Kamwaingan Bwaibu n Teboaroka ni Kaau aika Bokaboka
E maeka te tia korokaraki i Utah, USA.
I aki tangiria ni kamwainga teuana riki te bwaibu n teboaroka.
Kamatata n te korotamnei iroun Jake Parker
“Ko rabwa, Bitiobi Rowley. Ti kukurei n ibuobuoki.” E anaa te beeba mai bain te bitiobi te Tari Hulet, ara aetuwaitia n te kooram n riikan, ao e katanoata, “Iai au beeba n ara ibukiia taan anganano n ana tabo ni man te Ekaretia. I kakoaua bwa e na bon kukurei te Uea ngkana ti ibuobuoki ngaira aikai ni kabane n te wiiki aei.”
“Te aeka n ibuobuoki tera?” I titiraki ma te taratararaoi. Iangoakin ana tabo ni man te Ekaretia aei kanga e aki taraa ni kakukurei.
“Bon tii kamwaingan bwaibu n teboaroka mwiokoara n te wiiki aei.”
Kamwaingan te bwaibu! E kaonaki nanou n taeka aikai ma te maaku. E oki au iango nakon tabeua namwakaina ake mai mwaaina ngke e imanonoai tinau bwa N na karekea au mwakuri n tain te tiamwa. N ara kaawa ae uarereke, e nanonaki anne bwa te bwai ae ti teuana—kamwaingan te bwaibu. Ngaia are ni kabanea tain te tiamwa, Ngai ma ai tariu ae Scott ti kamwaing taian bwaibu.
Ni moanibongin ara mwakuri n te tiamwa, ti tei n tarataranako riaon aon te aba ae totoakaei ae mwaiti te ruku iaona ae kiriin. Bwaibu aika 40 te buuti anauia (12 miita) a nim n te rain ae eti are e tikinako tabeua te kiromiita abwakina. Imwiin te kataneiai ae kimototo, Ngai ma Scott ti kamaenakoi ara moan bwaibu. E tabekarake tabon ana bwaibu Scott, ao a teberaki aon au kau n teeneti n te ran ae mwaitoro. Ti tabekarake te bwaibu rinanon te bokaboka ae kanimnim ao ni manga tomaia ma te toma ni bwaibu are imwiina. Ngke ti okira te bwaibu are imwiina, au kau ake a mara a tinebu riki ni matentenin te bokaboka are e aki toki iaoia. Akea bwa, te bokaboka, te ran, ma maonora a karotoi kunnikaira ao ni karika rawawatara riki iai.
E oki au iango nakon te anganano n ana tabo ni man te Ekaretia. “Eng, I—I taku bwa I aki kona n roko,” E baebae au taeka. “I riai ni kaea oin au mwakuri ni katoa moan ingabong.”
“Akea te kaangaanga n anne,” e kamatoa te Tari Hulet. “Ti aki toki n nanako nakon ana tabo ni man te Ekaretia ni bwakantaai koraki.” E kabuta te beeba ni koroara te Tari Hulet. “Ngke kam katabuaki n tatabemaningkami nakon te nakoanibonga, kam anganaki te mwaaka ni mwakuri n aran te Atua. Ao ngkana ti beku ibukina ma ni buokakiia tabeman, ti mwakuri inanon arana. Irarikina, n ara ibuobuoki ngaira ni kabane, e na bon aki taraa n rawawata te mwakuri naba teutana.”
E a kabutaki te beeba ni koroara nakoiu. I aki kona ni kakoaua anne, bwa ni karokoa te tai aei, a bane ni koroi araia te koraki bwa a na nanako ni katoa bong n te wiiki aei. A aki ataia bwa kananokaawakira te bwai ae nang riki? I namakina korakoran raoiroia rorou ni kairake ni mwakuri iaou. Ma te nano n aki kukurei, I korea arau ao ni kabutaa nako te beeba
Ni bwakantaain te Moanibong, I tekateka inanon au ruu ni katoka kuau imwin te mwakuri ngke e moan ingabong ngke I a ongo naba tangin ana bu te Tari Hulet mai tinaniku. I tei inanon teutana te tai imwaain are I oneai nakon au kunnikai aika boiboi, ma ni waraku.
E aki maan ao ti a rinrake nako nanon ana tabo ni man te Ekaretia. A bane ni kawaekoaiia aomata nakon te tawana ma I aki ngai. I kakaraurau n ririmwi, I babaraaki, I bubutibooroi atiibu, ngke I a tounako naba n te bai ae toka i aon angau. “Ko rabwa ngkai ko kona n iriira,” E kaungaai te Tari Hulet. “I ataia bwa ko mwakuri korakora n te moaningabong aei.” Ti uaia n nakonako n aki ngoongo inanon teutana te tai. Imwiina e a biri rimoa bwa e na bairea te kurubu
I tataraia ao n iangoa te bwai are e taekinna nakoiu. I a tia n rang ni mwakuri korakora n te ingabong anne. I kua ao I boiboi, ao I tangiria n okira mweengau. Ma e kanga aron te Tari Hulet? E a tia n rang ni mwakuri korakora naba n te ingabong anne. Ai aroia naba ataeinimwaane ni kabane, ibukin anne. Ngaia are bukin tera ngkai a taraa ni kukurei ngkai a mena ikai?
I a roko irarikiia ake tabeman, ao ti a moana ara mwakuri. N te moantai, I kataia ni kakukureiai n iangoan te anganano ni karinerine are I karaoia. Ma e aki maan ao e a toki au iango n tiorobeke, ao I nooria bwa ai bon baitiira kakamwakurira n ara ibuobuoki iroura ni kabane. Ti ngarengare ao ti kakaraki, ao n te tai ae waekoa I nooria bwa I a bon rang ni kukurei! Inanon tabeua te aoa e a tia raoi mwiokoara.
Ngke ti buti nakon mweengara, I nooria bwa te bwai are I taku bwa e na riki bwa te anganano ae rawawata e a taraa ni bebete arona. Ni koauana, n ara ibuobuoki ni kabane, e taraa n ae tiaki te karawawata teutana.
E katea ana kaa te Tari Hulet imoan ara auti ao e taraai. “Ko rabwa ibukin am ibuobuoki n te bong aei. Am mwakuri korakora e kabebetei uotara ngaira ni kabane.” E wingare ao e kakeea matana.
I wingare nakoina. “Ko rabwa, ma ti boni bane n ibuobuoki ngaira ni kabane are e a kabebetea te uota” I otinako man te kaa ao I kaina te mataroa.
E karina kiian ana kaa te Tari Hulet ao e a butinako. “Ti a bo n ingabong?” e taetae rinanon wintoon ana kaa.
“E koaua. Ti a kaitibo n ingabong,” I taku.