Stephen W. Owen

Peresitedi Raraba ni Cauravou

Ni yabaki 14 tiko o Stephen W. Owen, dau saumi koya na nodratou neiba me kotico ena nodratou lomanibai levu ka wereca na nona iteitei e veimacawa. “Dau taura e tolu na siga meu kotiva na lomanibai oya,” e kaya ena matadredredre o Baraca Owen, ka a tokoni ena 4 ni Epereli, 2015, me peresitedi raraba ni Cauravou.

Ni sa oti nona cakacaka na gonetagane o Stephen, a kerei koya na nona itaukei ni cakacaka yalomatua me rau taubale wavoki ena loma ni iteitei, me rawa ni dusia vua eso na co ca ka sega ni wereci.

“E tukuna vei au ni dodonu meu dau cavuta na co ca kece,” e kaya o koya. “Oya na imatai ni noqu cakacaka ka vukei au meu kila na kena ibalebale na qaravitavi.”

A vulica ena yabaki oya o Baraca Owen na lesoni eso ka sivia sara na sasamaki ena lomanibai kei na were. Matai, a kila na vakacegu e dau kunei ni da cakava na veika dredre ena kena ivakarau dodonu. A vulica talega na kedra bibi na dauvakasala.

E namaka mai vei Stephen na nona neiba na vinaka duadua. “E vaka ni kaya tiko vei au, ‘Au kila tu na vanua o rawa ni yacova, kau vinakata meu vukei iko.’”

Na cauravou yadua ena Lotu, e tomana o koya, era gadreva na dauveivakasalataki vakaoya me vukei koya ni yacova na itagede ni matabete vinaka duadua e rawa ni yacova. “Au dau lomani ira vakalevu na itabagone,” e kaya o koya. “Au lomani ira kau kila ni oqo na gauna bibi sara me virikotori kina na ivakarau me baleta na vo ni nodra bula.”

A veiqaravi o Baraca Owen ena Tabana ni Kaulotu na Texas San Antonio ka qai veiqaravi e muri vaka iLiuliu ni Sikauti, peresitedi ni Cauravou, bisopi, matabose e cake, ka peresitedi ni iteki.

A vakatulewa tale ga na kai Holladay, Utah, ena tabana ni kaulotu mai California Arcadia mai na 2005 ki na 2008, ka a veiqaravi kina kei na watina, o Jane Stringham Owen. Erau a vakamau ena 28 ni Tiseba, 1979, ena Valetabu e Provo Utah. E lima na luvedrau.

A sucu o koya ena 22 ni Maji, 1958, mai Salt Lake City, Utah, vei rau o Gordon kei Carolyn Owen. A taurivola mai na University of Utah ena dua na diqiri ni veika vakailavo ka sa peresitedi tiko oqo ni Great Harvest Bread Company mai Provo, Utah.