Na iVakatagi ni Kosipeli
Mai vei Elder Wilford W. Andersen
Ena Vitusagavulu
Na ivakatagi ni kosipeli sa ikoya na ka vakilai rekitaki vakayalo e vakavurea na Yalo Tabu. E kauta mai e dua na veisau ni yalo.
Ena vica na yabaki sa oti au a vakarorogo ki na dua na veivakatarogi ena retio me baleta e dua na vuniwai gone ka a cakacaka ena dua na valenibula ena vanua vaka-Navajo. A tukuna okoya e dua na ka a sotakaya ena bogi a curuma yani kina na rumu ni leqa tubukoso e dua na turaga qase iTaukei kei-Amerika ka ulu balavu tali tu. A taura na nona faile ni volavola na vuniwai gone, torova yani na turaga, ka kaya, “Au na rawa beka ni vukei kemuni vakacava?” A rai ga vakadodonu ki liu o naqase ka galu voli. O vuniwai, ni vaka me sa votivoti mai, a tovolea tale. “Au na sega ni rawa ni vukei iko kevaka o sega ni vosa vei au,” a kaya okoya. “Tukuna vei au na vuna o lako mai kina ki valenibula.”
A qai raici koya o naqase ka kaya, “O dau danisi?” Ni vakasamataka toka vagumatua o vuniwai na taro matalia oya, a votu mai vua de na rairai o la qo e sa dua na turaga kilawainimate vakavanua ka, ena kena itovo vakavanua makawa sara, dau qara me vakabulai ira na tauvimate mai na sere kei na danisi ka sega ena wainimate sa navuci.
“Sega,” a kaya na vuniwai, “au sega ni dau danisi. O dau danisi?” A vakaio ena deguvacu o naqase. A qai taroga o vuniwai, “O rawa beka ni vakatavulici au ena danisi?”
Na nona sauma lesu na taro o naqase e sa vakavuna na noqu raitayaloyalo vakalevu ena vuqa na yabaki. “Au rawa ni vakatavulici iko ena danisi,” a kaya okoya, “ia sa dodonu mo na rogoca na ivakatagi.”
So na gauna ena noda itikotiko, eda vakatavulica vakavinaka sara na ikalawa eso ni danisi ia ka sega ni rawaka vinaka sara ena nodra vukei na lewe ni noda matavuvale mera rogoca na ivakatagi. Ia me vaka e kila vinaka tu na qase ni wainimate, sa ka dredre na danisi ke sega na ivakatagi. Na danisi voli ni sega na ivakatagi e sa sabalia ka tawaveivakacegui—ka vakamadua saraga. O sa bau tovolea mada?
Ena wase 8 ena Vunau kei na Veiyalayalati, a vakatavulici Josefa Simici kei Oliva Kauderi na Turaga, “Raica ena vakatakila vei iko na Yalo Tabu, io ena lako yani vei iko ko koya ka tukutuku sara ki lomamu” (tikina 2). Eda vulica na ikalawa ni danisi ena noda vakasama, ia eda rogoca na ivakatagi ena lomada. Na ikalawa ni danisi eso ni kosipeli sa veika eda cakava; na ivakatagi ni kosipeli sa ikoya na ka vakilai rekitaki vakayalo e vakavurea na Yalo Tabu. E kauta mai na veisau ni yalo ka sa ivurevure ni gagadre donu kecega. Na veikalawa ni danisi e gadreva na ivakarau matau, ia na rekitaki ni danisi ena vakadinadinataki duadua ga ni da sa rogoca rawa na ivakatagi.
Sa tiko eso ka vakalewai ira na lewe ni Lotu ena veika eda cakava. Oya sa kilai tu vakamatata. O ira na dau danisi era dau rairai duatani se sabalia ena levu na gauna se, me vakayagataki e dua na vosa vakaivolanikalou, “matalia” (1 Pita 2:9) kivei ira era sega ni rawa ni rogoca na ivakatagi. O sa bau vakelea mada na nomu motoka ena dua na cina-tuvakadua ka tikiva na motoka e danisi ka lagasere voli na kena draiva ena domona kece sara—ia o sega ni rogoca e dua na rorogo baleta ni sogo tu na nomu katubaleka? A sega li ni rairai matalia vakalailai okoya? Kevaka era vulica na luveda na ikalawa eso ni danisi ka sega mada ni vulica mera rogoca ka vakila na ivakatagi totoka ni kosipeli, ena yaco na gauna mera na veilecayaki vata na danisi ka ra na vakasuka se, via leqa vata ga, danisi voli ga me baleta na veivakatotogani era vakila mai vei ira tale eso ka danisi wavoliti ira tiko.
