Atong Luna
Pagdawat sa Akong Medalyon sa Young Women
Itaas sa wala ug tuo: mga paghulagway pinaagi ni David Malan
Malipayon kaayo ko nga nakadawat sa akong Pahalipay sa Batan-ong Pagkababaye. Mapasigarbuhon ako sa pagsulti nga kanunay kong putli ug limpyo ug nga masul-ob nako ang akong medalyon nga mapasigarbuhon. “Kinsay makakaplag sa usa ka babaye nga takus? kay ang iyang bili labaw pa kay sa mahal nga mga bato.” (Mga Proverbio 31:10).
Nindot kaayo ang organisasyon sa Young Women. Kini makatabang sa batan-ong mga babaye sa pag-uswag ug sa pag-andam sa ilang mga kaugalingon alang sa kaminyoon sa balaan nga templo. Mapasalamaton ko sa akong Langitnong Amahan alang niini nga organisasyon. Sa pagkadawat sa akong medalyon, nakompleto nako ang usa sa mga tumong nga akong gihimo alang sa akong kinabuhi, ug ako nasayud nga ako magpadayon sa pagbuhat og mas maayo pa sa buhat sa Ginoo.
Katherine Moreno, Venezuela
Ang Atong mga Talento Makapahimo sa Kalibutan nga Mas Maayo nga Dapit
Uban sa tabang sa akong inahan ug igsoong babaye, gihimo nako kining bandera alang sa Relief Society sports festival nga gipahigayon sa among stake. Ang akong inahan mirekomendar kanako ngadto sa presidente sa Relief Society, kinsa mihangyo nako sa paghimo sa ilang bandera alang kanila. Misugot ko sa ilang hangyo ug misugod sa paghimo og mga sketches. Pinaagi sa hiniusang mga paningkamot sa akong pamilya ug nako, kami nakahimo og maanindot nga buhat sa art nga nagrepresentar sa tema “Pagpangita Og Dungog sa Pagkainahan ug Hingpit nga Kalipay sa Pagkababaye.”
Ako nasayud nga kon kita mogamit sa atong mga talento sa pagserbisyo sa ubang mga tawo, wala lamang kita makahatag nila og kalipay apan kita usab makapalambo sa atong kaugalingong mga abilidad. Ang Ginoo mopanalangin niadtong kinsa mogamit sa ilang mga gasa gikan Kaniya sa pagtukod sa Iyang gingharian. Sama sa gitudlo sa sambingay sa mga talento, kon dili kita mopakigbahin sa atong mga gasa ngadto sa uban, kita mawad-an niadtong mga gasa (tan-awa sa Mateo 25:24–29). Apan kon kita mogamit sa atong mga talento alang sa kaayohan, kita makahimo sa kalibutan nga mas maayong dapit.
Vanessa Pamittan, Philippines
Unsay Inyong Makat-unan gikan sa Katungdanan ngadto sa Dios
Ang aktibong pag-apil sa mga kalihokan sa Pagtuman sa Akong Katungdanan ngadto sa Dios nagkinahanglan sa inyong tibuok nga kasingkasing, dedikasyon, kalig-on, ug labaw pa kay sa bisan unsa, hugot nga pagtuo. Ang Katungdanan ngadto sa Dios tinuod nga dinasig.
Isip usa ka batan-ong lalaki, ikaw makakat-on og talagsaong mga butang nga imong magamit sa tibuok mong kinabuhi pinaagi sa pagkompleto sa mga tumong sa Katungdanan ngadto sa Dios: espiritwal, temporal, pisikal, ug daghan pa.
Makaingon ko nga kini angay sa paningkamot sa pagpahinungod sa imong kaugalingon aron makompleto kini nga mga tumong. Nakat-on ko nga mahimong mas maayong tawo, mitubo ang akong pagpamatuod sa ebanghelyo ni Jesukristo, ug mas naandam nako ang akong kaugalingon sa pagdawat sa Melchizedek Priesthood. Makapalipay nga masayud nga ako mahimong maayo nga ehemplo sa akong umaabut nga mga anak tungod kay akong nahimo kining talagsaon, importante nga tumong.
Jonathan Argüello, Venezuela
Ang Usa Ka Misyon Mas Maayo Kay sa Gipaabut
Itaas sa wala ug tuo: mga paghulagway pinaagi ni David Malan
Isip usa ka batan-ong lalaki, ako nagpaabut sa adlaw nga ako moserbisyo og full-time nga misyon. Sa dihang sa katapusan ako misulod sa natad sa misyon, akong nadiskobrehan nga ang misyonaryo nga pagserbisyo dili unsay akong gipaabut—mas maayo pa hinoon. Mas lisud kini kaysa akong gihunahuna, apan ang katagbawan nga nagagikan sa pagbuhat sa gisugo sa Ginoo kanako dili mahulagway.
Wala pa gyud sukad nako masinati ang kalipay sa pagtabang sa usa ka tawo nga mosimba. Wala pa gyud sukad nako mabati ang kahinam sa pagpaminaw sa usa ka tawo nga moingon, “Sigurado, dali sulod” aron sila makadungog sa gipahiuli nga ebanghelyo. Wala pa gyud sukad nako mabati ang katinuod sa gahum nga moabut samtang kami mipahayag og paghinulsol. Wala pa gyud sukad ako makaampo sa ingon ka tinuod nga katuyoan. Wala pa gyud sukad nga ang usa ka oras nga pagtuon sa kasulatan dali kaayong milabay. Wala pa gyud sukad ako makahilak tungod sa pagkaamgo sa akong pagkadili hingpit. Wala pa gayud sukad nako masinati ang kasagmuyo nga moabut tungod sa mga pulong, “Elder, palihug ayaw na mo og anhi sa among balay.” Wala pa gyud sukad ako maluthi sa akong mga tiil nga sama ka dako sa akong kumagko. Wala pa gyud sukad nako mabati nga gipanalipdan. Wala pa gyud sukad nako mabati ang dakong responsibilidad sa akong mga lihok tungod kay akong gisul-ob ang ngalan nga “Jesukristo” sa akong dughan.
Wala pa gyud sukad ako mahiduol sa akong Langitnong Amahan sama sa akong nasinati sa akong full-time nga misyon.
Nahuel Cabranes, Peru