Kacivaki e Tolu na Valetabu Vou
Sa nakiti na valetabu me baleti Port-au-Prince, Haiti; Abidjan, Ivory Coast; kei Bangkok, Thailand, a kacivaka o Peresitedi Thomas S. Monson ena soqoni ena mataka ni Sigatabu ni koniferedi raraba. Ena veivanua oqori, oqo na imatai ni valetabu me tara kina. Na tikiniqele sara ga me tara kina na valetabu ena qai kacivaki malua.
“Eso na veivakalougatataki vakasakiti sa waraki ira tu na noda lewenilotu yalodina ena veivanua oqo, io, sa dina sara, ena veivanua kecega sa tu kina na valetabu e vuravura taucoko,” e kaya o Peresitedi Monson.
Valetabu e Port-au-Prince Haiti
O Haiti e nodra itikotiko e sivia ni 20,000 na Yalododonu Edaidai ena dua na matanitu ka rauta vakacaca ni 10 na milioni na lewena. A tekivu na cakacaka ni kaulotu vakadonui ena 1980. Na valetabu voleka duadua kina na valetabu mai Santo Domingo Dominican Republic. E dina ni rau toka vata ga ena dua na yanuyanu, na valetabu oya e voleka ni dua taucoko na siga na kena lakovi.
Valetabu e Abidjan Ivory Coast
O Ivory Coast (Côte d’Ivoire) e nodra itikotiko e sivia ni 27,000 na lewe ni Lotu ena dua na matanitu rauta vakacaca ni 20 na milioni na lewena. A tekivu na cakacaka ni kaulotu vakadonui ena 1988. Na valetabu voleka duadua kina na Valetabu e Accra Ghana, ka 340 na maile (550 km) na kena yawa.
Valetabu e Bangkok Thailand
O Thailand e nodra itikotiko rauta ni 19,000 na Yalododonu Edaidai ena dua na vanua ka rauta vakacaca ni 67 na milioni na lewena. A tauyavutaki na Lotu mai Thailand ena 1966. Na Valetabu mai Bangkok Thailand ena qaravi ira na Yalododonu Edaidai e Thailand, ka vakakina ena Cevaicake kei Esia taucoko. Ena gauna oqo, na valetabu voleka duadua i Thailand na Valetabu mai Hong Kong China, sivia e 1,000 na maile (1,610 km) na kena yawa.
iKuri ni iTukutuku ni Valetabu
Sa kacivaki oti na vale dolararaba, na soqo ni marau ni itovo vakavanua, kei na siga me dolavi kina e lima na valetabu ena 2015 mai Cordoba, Argentina; Payson, Utah, Amerika; Trujillo, Peru; Indianapolis, Indiana, Amerika; kei Tijuana, Mexico. Sa na vakatabui tale na Valetabu vakavoui e Mexico City Mexico ena 2015.
Ena rua na yabaki sa oti sa vagoleya tiko kina vakatabakidua na nona igu na Lotu ena kena vakacavari na valetabu eso sa kacivaki oti. Me ikuri ni 3 na valetabu vou, sa vakayagataki tiko ena gauna oqo e 144 na valetabu, e 5 sa vakavoui, 13 e tara tiko, ka 13 sa kacivaki oti ka vakayacori tiko na kena vakavakarau ni bera ni tekivu tara.