Na bolebole kivei keda kece sara ka sasagataka me vakatavulica na kosipeli oya me na vakarabailevutaki na lewenivuli mai na ikalawa eso ga ni danisi. Na nodra bula marau na luveda e sa vakatau ki na nodra guta mera rogoca ka taleitaka na ivakatagi totoka ni kosipeli. Me da cakava li vakacava?
iMatai, sa dodonu me veidonui tiko na noda bula vakaikeda ki na itoqa dodonu vakayalo. iMuri ena veigauna makawa, ni bera na gauna ni veigacagaca vakalivaliva, eda a kunea na noda siteseni ni retio taleitaki ena kena moici vakamatau na iwiri ni retio me yacova ni sa veidonui vinaka saraga vata na itoqa ni siteseni. Ni da torova na matanifika, eda rawa ni rogoca ga na sosa. Ia na gauna eda sa mai veidonui vakavinaka kina, sa rawa ni rogoci vakamatata na noda ivakatagi taleitaki. Ena noda bula, sa dodonu meda vagolei keda ki na itoqa dodonu me rawa ni da rogoca na ivakatagi ni Yalotabu.
Ni da ciqoma na isolisoli ni Yalo Tabu ni oti na papitaiso, eda sa vakatawani ena ivakatagi vakalomalagi e tokona na saumaki. Sa veisau na lomada, ka da sa “biuta tani na gagadre ca, ka via kitaka tikoga na ivalavala dodonu” (Mosaia 5:2). Ia na Yalotabu ena sega ni vosota na tawaloloma se dokadoka se cudrucudru. Kevaka eda vakayalia na veivakayarayarataki momona oya ena noda bula, na veitamela vutuniyau ni kosipeli sa rawa ni mai veivakasosataki vakatotolo ka na rawa ni vagalui sara. A taroga o Alama na taro mosimosi: “Kevaka dou sa rekitaka na loloma dou sa vakabulai kina, a cava dou sa nanuma ena gauna oqo?” (Alama 5:26).
Kemuni na itubutubu, kevaka e sega ni veidonui tiko na noda bula vata kei na ivakatagi ni kosipeli, sa yaga meda vakadodonutaka. Me vaka a vakatavulica vei keda o Peresitedi Thomas S. Monson ena Okotova sa oti, sa dodonu meda lewa deivaki na ilakolako ni yavada (raica na “Mo Lewa Deivaki na iLakolako ni Yavamu,” Liaona, Nove. 2014, 86–88). Eda sa kila na kena icakacaka. Sa dodonu meda lako ena salatu vata ga eda a lakova ni da rogoca ena imatai ni gauna na voqa vakalomalagi ni vakatagi ni kosipeli. Eda cakacakataka na vakabauta kivei Karisito, veivutuni, ka taura na sakaramede; eda vakila vaqaqaco cake na veivakayarayarataki ni Yalo Tabu; ka sa tekivu vakatagitaki tale na ivakatagi ni kosipeli ena noda bula.
iKarua, ni da rogoca rawa vakatakikeda na ivakatagi, sa dodonu meda tovolea ena noda igu ni vakayacora ena noda itikotiko. E sa sega ni ka me na rawa ni togoraki se vakatanitaki. “Raica sa sega sara ni kilikili me vakayacori na cakacaka vakabete ena ivakarau kaukauwa se vakasaurara”—se mai na itavi vakatama se tina se na ka levu duadua se rorogo levu duadua—“ia me vakayacori ga ena veivakauqeti, na vosota vakadede, na yalomalua, na yalomalumalumu, … kei na loloma e sega ni veivakaisini; [kei] na yalo e veidokai” (V&V 121:41–42).
