Au Reirei iaon te Onimaki
Tabeua te ririki n nako, I anga te reirei iaon te onimaki n tain te bootaki n utu n te tairiki. Au utu a kabanea aia tai ni maroro iaon te onimaki ibukina bwa tariu ae ikawai e bati ana titiraki bwa ibukin tera ngkai e riai n iai ara onimaki. I unika te koraa are I kawakinna inanon te mangko ae uarereke are e reke man te meron. I tuangiia au utu bwa te onimaki ai aron te koraa. Ngkana ko tararuaia raoi, e na rikirake te koraa.
A aki nakoraoi ara utu n taekan te ununiki. Ma au kantaninga bwa I kona ni karikirakea te aroka aei ao bwa I kona n riki bwa te katoto ae tamaroa n te onimaki. I katokaa te mwangko iaon te wintoo ao n tararuaia raoi. I kakantaninga ao n tataro bwa e na rikirake au koraa.
E kuri bwara nanou, ma imwiin teuana te wiiki I a noora te bwai ae kiriin ae bwebwerake. E rikirake iaon te wintoo teuana riki te wiiki. Ngkanne a buokai au karo ni kakaea te tabo are e na unikaki iai mai ibukin te auti iaon te beera n uee.
I tararua raoi arokau. I tebetebokia n te ran ao ni kararoai taian uteute ake irarikina. E tabe n rikirake ni bubura man bubura. I bon rang ni kukurei!
Imwiin tabeua te wiiki n nako, I a noori ueen te meron, ao ngkanne uaa aika uarereke a tabe ni bwebwerake. Ti matakuakin itiua meron ake a riki iaon te aroka ae tamwatamwarake man au koraa ae tii teuana ae uarereke. Tarakina irou bon te kakai ao kaekaan au tataro. E karewerewe uaana, n aron are e taekinaki n Aramwa 32:42: “Ao ibukin ami botumwaaka ma ami onimaki ma ami taotaonannano nakon te taeka ni kamwarakeana, bwa e aonga ni wakaa inanomi, nooria, n te tai ae aki maan kam na kinika uaana, are bon moan te kakawaki, are e karewerewe riki nakon bwaai aika a karewerewe.”
Te waaki aei e rang ni kakukureiai ao e reireinai ma a utu bwa te onimaki bon te reirei ae koaua n ana euangkerio Iesu Kristo.