Ua haamo’ahia te vahi no te faaho’i-faahou-raa-hia mai te autahu’araa

I te 19 no setepa 2015, ua faatere te peresideni Russell M. Nelson, peresideni no te Pupu no te Tino Ahuru ma Piti Aposetolo, i te haamo’araahia i Pennsylvania, i Marite, te vahi i reira o Iosepha Semita e o Olive Kaudere i farii ai i te autahu’araa a Aarona mai roto mai ia Ioane Bapezito. I te mau matahiti 1820 ra ua parauhia taua vahi ra o Harmony, Pennsylvania, e e rave rahi ohipa i roto i te aamu matamua o teie Ekalesia i faaho’i-faahou-hia mai tei tupu i reira :

Te farereiraa o Iosepha Semita e o Emma Hale, ta raua arapaeraa, e to raua oraraa faaipoipo matamua.
Te taeraa mai o Olive Kaudere no te tauturu ei papa’i parau i roto i te iritiraa i te Buka a Moromona.
Te iritiraa i te pae rahi o te Buka a Moromona.
Te faaho’iraahia mai te autahu’araa a Aarona e (noa’tu aita i itehia te vahi ti’a) te autahu’araa a Melehizedeka ato’a.
Te mau bapetizoraa matamua tei ravehia na roto i te mana autahu’araa i teie anotau.
Te mau heheuraa tei fariihia tei riro mai 15 tuhaa i roto i te Parau Haapiiraa e te mau Parau fafau, e te hoê tuhaa o te Poe Tao’a Rahi.

I teie vahi i faaapîhia, te vai ra hoê pû fariiraa ratere, o te riro ato’a ei fare pureraa no te hoê amaa i reira ; te mau fare o Iosepha e o Emma e to te mau metua o Emma, Isaac e o Elizabeth Hale tei patu-faahou-hia ; te hoê purumu no te haere i te anavai no Susquehanna, te vahi e ti’aturihia ra e, i reira te bapetizoraahia o Iosepha e o Olive.

« Ua horo’a o Harmony ia Iosepha i te vai-hau-raa e te parururaa pae varua, e na roto i te reira, ua ti’a ia’na ia faatumu i ni’a i te iritiraa o te Buka a Moromona », te na reira ra te peresideni Nelson. « I roto i taua pu’e tau ra, ua haapii te Fatu ia Iosepha i ta’na ohipa hanahana ei peropheta, ei hi’o e ei heheu parau ».

Te mata’ita’i haere nei te peresideni Russell M. Nelson et to’na hoa faaipoipo, o Wendy, i te fare o Iosepha e o Emma Semita tei hamani-faahou-hia, ua iritihia te pae rahi o te Buka a Moromona i reira.