Cava na vuna e muataka kina na vakalevutaki ni kaukauwa kei na veivakayarayarataki ena dua na itikotiko na ivakarau ni bula eso oqo? Baleta ni ra sa ivakarau ni bula e sureta na Yalo ni Yalo Tabu. Sai ira na ivakarau ni bula e vakarogoya na lomada ki na ivakatagi ni kosipeli. Ni ra sa tiko rawa, sa na vakayacori cake ena kena ivalavala saraga ka rekitaki sara na veikalawa ni danisi mai vei ira taucoko na daudanisi ena matavuvale, ka sega ni gadrevi kina na veivakarerei se veivakasewasewani se veivakasaurarataki.
Ni ra se lalai na luveda, sa rawa ni da lagata vei ira na sere ni gone ni loloma e sega ni veivakaisini, ia ni ra sa vakaduiduile ka cata mera laki moce ena bogi, sa na gadrevi meda lagata na sere ni gone ni vosota vakadede. Ni ra sa qase cake, sa rawa ni da lecava na karakaraivasa ni veiba kei na veivakarerei ka mai vakayacora yani na ivakatagi totoka ni veivakauqeti—ka lagata rawa na ikarua ni qaqa ni sere ni gone ni vosota vakadede. E rawa ni ra vakayacora vakamaqosa sara na itubutubu na ivakarau ni bula veivakauqeti ni yalomalua kei na yalomalumalumu. Sa rawa ni da sureti ira na luveda mera laga vakatautauvata kei keda ni da vakatovotovotaka na yalokauwai kivua e dua na wekada e vakaleqai tu.
Ena sega ni lako taucoko mai ena dua na gauna. Me vaka era kila tu na daunivakatagi rogo kece sara, ena taura na vakatovotovo gugumatua me qaravi kina na ivakatagi totoka. Kevaka e rairai rogo vakatani na sasaga kusarawa ni qaravi vakatagi, nanuma na duidui e sega ni rawa ni vakadodonutaki mai na veivakasewasewani. Na duidui ena itikotiko e sa vaka na butobuto ena dua na rumu. E sega ni rawata e dua na ka me vakasava na butobuto. Sa dodonu meda kauta laivi na butobuto ena vakatakilai ni rarama.
Ia kevaka e sa rui rogo levu se vakasausa na rorogo bi eso ena nomudou matasere vakamatavuvale, se rogo mamada se rogo gata vakalailai na iwase ni wa ni vakatagi ni nomudou matavuvale, se ra rogo vakatani se lako vakatani na rorogo rerevaki ni fuluti, vosota no. Kevaka o sega ni rogoca tiko na ivakatagi ni kosipeli ena nomu itikotiko, yalovinaka nanuma na vosa e rua oqo: vakatovolea tikoga. Ena veivuke ni Kalou, ena basika mai na siga ena vakatawana na nomu itikotiko na ivakatagi ni kosipeli ena reki tawatukuni rawa.
Ni qaravi vinaka sara madaga, na ivakatagi ena sega ni walia taucoko na noda leqa. Ena tiko ga na rorogo levu kei na rorogo lailai ena noda bula, na rorogo ni cacavukavuka kei na veisemai malumu. Sa vaka tu kina na ituvaki ni bula ena vuravura oqo.
Ia ni da vakuria na ivakatagi ki na veikalawa ni danisi, na ikabakaba dredre ni vakawati kei na bula vakamatavuvale eso sa vaka me torova yani e dua na veivakaduavatataki rogo malumu. Na noda veibolebole dredre sara madaga ena vakuria na rorogo vutuniyau matau kei na italetale veirawai eso. Sa na tekivu me yaco vei keda na veivakalougatataki ni ilesilesi vakabete me vaka na tegu sa lutu mai lagi. Ena sala vata voli ga kei keda na Yalo Tabu, ia na noda ititoko—e dua na veivakatauvatani matata ki na kaukauwa kei na veivakayarayarataki—sa ititoko ni yalododonu kei na dina sa dei sara. Raica na noda lewa sa lewa e sega ni mudu. Ia kevaka sa sega ni taurivaki vakatani sa na tudei tu ga me tawamudu (raica na V&V 121:45–46).
Me sa na vakakina ena noda dui bula yadua kei na noda itikotiko talega sa noqu masu ena yaca i Jisu Karisito, emeni.