Elder Dale G. Renlund

Pupu no te Tino Ahuru ma Piti Aposetolo

I muri a’e i te hitimahutaraa matamua no to’na piiraahia i roto i te Pupu no te Tino Ahuru ma Piti Aposetolo, ua tuturi o Elder Dale G. Renlund i raro no te pure e ta’na vahine o Ruth, no te ani i te faaiteraa e, « na te Atua i arata’i i teie tereraa ohipa ».

E rave rahi taime to Elder Renlund imiraa i taua arata’iraa ra—ei Hitu Ahuru hui mana faatere, ei taote mafatu, ei tane faaipoipo e ei metua tane. Ei hi’oraa, a rave ai oia i te ohipa i roto i te pu’e tau haapiipiiraa taote i Maryland, Marite, ua roohia ta’na vahine i te mariri aitaata. 16 noa matahiti to ta raua tamahine o Ashley. I roto i taua mau mahana hepohepo ra, ua tupu faahou te mana’o fatata o Elder Renlund i te Fatu i te taime a haamauruuru ai o Ruth i te Fatu na roto i te pure no to raua taatiraa hiero.

Ua rave o Elder Renlund i te taato’araa o to’na toro’a ei taote utuutu mafatu, te utuuturaa i te taata e fifi mafatu paruparu to ratou. E rave rahi feia ma’i tei pohe i mua ia’na. Tera râ, i te poheraa te hoê taata ma’i o Chad te i’oa, ua ore te aueue ore o te taote i mua i te mau taime ati, i te taime a apiti mai ai na metua o Chad ia’na i roto i te piha ma’i râ. I taua taime ra, ua hi’o oia ia Chad na roto i to raua mata.

Ua parau o Elder Renlund no ni’a i taua ohipa ra i te na ôraa e, « Te ite nei au i teie nei e, i roto i te Ekalesia, no te tavini maita’i ia vetahi ê ra, titauhia ia tatou ia hi’o ia ratou na roto i te mata o te metua, na roto i te mata o te Metua i te ao ra. I reira ana’e e nehenehe ai ia tatou ia haamata i te haro’aro’a i te faufaa mau o te hoê varua » (api 94).

Ua tauturu ato’a to’na tau tamariiriiraa e te ohiparaa i roto i te Ekalesia ia faaineine ia’na ia hi’o ia vetahi ê na roto i te mata o te Fatu e ia haro’aro’a i te rauraa o te huru o te mau melo o te Ekalesia.

Ua fanauhia o Dale Renlund i te 13 no novema 1952 na roto mai i na taata êê Suede tei haere mai i Utaha ia taatihia i roto i te hiero. I te tamariiriiraa o Dale, ua reva’tu te utuafare i Finlande e ua ho’i faahou i Suede. Ua ho’i faahou oia i Utaha e to’na utuafare e toru matahiti i muri a’e. I te 19raa o to’na matahiti ua piihia oia no te tavini i te hoê misioni rave tamau i Suede.

I te matahiti 2009 ua piihia o Elder Renlund ia tavini ei Hitu Ahuru hui mana faatere rahi. Ta’na ohipa matamua tei roto ïa i te peresideniraa Area no Afirita Apato’a Hiti’a o te râ. Ua faaoti o Elder Renlund i to’na toro’a ei taote e ei orometua haapii, tera râ, te parau ra oia e, ta’na vahine « tei rave i te faatusiaraa rahi a’e ». O Ruth te peresideni no ta’na taiete ture i te taime a piihia ai o Elder Renlund, e ua faaru’e ato’a oia i ta’na ohipa. Tera râ, te parau ra oia e, mai to raua faaipoiporaahia i te matahiti 1977, ua riro noa oia i te mau taime ato’a ei tumu no to’na puai rahi.

A parahi ai raua i Afirita, « ua haapiihia o Elder e te tuahine Renlund na te Feia Mo’a e aha mau te mea faufaa ». I te hoê taime, i te fenua Congo, ua ani o Elder Renlund i te mau melo e aha to ratou fifi. Te haamana’o ra oia e, i muri a’e i te tahi mau faaitoitoraa, « ua ti’a maira te taata i ni’a e na ô maira, ‘E Elder Renlund, no te aha matou e fifi ai ? Tei ia matou nei te evanelia a Iesu Mesia.’ » Ua parau atura o Elder Renlund : « Te hinaaro nei ta’u vahine e o vau ia riro maua mai te Feia mo’a no Kananga… Ia hi’ohia’tu, mai te huru ra e, aore hoê mea ta ratou, tera râ, ua hope te mau mea ato’a na ratou ».

No te opani i ta’na a’oraa matamua ei aposetolo, ua faaite papû o Elder Renlund e : « Ma to’u aau ato’a, te hinaaro nei au ia riro ei pipi mau na Iesu Mesia. Te here nei au ia’na. Te haamori nei au Ia’na. Te faaite nei au e, te vai mau nei Oia. Te faaite nei au e, o Oia tei Faatahinuhia, te Mesia » (api 94).