Lesu Tale ki na Vakabauta
Mai vei Rosemary M. Wixom
Peresitedi Raraba ni Lalai
E rawa vei keda yadua me da vaqaqacotaka na noda vakabauti Jisu Karisito ena noda dui ilakolako ka kunea na reki.
Ena mataka ni Siganimate oqo Peresitedi Monson, keimami sa vakavinavinaka vakalevu me keimami rogoca na domona na neimami parofita bula. Keimami tugana vakabibi na nomuni vosa, vakakina na nomuni ivakasala ka “Kunea na reki ena ilakolako”1 ka na “Ramase na vunilagi me vaka na nomu vakabauta.”2
Ena yabaki oqo era wasea tiko na gone ena Lalai na nodra reki kei na serau ni nodra vakabauti Jisu Karisito ena nodra lagata na sere “I Know That My Savior Loves Me.” Era lagataka tiko na dina: “Au kila ni bula tiko o Koya! … Na yaloqu au solia Vua.”3 Me vakataki ira na gone ena Lalai, e rawa vei keda yadua me da vaqaqacotaka na noda vakabauti Jisu Karisito ena noda dui ilakolako ka kunea na reki.
Ena dua na soqoni ni Sigatabu ni iSoqosoqo ni Veivukei se qai oti wale toka au a vakarorogo vua e dua na tina gone ni wasea e dua na tiki ni nona ilakolako ni saumaki. A tubu cake ena Lotu, kei rau na itubutubu ka rau vakavulica vua na kosipeli. A lakova na Lalai, Goneyalewa, kei na semineri. E taleitaka me vulica ka kila na dina. Na nona gagadre e veigauna me kila “na vuna”. A kaya o Elder Russell M. Nelson, “Na Turaga e rawa walega ni vakavulica e dua na vakasama dau vakatataro.”4 Ia, na goneyalewa oqo e rawarawa na vakavulica.
Ni oti na vulitorocake a lako ki na dua na univesiti, a vauci ena valetabu vua e dua sa lesu mai na kaulotu, ka vakalougatataki ena so na gone rairai totoka.
Ena yalo ni vakatataro, sa tomana tikoga na tina oqo na taro. Ni sa dredre cake na taro, sa vakakina na kena isau. Ena so na gauna sa sega na kena isau—se na kena isau me kauta mai na vakacegu. Sa qai yaco ni vakasaqara na kena isau, sa votu mai e vuqa tale na taro ka tekivu me taroga eso na yavu saraga ni nona vakabauta.
Ena gauna ni veilecayaki oqo, era kaya eso era volekati koya, “Ravi ga mai ki na noqu vakabauta.” Ia e nanuma vaqo o koya, “E sega ni rawa. O sega ni kila; o sega ni sotava tiko na dredre oqo.” Qai vakamacalataka, “Au sa tuvakarau meu kakua ni veileti kei ira era sega ni vakatitiqa, kevaka era rokovi au.” Ka vuqa vei ira e vakakina.
A kaya o koya, “Erau kila na yaloqu na noqu itubutubu ka rau sega ni vakasosataki au. Erau digitaka me rau lomani au niu tovolea tiko meu walia vakataki au.” E vakatalega kina vei nona bisopi na tina gone oya erau dau sota wasoma ka tukuna tiko vua na nona yalodei ena vukuna.
Era sega talega ni vakataratutu na lewe ni tabanalevu ena nodra solia na loloma, ka vakila o koya na veiciqomi. Era sega talega ni wawa na lewe ni tabanalevu ena kena soli na loloma, ka vakila nona ciqomi. Nona tabanalevu e sega ni vanua era taucoko tu na lewena; ia e vanua a susugi cake kina.
“Sa taleitaki dina,” a nanuma o koya. “Ena gauna oqo au vakila niu semati vakavinaka sara vei ira na tubuqu era sa mate. Era vakayaloqaqataki au ka vakauqeti au meu tovolea tikoga. Au vakila ni ra kaya tiko, ‘Vakanamata ga ki na veika o kila.’”
