Veiqaravi ni Mataveilawa

Na cava era sa cakava tiko na Yalododonu Edaidai me vakavinakataki kina na vanua era tiko kina? Raica ni o lako ki na MormonNewsroom.org. Oqo eso na ivakaraitaki mai na veika se qai taba wale toka ga ena mataveilawa ni Newsroom.

Niu Siladi kei Vanuatu

Ni ravuta na matanitu yanuyanu lailai ena Pasifika, o Vanuatu, na Cava o Pam, era vakasokumuni vata na Yalododonu Edaidai mai Okaladi, Niu Siladi—kei na veivuke mai na Tabana ni Veiqaravi Raraba ena Lotu—me ra vukei ira era sa vakaleqai tu ena vuku ni cava. Era vakatawana e 2,000 na kateni kakana me ra vukea na kena levu ga ni lewenivanua e rawa. Era tawa ena koniteina yadua na falawa, raisi, vuanikau tawaikava, bini, tini bulumakau, tini ika, bisikete, vuanikau mamaca, noodles, sucu pauta jokeliti, kei na idola ni tini. E rawa talega ni vakayagataki ena so tale na ka na koniteina, me vaka na tawa wai.

Dominican Republic kei Canada

Mai Dominican Republic kei Kenada, era duavata na marama Yalododonu Edaidai ena kena vakananumi na Siga ni Marama e Vuravura Taucoko, e dua na soqo e vakailavotaka na Veimatanitu Cokovata. E sivia ni 1,200 na marama era soqovata yani ki na veivalenilotu ena vica na vanua mai na Dominican Republic me ra vakarokorokotaki kina na marama ena nodra cau e vuravura. Era vakaitavi ena soqo na iliuliu vakalotu, vakamatanitu, kei na iliuliu vakaivalu, ka okati kina e dua na parokaramu ni sere kei na ivakatagi kei na vosa. Mai Kenada, era vakananuma talega na siga oya na marama ena nodra wasea na itukutuku me baleta na iSoqosoqo ni Veivukei, ka ra raica ni sa dua na “waqa uasivi ni veiqaravi e vuravura taucoko.”

Peritania

Na nodra takete taumada me ra cula e 100 na ivinivo me baleti ira na gone era vakaleqai tu mai Aferika, ia ni ra sa oti, era sa cula rawa na marama ena Tabanalevu o Coventry mai Igiladi e sivia ni 230. Na ivinivo rawarawa, ka caka mai na waqa ni lokoloko, e rawarawa me da vakaotia. E dua na marama, ka se bera mada vakadua ni culacula, a rawata e tolu.

Arkansas, Amerika

E sivia na 600 na tamata era a tiko ena dua na lotu vakaitikotiko ni veimatalotu ena ulutaga ni galala vakalotu ka ratou a cicivaka na iteki na Little Rock Arkansas, oka kina o ira na mata mai na Katolika, Wesele, kei na veitikotiko vaka-Musulomani kei na dua na daukakaburaki Vakalotu ena retio. Na soqo ni veimatalotu oqo a okati kina e dua na itukutuku katoni ena vidio mai vua na turaganivalu kovana ni yasana kei na isogo masu mai vua e dua na seneta ni yasana, ka rau lotu Papitaiso ruarua. Era tukuna o ira na cicivaka, ni soqo oqo a “tara eso na isema ni veiciqomi.”