Faariro i te amuiraa ei tuhaa no to tatou oraraa

A feruri ia faaohipa i te tahi o teie mau ohiparaa e mau uiraa ei reni haamataraa no te hoê tau’araa parau utuafare e aore râ no te tuatapaparaa a te taata iho.

Na te mau tamarii

Api 86 : Ua ani mai te peresideni Thomas S. Monson ia tatou ia riro ei hi’oraa maitai na roto i te peeraa ia Iesu Mesia. Ia pee ana’e tatou Ia’na, e nehenehe ta tatou e riro mai ei maramarama no to te ao nei. Nahea outou e nehenehe ai ia riro ei hi’oraa maitai no to outou utuafare e to outou mau hoa ? E nehenehe ta outou e haamata no roto i te haamauraa i te hoê opuaraa no te rave i te hoê ohipa no te riro rahi atu â mai ia Iesu te huru.
Api 104 : Ua faati’a te peresideni Henry B. Eyring, tauturu piti i roto i te Peresideniraa Matamua, i te hoê aamu no ni’a i to’na metua tane i te imiraa i te fare pureraa i te hoê sabati i to’na haereraa i Auteraria. A imi ai oia, ua pure oia i te amaaraa purumu tata’itahi no te ite mai tei hea pae e haere. Aita i maoro roa, ua faaroo oia te himene e ua papû ia’na e, na te Varua Maitai i tauturu ia’na ia ite i to’na e’a. A feruri i te hoê taime ua farii outou i te Varua Maitai. E aha te mana’o tei tae mai ?
Api 6 : Ua faati’a mai te tuahine Rosemary M. Wixom, peresideni rahi no te Paraimere, ite hoê aamu no te hoê tamahine iti o Amy te i’oa. Ua pure o Amy no te ite e, ua here mau anei te Atua ia’na e tei reira anei Oia no’na. A tai’o e aore râ a faati’a faahou i teie aamu i te utuafare e a tauaparau i te hoê taime a putapû ai outou i te here o te Atua. E aha te mana’o e tae mai no te iteraa e, e tamarii outou na te Atua ? Nahea outou ia tauturu ia vetahi ê ia ite e, e tamarii ratou na te Atua ?
Api 121 : Ua faati’a mai o Elder Allen D. Haynie no te Hitu Ahuru no ni’a i te hoê taime ua eru oia e to’na na tuaane i te hoê apoo rahi tei riro ei apoo pape hopu no ratou. Ua î roa teie mau tamaroa i te vari i te ha’utiraa i roto. Aita te mama ruau o Elder Haynie i faati’a ia’na ia tomo i roto i te fare, e tae roa i te taime a tamâhia ai oia e ua mâ. Eaha ta teie aamu e haapii ra no ni’a i te Taraehara a Iesu Mesia ? No te aha e mea faufaa ia vai mâ noa i mua i te Atua ?

Na te feia apî

Api 83 : Ua parau te peresideni Thomas S. Monson e, e ere te mau faaueraa a te Atua i te mau haafifiraa e mau reni arata’i râ i te oaoa. « Te taata tei rahu ia tatou e o te here maitai nei ia tatou », ua parau oia, « ua ite Oia e, nahea tatou ia ora i to tatou oraraa e ti’a ai ia tatou ia farii i te oaoa rahi a’e e ti’a ia fariihia ». A tamata i te mau parau a te peresideni Monson e a haapa’o i te mau faaueraa a te Fatu. Eiaha e maere ia farii ana’e outou i te tauturu e te paruru no ô mai i te ra’i.
Api 6 : Ia hi’o ana’e tatou ia vetahi ê no to tatou iho faufaa, pinepine tatou i te au ore noa. Ua parau te tuahine Rosemary M. Wixom, peresideni rahi no te Paraimere e, « E ti’a atura ïa ia tatou ia tia’i i te mana’o farii mai ni’a mai, mai [te Fatu] ra, eiaha râ mai roto mai i te ao ati a’e ia tatou e aore râ mai roto mai ia Facebook e te Instagram ». A papa’i i roto i ta outou buka aamu i teie hepetoma no ni’a i to outou natura hanahana e te mau haamaitairaa e tae mai na roto i teie iteraa.
Api 20 : Ua parau te peresideni Dieter F. Uchtdorf, tauturu piti i roto i te Peresideniraa Matamua e « mai te peu te mana’o ra outou e, aita te evanelia e haere maitai ra no outou, te ani manihini nei au ia outou ia ho’i i muri, hi’o i to outou oraraa mai te hoê vahi teitei a’e e faaohie i to outou hi’oraa i te ti’araa pipi. A faatumu i ni’a i te mau haapiiraa tumu, te mau parau tumu e te faaohiparaa tumu i te evanelia ». Mai te peu te tafifi ra outou e ua teimaha roa, a feruri i te mau rave’a o ta outou e nehenehe e faaohie i te oraraa e te haamoriraa evanelia.
Api 65 : Ua faati’a o Elder Neil L. Andersen no te Pupu no te Tino Ahuru ma Piti Aposetolo i te hoê aamu no ni’a i te hoê taure’are’a tamaroa tei hiaai ia tavini i te hoê misioni, inaha râ, te haapii maira oia e, e ti’a ia’na ia aupuru i to’na utuafare. Atira noa’tu, na roto i te mana o te faaroo e te mau haamaitairaa no ô mai i te Fatu ra, ua ti’a i teie taure’are’a ia tavini i te hoê misioni. Nahea tatou ia riro mai mai ia’na te huru e ia haere i mua ma te faaroo, noa’tu te mau tafifiraa i ni’a i to tatou e’a ?
Api 33 : Ua faati’a mai o Elder Larry R. Lawrence no te Hitu Ahuru i te aamu no te hoê misionare tei faaoti i ta’na misioni e tei tafifi haere noa i te rahi o ta’na mau titauraa e tae roa te taime ua faaoti oia e pûpû i te mahana sabati i te taviniraa i te Atua e te tuatapaparaa i te evanelia « Na teie tauiraa ha’iha’i i afa’i mai te hau e te aifaitoraa ta’na e imi ra », ua parau o Elder Lawrence. E aha te ti’a ia outou ia rave no te pûpû maitai a’e i te mahana sabati i te Atua ?