E dina ni vakaitamera na nona ivakarau ni veitokoni, a yaco me luluqa. E kaya o koya, “au sega ni wasei au tani mai na Lotu ena vuku ni itovo ca, sega ni kauwaitaka na veika vakayalo, vaqara iulubale me kua ni muri kina na ivunau, se vaqara e dua na sala rawarawa i tuba. Au vakila niu gadreva na isau ni taro ‘Na cava sara mada au vakabauta?’”
Ena gauna qo a wilika kina e dua na ivola a vola o Mother Teresa, o koya a wasea na vakanananu vata oya. Ena dua na ivola ena 1953, a vola kina o Mother Teresa: “Yalovinaka ni masulaki au meu kakua ni vakacacana na Nona cakacaka me vakaraitaki Koya mai na noda Turaga—ni tu e lomaqu e dua na butobuto vakarerevaki, e vaka ni a mate na ka kecega. Sa vaka tu oqo me tekivu mai na gauna au tekivuna kina ‘na cakacaka.’ Kerea vua na Noda Turaga me solia mai vei au na yaloqaqa.”
A sauma o Archbishop Périer: “Me tuberi iko na Kalou, Mother lomani; e sega soti ni o tu ena butobuto sara me vaka o nanuma. Ena sega beka ni matata sara ena dua ga na gauna na sala me muri. Masuta na rarama; kakua ni vakatulewa vakatotolo, vakarorogo ki na veika era na tukuna eso tale, vakasamataka na vuna era tukuna kina. O na dau kunea e dua na ka me vukei iko. … Tuberi ena vakabauta ena masu kei na kena inaki dodonu sa rauta vinaka oya.”5
E nanuma na noqu itokani kevaka me rawa ni bulataka o Mother Teresa na nona lotu ka sega na kena isau kece ka sega ni nanumi me matata vinaka na veika kece, de na rawa talega vua. Sa rawa vua me cavuta e dua na ikalawa rawarawa ki liu ena vakabauta—oti qai dua tale. Sa rawa ni vakanamata ki na dina e vakabauta ka laiva me vakasinaita na nona vakasama kei na yalona.
Ni vakasamataka lesu, e kaya o koya, “Na noqu ivakadinadina sa yaco me vaka e dua na ibinibini dravusa. Sa kama oti taucoko. Sa qai vo ga o Jisu Karisito.” E tomana, “Ia e sega ni laivi iko ni tu nomu lomatarotaro. Ni dua e tovolea me muria na ivunau, sa tadola tu na katuba. Sa yaco me bibi sara vakalevu na masu kei na vuli ivolanikalou.”
Na imatai ni nona ikalawa me taracake tale nona vakabauta me tekivu ga ena dina taumada ni kosipeli. A volia e dua na ivolanisere ni Lalai ka tekivu wilika na qaqa ni sere. Sa yaco me ra iyautalei vua. A masulaka na vakabauta me laveti tani kina na bibi e vakila tu.
A vulica ni ena gauna e sotava kina e dua na malanivosa e vakavuna na nona vakatitiqa, sa “rawa ni cegu, raica na taucoko ni yaloyalo, ka vakaitaukeitaka na kosipeli.” E kaya o koya, “Au na taroga, ‘Qo beka na sala dodonu vei au kei na noqu matavuvale?’ So na gauna au na tarogi au, ‘Na cava au vinakata me baleti ira na luvequ?’ Au qai kila niu vinakata me ra vakamau ena valetabu. Oqori na gauna e suka mai kina na vakabauta ki yaloqu.”
A kaya o Elder Jeffrey R. Holland, “Na yalomalua, na vakabauta, kei na veivakauqeti ni Yalo Tabu [ena dau] gadrevi tu ga ena veigauna kece e segati kina na dina.”6
E dina ni tu nona lomatarotaro me baleta na kena yaco mai na iVola i Momani, a sega ni rawa ni cakitaka na dina e kila mai na iVola i Momani. Sa vakanamata ena kena vulici na Veiyalayalati Vou me kila vakavinaka cake kina na iVakabula. “Ia a yaco,” ni qai kaya, “Au a kunei au lesu tale ena iVola i Momani baleta niu a taleitaka na veika au a vakila niu wilika tiko me baleti Jisu Karisito kei na Nona Veisorovaki.”
