Te Rongorongo n Reirei ni Kakawari
Ana Mwakuri Iesu Kristo ae Tabu: Te Tia Tei
Tataro mwaaka ibukin te beeba aei ao ukoukoria bwa ko na ata te bwai ae ko na tibwauaia. E na kanga ataakin maiun ao mwiokoan te Tia Kamaiu ni kakorakora am onimaki Irouna ao ni kakabwaiaia naake ko tararuaia rinanon te kakawari n reirei? Ibukin rongorongona riki tabeua, nakon reliefsociety.lds.org.
Onimaki, Utu, Buoka
Ma Akea Au Taeka, Ma e na Tauaki Am Taeka, iroun Harry Anderson
Iesu Kristo bon ara Tia Tei ma te Tama. Te taeka advocate iai nanona n te taeka n Ratine ae nanona “temanna are tei ibukin temanna.”1 Te Tia Kamaiu e tei ibukira, ni kamanena te atatai, motiraoi, ao te nanoanga. Ataakin aio e kona ni kaoniira ma te tangira ao te kakaitau ibukin Ana Mwakuri ni Kamaiu.
“Kakauongo nakon [Iesu Kristo] are te tia tei ibukira ma te Tama, are e tei ibukin ami mwakuri imatana—
“N taekina: Te Tama, Noora korakaina ao matena ngaia are akea ana bure ae karaoia, are irouna ngaia e kakatonga; nooria raraan Natina are e waanako, raraana are ngaia bwa e aonga ni kamimitongaki;
“Ai ngaia are, te Tama, kamaiuia tariu aikai ake a kakoaua iaon arau, bwa aonga n roko nakoiu ao ni karekea te maiu are akea tokina” (D&C 45:3–5).
Man Kristo bwa ara Tia Tei, Unimwaane D. Todd Christofferson man te Kooram n Abotoro are te Tengaun ma Uoman e taku: “E bon rangi ni kakawaki nakoiu, bwa I bia n te tai n aki akaaka ao n taabo nako n roko rinanon te tataro te kaintoka n uea ae mimitong, bwa Tamau are i Karawae na ongo au bubuti, bwa au Tia Tei, ngaia are akea te bure ae karaoia, are raraana e wanako, e tei ibukin au mwakuri are I karaoia.”2
Reitan Koroboki aika Tabu
Motiaea 15:8–9; Moronaai 7:28; Doctrine ao Covenants 29:5; 110:4
Man Koroboki Aika Tabu
Ni kabuta rongorongon ana Ekaretia te Uea, aine aika ana reirei Iesu Kristo a tia n iira Ana katooto. Etita e bon kakaonimaki ao n ninikoria. Ai mwanena ae Moretekai e kanakoa katootongan ana moti te uea bwa Iutaia a riai ni kamaunaaki, ao e tiatinna “ni karaoi onnon imatan [te uea] ibukiia ana oraki.” E reitia: “Ao ai antai ae ataiko bwa tao ko a roko n te aro n uea ibukin te tai ae ai aron aei?” (Etita 4:8, 14.)
E ngae ibukin te kaangaanga Etita e kariaia: “Ao N na rin n te aro anne nakon te Uea, n te aro ae tiaki ai aron te tua: ao ngkana tao N na mate , ao N na mate” (Etita 4:16).
Etita imwiina e taetae ma te nanorinano nakon te uea ao “ni bobaraki irarikin waena, ao e butia ni katu ranni matana … a na kaokaki reeta … bwa a na kamaunaaki I-Iutaia.” E reitia, “Bwa N na iranna ni kona n taotaona nanou n noora te kai ae nangi n reke irouia au koraki?” (taraa Etita 8:3, 5–6). Nanon te Uea e kamarauaki, ao e anganna ana bubuti.3