Elder Ronald A. Rasband
Pupu no te Tino Ahuru ma Piti Aposetolo
I muri a’e i to Elder Ronald A. Rasband fariiraa i to’na piiraa i roto i te Pupu no te Tino Ahuru ma Piti Aposetolo, ua tai’o oia Ioane 15:16 : « E ere o outou tei hinaaro mai ia’u ; o vau râ tei hinaaro atu ia outou, e ua haapa’o ia outou »
Ua parau Elder Rasband e, « Ua tupu mai te mana’o varua i roto ia’u e, e ere roa’tu teie piiraa i… to’u hinaaro. O te faaotiraa teie a te Fatu ».
I te 19 o to’na matahiti ua haapii a’ena o Elder Rasband i te hoê hapiiraa mai te reira te huru no ni’a i te fahaehaaraa i mua i te mau faaotiraa a te Fatu. Te vai ra to’na hinaaro e tavini i te hoê misioni i te fenua Helemani, mai to’na metua tane e to’na tuaana, tera râ, ua piihia oia e tavini i roto i te misioni i te pae hiti’a o te râ (Marite). Ua hi’o oia i roto i ta’na mau papa’iraa mo’a e ua tai’o i te tuhaa 100 o te Buka Fafau :
« No reira, a pee mai ia’u nei, e a faaroo mai na i te a’oraa ta’u e horoa’tu ia orua na …
« E e haamamahia mai te opani manuia i te mau fenua fatata mai i roto i teie fenua i te hiti’a o te râ nei …
« No reira, oia mau te parau atu nei au ia orua, a faateitei mai na orua i to orua na reo i teie nei feia » (irava 2, 3, 5).
Ua roaa ia’na te iteraa e, ua hinaaro te Fatu ia tavini oia i roto i te misioni no te mau tuhaa fenua hiti’a o te râ.
Ua fanauhia Elder Rasband i te 6 no fepuare 1951, i roto i te hoê oraraa ha’iha’i roa. « Ua fanauhia vau na te hoê taata faahoro pereoo [faraoa] e na te hoê metua vahine here [faaea fare] », ta’na ïa parau. No roto mai oia i te hoê utuafare u’i rau Feia Mo’a i te Mahana Hopea nei, te hoê faufaa ai’a ta’na e poihere nei.
I te matahiti 1973 ua faaipoipo Elder Rasband ia Melanie Twitchell. E 5 ta raua tamarii e e 24 mootua. Ua faaite Elder Rasband e, e 42 matahiti to ta’na vahine tautururaa ia’na ia riro mai oia ei taata mai ia’na te huru i teie mahana. « Ua rave ta’u vahine ia’u mai te araea a te potera, e ua hamani ia’u mai te hoê ohipa faufaa mau … Na to’na huru pae varua i arata’i ia’u eiaha i ni’a noa i teie piiraa nehenehe e te taa ê, i roto ato’a râ i te mau mea ato’a ta’u i rave i te pae varua ».
I te matahiti 1987 ua riro mai o Elder Rasband ei peresideni e ei raatira faatere no te hoê taiete rahi no te ohipa himio na te ara. Ua haapii mai oia na roto mai i to’na mau ti’a faatere nahea ia rave maita’i a’e i te ohipa i roto i te Ekalesia. « Ua haapii mai au i roto i ta’u ohipa e … e mea faufaa a’e te taata i te tahi atu huru mea o ta tatou e nehenehe e rave ». Ua haapii ato’a mai oia « e rave rahi ite no te pae faatereraa … tei tauturu maita’i ia’u ei hui mana faatere rahi ».
Ua rau te mau taime ua ti’a ia Elder Rasband ia faaohipa i te reira mau ite. Ua tavini oia ei episekopo ; ei peresideni misioni ; Hitu Ahuru hui mana faatere rahi mai te ava’e eperera 2000 mai ra : ei taata faatere no te mau tuhaa tooa o te râ, apato’erau tooa o te râ no Marite, e e toru tuhaa no Utaha ; tauturu i roto i te peresideniraa no te Area no Europa Ropu ; ei raatira no te tuhaa faatere o te hiero ; ei melo no te peresideniraa Hitu Ahuru mai te matahiti 2005 mai ; e ei peresideni matahiapo no te Hitu Ahuru mai te ava’e eperera 2009 ra.
Ua horo’a mai to’na mau piiraa i roto i te Ekalesia i te hoê here i te Feia Mo’a i te mau Mahana Hopea nei i te mau vahi ato’a. Te parau nei oia i te mau melo, « Ua faarahi to outou faaroo i to matou faaroo ; ua amui mai to outou iteraa papû i te tahi atu mau mea i to matou nei iteraa papû » (api 90).
Te haehaa nei Elder Rasband ia tavini ei aposetolo na te Fatu ra o Iesu Mesia. « Ua vai noa te hinaaro i roto ia’u ia tavini Ia’na », ta’na ïa parau. « E horo’a vau i to’u taime, to’u tareni, e te mau mea ato’a na’u i teie nei no te toe’a o to’u oraraa. Te fafau nei au ia rave i te reira. Te hanahana nei au ia rave i te reira ».