A tinia o koya, “Mo rawata eso na nomu gauna vakayalo vakataki iko kei na dina era tu ena ivola oya,” ka sa rawata tiko o koya. A vakamacalataka, “Au wiliwili ena Mosaia ka taucoko sara na noqu dusimaki. ‘Vakabauta na Kalou; vakabauta ni sai koya, ka ni bulia na ka kecega… ; vakabauta ni tu vua na yalomatua kecega, kei na kaukauwa kecega, mai lomalagi kei vuravura; vakabauta ni tamata ena sega ni vakasamataka rawa na veika kece e rawa ni vakasamataka na Turaga.’7”
Ena gauna oya sa yaco mai na veikacivi me veiqaravi vakadautaba piano ena Lalai. “E totoka,” e kaya o koya. “Au vinakata me ra tiko na luvequ ena Lalai, oqo sa rawa niu tiko vata kei ira. Kau se bera ni vakarau meu veivakavulici.” Ni veiqaravi, sa tekivu me vakila na ivakarau ni vakasama mai vei ira era wavoliti koya: “Lako mai, keimami vinakati iko se itagede cava ga o tu kina, keimami na sotavi iko kina. Solia mai vei keimami na cava ga e tu vei iko.”
Ni dau tabaka na sere ni Lalai, dau vakasamataka: “Oqo na dina au dau taleitaka. Se rawa tikoga niu wasea na ivakadinadina. Au na kaya ga na veika au kila ka vakabauta. Ena sega beka ni cauraki ni kilaka, ia ena noqu cau. Na veika au vakanamata kina sa tubu e lomaqu. Sa ka totoka me da lesu tale ki na mana ni kosipeli ka vakila na kena matata.”
Ena mataka ni Sigatabu oya, niu vakarogoca toka na goneyalewa gone oqo ni wasea na italanoa ni nona ilakolako, qai vakananumi vei au ni dodonu me da tara na noda yavu ena “uluvatu ni noda iVakabula.”8 A vakananumi talega vei au na ivakasala nei Elder Jeffrey R. Holland: “Taura matua na veika o sa kila oti tu ka tudei ka kaukauwa me yacova ni sa yaco mai na ikuri ni kilaka.”9
Ena gauna ni nona lesoni, sa yaco meu kila vakavinaka cake ni sa dau yaco mai na isau ni noda taro yalodina ni da vakasaqara vagumatua kei na noda bulataka na ivunau. A vakananumi tale vei au ni rawa ni sivia yani na iyalayala ni ivakamacala kecega ena gauna oqo na noda vakabauta.
Ia, isa! Sa dua na ka noqu vinakata meu vakataki ira era vakavolivolita na tina gone oqo, nodra lomana ka tokona. Me vaka e tukuna o Peresitedi Dieter F. Uchtdorf: “Eda sa dau veivakararamataki kecega ka vakasaqara voli na rarama ni Kalou ni da lakova na sala vakatisaipeli. Eda sega ni veivakacacani vei ira na tani ena vuku ni rarawa e tu vei ira se sega ni tu vei ira; ia, eda vakamareqeta ka vakayaloqaqataka na rarama kecega me yacova ni sa qai makare cake, ramase, ka dina.”10
Ni ra lagata na gone ena Lalai “Masu ni Dua na Gone [A Child’s Prayer],” era na taroga: “Tamaqu mai lagi, o tiko li qori, [Heavenly Father, are you really there]? O dau rogoca li na masu na masu ni gone kece sara?”11
O keda talega eda na vakataroga beka, “E tiko dina beka na Tamada Vakalomalagi?” me da reki ga—me vaka na noqu itokani—ni yaco mai na kena isau ena veivakadeitaki malumu ka rawarawa. Au vakadinadinataka ni na yaco mai na veivakadeitaki rawarawa ni sa yaco me noda na Lomana. Au vakadinadinataka ni sa tu e vuravura nikua na dina ka kunei na Nona kosipeli ena Lotu i Jisu Karisito ni Yalododonu Edaidai. Ena yaca i Jisu Karisito, emeni.