Na te feia paari

Api 86 : Ua faahaamana’o mai te peresideni Thomas S. Monson ia tatou ia riro ei hi’oraa maitai e ei maramarama no to te ao. « A pee ai tatou i te hi’oraa o te Faaora e a ora ai mai Ta’na i ora e mai Ta’na i haapii mai », ua parau te peresideni Monson, « e ama mai teie maramarama i roto ia tatou no te haamaramarama i te e’a o te mau taata ». E aha te mau ohipa ta tatou e ti’a ia rave no te riro ei maramarama rahi a’e o te « anaana … i mua i te hoê ao te haere noa’tura i te pouriraa ».
Ua a’o mai te peresideni Russell M. Nelson, peresideni no te Pupu no te Tino Ahuru Ma Piti Aposetolo e o Elder Jeffrey R. Holland no te Pupu no te Tino Ahuru Ma Piti Aposetolo i te faufaa rahi o te mau vahine e te ti’araa metua vahine. Ua haapii mai o Elder Holland, « Aore e aroha i roto i te oraraa tahuti nei tei piri roa i te aroha mau o Iesu Mesia maori râ te here nounou ore o te hoê metua vahine here no ta’na tamarii » (api 47). Ua haapii mai te peresideni Nelson e, o te mau vahine faafariu maitai, o te haapa’o i ta ratou mau fafauraa, « o te rahi noa te ite-papû-hia… i roto i te hoê ao e ino noa’tura » (api 95). A feruri na roto i te pure i teie mau a’oraa e a aparau nahea te mau melo o te utuafare e nehenehe e turu i te mau vahine i roto i to ratou ti’araa faufaa roa tei horo’ahia mai e te Atua.
E rave rahi mau taata tei a’o mai no ni’a i te puai i roto i te ati. Ua haapii mai o Elder Hugo Montoya no te Hitu Ahuru e, e tae mai te mau tamataraa e te mau faahemaraa i te taata atoa, « e horo’a atoa mai râ te reira i te puai e te tupuraa a manuia noa ai tatou i te upooti’a i te reira » (api 53). A tai’o i ta’na a’oraa e te mau a’oraa a Elder James B. Martino no te Hitu Ahuru (api 58) ; a Elder Koichi Aoyagi, melo hope no te Hitu Ahuru (api 126) ; e a Neill F. Marriott, tauturu piti i roto i te peresideniraa rahi o te Feia Api Tamahine (api 30). A feruri i te mau rave’a no te haapuai i to outou faaroo ia Iesu Mesia, e nahea Oia i te tauturu ia outou i roto i te ati.
Api 33 : I roto i ta’na a’oraa, ua haapii mai o Elder Larry R. Lawrence no te Hitu Ahuru e, « e titau tamau noa te Varua ia tatou ia riro ei mea maitai a’e e ia tamau noa i te haere i mua … Mai te mea e haehaa tatou e e vaiiho tatou ia haapiihia tatou, e rave mai Oia ia tatou na te rima e e arata’i ia tatou i te fare ». I muri iho i to outou tai’oraa i ta’na a’oraa, a imi i te arata’iraa a te Varua no te mau rave’a no te haamaitai atu â e no te taui.
Api 104 : Ua haapii mai te peresideni Henry B. Eyring, tauturu matamua i roto i te Peresideniraa Matamau e, « ia vai noa te Varua i roto ia tatou, maori râ, ia vai noa te arata’iraa a te Varua Maitai i roto i to tatou oraraa i te mau mahana atoa ». A feruri i te mau ohipa ta outou e ti’a ia rave e aore râ, e faaea ia rave, ia vai noa te Varua i roto ia tatou.