Para sa Gagmayng mga Bata
Usa Ka Panaw diha sa Kamingawan
Si Nephi nagpuyo uban sa iyang pamilya didto sa Jerusalem. Ang iyang amahan, si Lehi, usa ka propeta. Ang iyang inahan mao si Sariah. Ang iyang igsoong mga lalaki mao si Laman, Lemuel, ug si Sam.
Ang amahan ni Nephi nag-ampo. Ang Langitnong Amahan misulti kaniya nga ang iyang pamilya kinahanglan nga mobiya sa dakbayan aron sila mahimong luwas. Lisud ang pagbiya sa ilang panimalay. Apan ang pamilya ni Nephi misunod.
Ang pamilya ni Nephi miadto sa kamingawan. Dayon ang Langitnong Amahan miingon nga si Nephi ug ang iyang igsoong mga lalaki kinahanglang mobalik ngadto sa dakbayan aron sa pagkuha sa mga kasulatan. Malisud kadtong buhaton. Apan si Nephi usa ka maayo nga ehemplo sa dihang ang iyang igsoong mga lalaki dili gusto nga mosunod. Siya miingon nga iyang buhaton unsay gipabuhat sa Langitnong Amahan.
Ang Langitnong Amahan mihatag sa pamilya ni Nephi og usa ka espesyal nga kompas. Gitawag kini og Liahona. Kon ang pamilya ni Nephi mituman sa Langitnong Amahan, kini mipakita sa agianan sa ilang pagbiyahe didto sa kamingawan. Gani mipakita kini ngadto ni Nephi kon asa paingon aron sa pagpangita og pagkaon alang sa iyang pamilya.
Kita mahimong sama ni Nephi kon kita mosunod sa mga sugo ug mosunod sa Langitnong Amahan!