Mga Buhat Nga Mogiya ngadto sa Kalipay

Si Presidente Eyring mitudlo nga “ang kalipay nga atong gusto alang sa atong mga minahal nagdepende sa ilang mga pagpili.”

Inyong mabasa ang mahitungod sa epekto nga maangkon tungod sa pagpili gikan sa mga ehemplo ni Nephi, Laman ug Lemuel. Si Laman ug Lemuel nagbagulbol ug dili gusto nga mosunod sa mga sugo (tan-awa sa 1 Nephi 2:12). Isip resulta, sila ug ang ilang kaliwat gitunglo ug gipahimulag gikan sa atubangan sa Ginoo (tan-awa sa 2 Nephi 5:20–24). Si Nephi mipili sa pagsunod sa mga sugo (tan-awa sa 1 Nephi 3:7), ug tungod niana, siya ug ang iyang mga katawhan “mipuyo subay sa matang sa pagkamalipayon” (2 Nephi 5:27).

Kamo makapili nga magmatarung ug magmalipayon. Apan ang mga tawo nga naglibut kaninyo tingali makahimo gihapon og sayop nga mga pagpili nga moresulta ngadto sa kasakit o pagkadili komportable. Samtang kadto nga mga desisyon sila ang mihimo, ang inyong ehemplo makaimpluwensya sa ilang mga pagpili alang sa kaayohan. Sa unsang paagi ang inyong mga pagpili nga makahatag og kalipay ngadto sa uban? Hisguti uban sa inyong pamilya ang lain-laing mga paagi nga kamo positibong makaimpluwensya niadtong naglibut kaninyo ug motabang kanila nga magmalipayon.