Ni Karokoa Ae Ti A Manga Kaitiboaki
Katokai Matam iaon Mataniwin te Aba
I reireinaki iroun natiu te mwaane n te reirei ae mwaakaroiroi bwa N na taratara nakea ao N na kanga n teimatoa.
Te mwananga n te waa nakon te atimwakoro teuana n te tabo ni kamaangang ae aki raroa e taraa n reke au tai ae rang n tamaroa ni kaaniai riki nakon natiu te mwaane. Taan kairiiri n te Nakoanibonga ae te Aaron ao kairake n ataeinimwaane n ara uoote a kaman babairea mwanangaia iraua namwakaina, ao are I a kona n raoniia iai.
Natiu te mwaane ae McKay e korakora marurungina, e irii teniua takakaron te reirei ae te kauarinan. Tao anne teuana bukina ngkai a kaakiira taan kairiiri iaon tewaana te waa—a ataia bwa e kona ni bwennarina ni kakorakora ngkana e kainnanoaki. Iai tabeua ongou ni kairiran te waa, ngaia are ti taraaki iai bwa te tiim ae nakoraoi.
I ingainga naba ni karekea au tai ni maroro n te nei. E mwaiti te bwai ae e a tia n rinanona McKay man te tai are e mate iai tinana, ao angiin te tai e aki rereke au tai ni kaekai kainnanona ma baike e tangirii n te anga ae te kabanea n tamaroa.
Ti karaoa te kataneiai, iai ara kaibeitia iaon rabwatara, ti ataia bwa ti na kanga n uaua, ao iai ara tia kariiri aika babane aroia aika a kairiirira.
Te bwai ae ti aki warekia bon te ang. Ti bwennarina inanon tabeua te maaire, ngkanne ti a manga korea kawaira n rinuukan te nei ao ngke ti a kaan ma mataniwin te aba e a tii karina naba ni kareira te ang ae korakora ni kaaitaraira.
A roko tabewaa taian waa i mataniwin te aba, ma Ngai ao McKay ti toka n te kabanea ni booti. A moanna n uti taian nao, ao e a bitaki kawaira ngke ti tabe ni bwebwennarina, ni kataia bwa e na reke te nakoraoi teutana. I a taonaki n te kua ao te raraoma. I kaaitaraa te nao ao ni buuru ma korakorau ni kabane, ni kataia ni kaokira nakon kawaira, ma ti taraa n ae ti a bon tei naba ni nnera arei.
Ti a reke n te kabuanibwai bwa ti nang baraaki ngke I a kariaia n takaarua n te kabane bwa I a aki ataia ngkana e na iai riki korakorau ni waaki nako. Imwiina e taku natiu te mwaane, “Ko tarai taian nao, Tamau. A na bon akea te tabo ae ko na roko iai ngkana ko karaoa anne. Ko riai ni katokai matam i mataniwin te aba. Ko noora te aroka are iaon te tabuki? Bon anne ara kouru. Kabanea nanom n taraa arei, ao ti na bon roko iai.”
E bon eti. N te tai are I kabanea nanou n taraa te aroka, I a kona n tiku iaon kawaira. Baiu a manga moanna ni korakora. McKay e tataetae n tangitangin te bwai ae rebwerebwe—“Atikia. Motirawa. Atikia. Motirawa.” Ao ti mwaing, teutana imwiin teutana.
Ti a roko i mataniwin te aba, tabeman a roko n ibuobuoki, ao ti tekateka ni kakaoka ikera. N te tairiki anne inanon ara umwanrianna ti a maroro, te karo ao te nati te mwaane, n rongorongon tebaere ti rinanona.
Ti kaai, n uringa te bwai are e reiakinna Beretitenti Thomas S. Monson n rongorongon ana auti ni kaotaota te Uea: “E anoanoiko n tain angibuakan te maiu. E wewete, ‘Aei te kawai nakon te kamanoaki; aei te kawai nakon te mweenga.’”1
N te bwakantaai anne, te aroka are i mataniwin te bike e a tia n riki bwa ara auti ni kaotaota. Ngkana I a uaakan ma te bwarannano, e reireinai ma te wanawana natiu te mwaane bwa N na aki tarai taian nao ma N na katokai matau i mataniwin te aba. Ao ti uaia n atikia, ni kawai riki aika bati nakon ae ti tetaina.