Elder Gary E. Stevenson

Te Pupu no te Tino Ahuru ma Piti Aposetolo

A feruri ai oia i ni’a i to’na piiraa i roto i te Pupu no te Tino Ahuru ma Piti Aposetolo, ua faaoti o Elder Gary E. Stevenson e, ta’na taviniraa i roto i te basileia o te Fatu, e ei aposetolo hoa râ, e hau a’e ïa te arata’iraa na roto i te taviniraa i te taviniraa na roto i te arata’iraa.

« Ua faariro Iesu Mesia Ia’na iho ei tavini » te parau ïa a Elder Stevenson i roto i te vauvauraa mana’o i mua i te ve’a i muri a’e i to’na patururaahia. « E faariro ato’a tatou ia tatou iho ei mau tavini » (a hi’o Mareko 10:44).

E mea mana’o-ore-hia te piiraa o Elder Stevenson i roto i te Pupu no te Tino Ahuru ma Piti Aposetolo. Tera râ, ua feruri oia e, ta’na taviniraa i roto i te Ekalesia—i roto ihoa râ i to’na ti’araa ei Hitu Ahuru hui mana faatere rahi mai te 2008 e tae atu i te 2012 e ei Episekopo faatere rahi mai te ava’e mati 2012 mai ra—ua tauturu te reira i te faaineineraa ia’na no ta’na mau hopoi’a apî.

Hoê o te mau ohipa faufaa roa a’e ta’na i apo mai i roto i te taviniraa i te Fatu o te faufaa rahi ïa o te mau tamarii a te Metua i te ao ra. Te tia’i nei Elder Stevenson ma te oaoa i te rahiraa o te mau rave’a e roaa ia’na ei aposetolo, no te apiti atu e no te faaite papû i te mau tamarii a te Atua ati a’e te ao nei.

Te tia’i ato’a nei oia ma te oaoa i te apiti-tamau-raa’tu i te feia e arata’i nei i te Ekalesia a te Fatu. Ua parau oia e, « Ia feruri ana’e au, e parahi au i roto i te apooraa e e apo mai au na roto mai ia [ratou], e e haapiihia na [ratou], e e ite i to ratou puai e i to ratou iteraa papû no ni’a ia Iesu Mesia e To’na Taraehara », ua riro ïa ei ohipa o ta’u e ti’aturi nei e, e riro mai ei iteraa nehenehe ».

Ua fanauhia o Gary E. Stevenson i te 6 no atete 1955, ia Evan N. e ia Vera Jean Stevenson. Ua faaite oia i to’na taamuraa i ni’a i te mau pionie matamua Feia Mo’a i te mau Mahana Hopea nei no Utaha. Ua paari oia i te pae apato’erau no Cache Valley, i Utaha i roto i te hoê utuafare i niuhia i ni’a i te evanelia, i reira ho’i oia i haapii mai ai i te faufaa o te ohipa itoito e i te faufaa o te taviniraa. Ua ani to’na metua tane, « te episekopo o to’u apîraa », ia’na ia haere raua e farerei i te mau vahine ivi e rave rahi e ora ra i roto i ta ratou paroisa. Te mau haapiiraa ta Gary i apo mai na roto mai i to’na metua tane no ni’a i te aupururaa e te taviniraa mai te au i ta te Mesia ra, ua vai papû te reira i roto ia’na e ua tauturu maita’i te reira ia’na i roto i to’na ti’araa ei Episekopo faatere rahi.

Ua parau oia e, « Te mau episekopo o te Ekalesia, to’u mau ïa mau aito ».

Ua haamata papû te ohipa taviniraa a Elder Stevenson i te taime a piihia ai oia ei misionare rave tamau i roto i te misioni no Fukuoka, i te fenua Tapone, i reira to’na haapiiraa i te here rahi i te taata tapone e to ratou reo o ta’na e tamau noa nei â i te paraparau ma te papû. I muri a’e i ta’na misioni, ua haere oia i te fare haapiiraa tuatoru no Utaha, i reira oia i te farereiraa ia Lesa Jean Higley. Ua faaipoipo raua i roto i te hiero no Idaho Falls i te matahiti 1979 e e maha ta raua nau tamaroa. Ua roaa ia Elder Stevenson te parau tu’ite no te faatereraa i te ohipa putu faufaa, e te hoê tuhaa no te tapihooraa. I muri a’e, ua apiti oia i te hoê taata no te haamau e no te faatere ei peresideni e ei raatira ohipa no te hoê o te mau pû hamaniraa e te tapihooraa rahi no te ao nei, no te mau tauhaa faaetaetaraa tino.

Ua ora te utuafare Stevenson e rave rahi matahiti i te fenua tapone. I te matahiti 2004 ua piihia o Elder Stevenson ei peresideni no te misioni no Nagoya i Tapone. I muri a’e i to’na piiraahia i roto i te pupu Hitu Ahuru i te matahiti 2008 ra, ua tavini oia ei tauturu e ei peresideni no te area no Asia Apato’erau. Te tavini ra oia ei peresideni area i te matahiti 2011 a tupu mai ai te hoê aueueraa fenua rahi i te pae apato’erau o te fenua Tapone, tei faatupu mai i te hoê miti faaî rahi tei taparahi pohe e rave rahi tauatini taata. Ua riro taua ohipa ra ei taime taa ê roa i roto i to’na oraraa.

Ua tauturu Elder Stevenson ia faaineine i te pahonoraa a te Ekalesia no te horo’a i te maa, te tauihaa, te patururaa e te tautururaa roa.

« Te reira te hoê faaiteraa no te Ekalesia a Iesu Mesia i te raveraa i te hoê o ta’na mau hopoi’a hanahana no te aupururaa i te feia veve e tei nava’i ore », ta’na ïa faahaamana’oraa. Te parau ra oia e, ua riro ïa ei haamaita’iraa mo’a ia « utuutu, e ia haamaita’i, e ia faanaho i te tauturu ».