Ako Nakaila sa Pulong sa Dios
José Evanildo Matias Fernandes, São Paulo, Brazil
Paghulagway pinaagi ni Allen Garns
Samtang anaa sa usa ka airport pipila na ka tuig ang milabay sa São Paulo, Brazil, nakita nako diha sa usa ka plastaranan sa tindahan sa libro ang usa ka basahon nga giulohan og “Ang Basahon ni Mormon: Lain nga Tugon ni Jesukristo.” Ako nagduda nga ang atong nagka-imoral ug walay direksyon nga kalibutan modawat pa ba kaha og lain nga tugon ni Jesukristo, ug akong gigahin ang katapusan sa semana sa paghunahuna kabahin sa basahon.
Sa katapusan, wala na ko nakapugong sa akong kakuryuso, ug mibalik ko ngadto sa tindahan sa libro aron paliton kini. Sa dihang miabut ko, hinoon, wala na nako kini nakita. Akong gihulagway ang basahon ngadto sa nagbantay sa tindahan, apan siya miingon nga wala gayud siya makakita niini. Wala usab niya kini makita sa rekord, bisan og ang tanan nga mga basahon nga gipakita diha sa plastaranan gi-rekord na.
Pagkataudtaud samtang diha ko sa usa ka botika, akong namatikdan ang usa ka abli nga basahon diha sa counter. Samtang ako misugod sa pagbasa niini, nakat-unan nako ang mahitungod sa usa ka tawo nga ginganlan og Korihor kinsa miinsister nga magduha-duha sa gahum sa Dios ug ang katapusan naamang. Sa dihang namalandong ko sa mga pulong nga akong nabasahan, ako nakaila nga kini gikan sa Dios.
Atol niining panahona nangita gyud ko og balaanon nga direksyon. Usa ka adlaw miluhod ko ug matinguhaon nga nag-ampo nangayo sa Dios nga ipakita kanako ang tinuod nga dalan nga magtultol kanako ngadto Kaniya. Paglabay sa pipila ka adlaw ang among anak nga lalaki nasakit, mao nga mibalik ko sa botika. Sa dihang mobiya nako, tulo ka batan-ong Amerikano nga nagsul-ob og name tag misulod. Diha-diha dayon adunay mainit nga pagbati sa akong dughan, nga nakaaghat nako sa pakigsulti ngadto kanila.
Sila miingon kanako nga sila anaa sa Brazil sa pagsangyaw sa ebanghelyo ni Jesukristo. Nangutana ko kon sila makatudlo ba nako, ug nagsabut mi sa eskedyul.
Sa dihang nakadungog ko mahitungod ni Propeta Joseph Smith sa unang higayon, ako nasayud nga ang akong pag-ampo natubag. Dayon ang mga misyonaryo mihatag kanako og basahon. Sa akong katingala, kini mao ang usa ka Basahon ni Mormon—sama sa akong nakit-an sa plastaranan. Nabati nako pag-usab ang nindot kaayo nga pagbati ug nahimo nga hilabihan ka malipayon nga naglisud ko sa pag-istorya.
Ang mga misyonaryo mipasabut sa gigikanan sa basahon ug dayon mihangyo kanako sa pag-ampo ug pagpangutana sa Dios kon kini tinuod. Ako aduna nay usa ka hingpit nga kasiguroan sa kabalaan sa basahon, kay ang Ginoo mipakita niini kanako—kaduha. Bisan pa niana, detalyado nako kini nga gi-eksamin. Sa dihang nagbasa sa kapitulo 17 sa 3 Nephi, nasayud ko nga kini naglangkob og usa ka balaan nga istorya tungod kay kini naglangkob sa mga pulong ni Jesukristo.
Ang pundasyon sa akong pagpamatuod mao ang pagkasayud nga ang Basahon ni Mormon gilangkuban sa pulong sa Dios. Kini nakapausab kanako ug nagpadayon sa pag-usab kanako.