabahin sa espirituhanon nga mga panginahanglan sa matag indibidwal diha sa pamilya ug kon unsaon namo sa pagtagbaw niadto nga mga panginahanglan ug paghimo og usa ka panimalay diin ang Espiritu mahimong molambo.
2. Paghimo nga mas makahuluganon ang pagtuon sa pamilya sa kasulatan. Bisan tuod nagkinahanglan kini og dakong paningkamot sa pagpundok sa pamilya matag adlaw sa pagbasa sa mga kasulatan, among gipaningkamutan nga dunay panaghisgot kon kami magbasa sa mga kasulatan. Nagkalain-laing ang mga edad sa among mga anak, mao nga magbasa kami sa kasulatan sa gagmay nga mga bata sa hapon-hapon na ug mga dagko sa sayo sa buntag kon nangatulog pa ang gagmayng mga bata aron wala kaayoy makabalda ug daghang oportunidad alang sa panaghisgot. Among nakaplagan nga hapit matag adlaw dunay panaghisgot sa bag-ong mga hitabo nga may kalabutan sa mga kasulatan nga among gibasa.
Kasagaran sa buntag layo ra sa pagkaperpekto, apan sa pagpadayon among nakaplagan nga ang mga bata naminaw ug moapil, bisan og usahay nagkinahanglan og grabing paningkamot sa pagpundok sa tanan.
3. Paghimo og misyonaryo nga buhat. Kon kami mopamatuod, ang Espiritu mopamatuod nga unsay among gisulti tinuod, ug ang among mga pagpamatuod motubo. Gipaningkamutan namo sa paghimo sa misyonaryo nga buhat nga usa ka kalihokan sa pamilya. Maghisgot mi mahitungod sa pagpakigbahin sa ebanghelyo, ug kami kanunay nga modapit sa mga higala sa among panimalay. Gipahimuslan usab namo ang oportunidad sa pag-imbitar sa mga misyonaryo ug mga investigator sa among panimalay aron sa paghisgot sa ebanghelyo. Kami dunay talagsaong mga kasinatian uban sa bag-ong mga miyembro sa Simbahan ug sa mga investigator sa among panimalay, ug kini nakahimo og impresyon sa among mga anak samtang sila namalandong sa ilang kaugalingong mga pagpamatuod ug maminaw sa pagpamatuod sa mga misyonaryo.
Ako mapasalamaton kaayo alang sa Basahon ni Mormon ug sa milagroso nga paagi nga ang usa ka bersikulo sa kasulatan nakahatag nako og kasiguroan ug klaro nga direksyon alang sa among pamilya. Ang mga kasulatan sa tinud-anay mopuli sa kahadlok ug pagkawalay mahimo uban sa gahum ug kalinaw.