Berita aika tabu mai ieta e Kamatoatoaia Kiritian
Man te maroro n te maungatabu ni kabuta n Eberi 2009, “Mwaakan taian Berita aika a tabu.”
Tera ae kananonaki ni karaoan ao kawakinan berita ma te Atua aika tabu are e anganiira te mwaaka?
N Aokati 15, 2007, e taonaki Peru n te mwaiei ae korakora are a bane n urubekeaki kaawa ake i mataniwiin te aba aika Pisco ao Chincha. N aroia aro nako mataniwi ao membwa, Wenceslao Conde, te beretitenti n te Mwanga ae Balconcito n te Ekaretia i Chincha, e waekoa ni kanakoa te ibuobuoki nakoia tabeman ake a uruaki mwengaia.
Abong imwiin te mwaiei, Unimwane Marcus B. Nash man te Itingaun e mena i Chincha ni buoka kairan te mwakuri n ibuobuoki ikekei ao e kaitibo ma Beretitenti Conde. Ngke a maroroakina taekan te urubwai are e riki ao bwaai ake a tia ni karaoaki ni buokaia ake a rootaki, kainnaban Beretitenti Conde, Pamela, e roko, n uota natina temanna ae uarereke. Unimwane Nash e titirakina Titita Conde bwa a uara natina. Ma te moangare, e kaeka bwa n tamaroan te Atua a bane ni mano ao a marurung. E titirakina Conde ibukin mweengaia.
“Ai akea,” e taekina ma te rau nanno.
“Ao tera aron ami bwai?” e titiraki.
“Bwai ni kabane ni kotaki ma mweengara a bane n ingunako,” e kaeka Titita Conde.
“Ao n anne iai,” e kaeka Unimwane Nash, “ai bon te moangare iroum ngkai ti taetae.”
“Eng,” e taku, “I a tia n tataro ao ea rau nanou. A bane n reke bwaai ake ti kainnanoi. Iai ngaira, iai natira, ti kabaeaki inanon te tembora, ao ti mena inanon te Ekaretia ae tamaroa aei, ao iai te Uea iroura. Ti kona ni manga kateitei riki man ana ibuobuoki te Uea.”
Mwaakan te Berita
Tera oin te mwaaka n rabwata ao tamnei, ao ti kanga ni karekea? Oina raoi bon te Atua. Arora ni karekea te mwaaka anne bon rinanon ara berita ae tabu ma Ngaia. Te berita ae tabu bon te boraraoi imarenan te Atua ao te aomata, te reitaki are taekana a kateaki iroun te Atua.1 Inanon taian boraraoi aikai, te Atua e kabaea ni kamatoa, kaitiakia, ao e karietataira ni kabooa mwiin kabaeakira nakoIna ni beku ibukina ao ni kawakin Ana tua nako.
Tera aron karaoan ao kawakinan berita aika a tabu ma te Atua are e anganiira te mwaaka bwa tina moangare rinanon te kanganga, ni bita te kanganga nakon te tokanikai, ni kukurei ni kabaeaki inanon aroaro aika raraoi, … ao n uouota te raoiraoi ae bati” (tara D&C 58:27)?
Kakorakoraaki man Bwaintangira ao Kakabwaia
Te moan, ngkai ti nakonako inanon te ongotaeka nakon taian reirei ao tuan ana euangkerio Iesu Kristo, ti kukurei n reitinakon bwakan taian kabwaia are e berita iai nakoira te Atua n ana berita ae tabu. Kakabwaia akanne a karekei bwaai aika ti kainnanoi ni karaoi nakon are tii karaoana ngkai ti rinanon te maiu. Te katooto, ana tua te Uea n Tuan te Mauri ni kaineti ma tararuan rabwatara e kakabwaiaira moa ao riki ma te “wanawana ao kaubwai aika korakora n te ataibwai, ao bon kaubwai naba” (D&C 89:19). Riki, a karekea riki te marurung ae tabangaki ni maium ao ni kainaomatako man anua aika kareke aika urubwai. Te ongotaeka e anganiira te kona ae korakora riki ni kairii maiura, kakorakora riki ara kona n oki ao n nako, ni mwakuri ao ni kakukurei. E koaua, te ririki, kabuanibwai, ao aoraki a bon kona n riki, ma e ngae n anne, ara ongotaeka nakon tuan te euangkerio aei e kakorakora riki ara kona ni kaitara taian kanganga aikai.
Ni kawain te berita ae tabu ti kunea iai bwaintangira ao ibuobuoki aika mwaiti. “Te Tangira e aki kona ni bwaka” (1 Corinthians 13:8; Moronai 7:46), te tangira e karika te tangira, te nanoanga e karika te nanoanga, te tamaroa e karika te tamaroa, te kabaeaki e karika te onimakinaki, ao te mwakuri e karika te kukurei. Ngaira mwakoroia aomatan te berita ae tabu, aia botaki aomata aika a Itiaki ake a kaunga, a kateimatoa, ao a ibuobuoki imarenaia. Ngke e kabwarabwara Nibwaai, “Ao ngkana a kaawakin ana tua te Atua natiia aomata ao e na kateimatoai marurungiia, ma ni kakorakoraia” (1 Nibwaai 17:3).
Te Kakorakoraaki ma Rikiraken te Onimaki
Aio are e uotiira nakon te kauoua ni kawai are e kakorakoraira iai ara berita ae tabu—a karekea te onimaki ae tau n reitinako ao ni karaoi bwai ni kabane ake a kantaningaki iroun te Uea. Nanora n tatauraoi ni katoka iaora aran Iesu ao ni kawakin Ana tua e kainnanoa mwaitin te onimaki, ma ngkai ti karinei ara berita aika tabu, are e karikirakea te onimaki. N te moan tai, te ua are e beritanaki n te ongotaeka a riki bwa kakoaua, ake a kamatoai ara onimaki. Te kauoua, te Tamnei e reita kukurein te Atua, ao ti namakina te kamanoaki n Ana kakabwaia aika reitinako ao ana ibuobuoki. Te kateniua, a na roko bwai ake a na kona ni kaoti, ti kona ni kaitara te maiu ma te kantaninga ao te katiteboaki, n ataia bwa ti na tokanikai n tokina ibukina bwa iai iroura ana berita te Atua n tatabemaniira, n araia, ao ti ataia bwa E aki kona ni kewe te Atua (tara Enoti 1:6; Ita 3:12).
Taan kairiiri n te Ekaretia n bong aikai a kamatoa irakin kawain berita aika a tabu e karekea te mwengaraoi ni bwai ake ti kainnanoi n tai ni kanganga: “Bon [te atatai are kawaia n te maiu aei e ira nanon ana kantaninga te Atua] are e buokiia aika itiaki n taai akekei n teimatoa iaon aia kanganga ni kabane ao bwainikirinaia, ao n anaia … tiaki tii kabuakakaan aia bwai, ao bakataean aia bwai, ma te kukurei, ma n rootaki n te mate n aroia aika buakaka, n ataia (bwa tiaki tii kakoauana) ma are n auti aikai n aia taebenako a kamaunaki, iai aia kateitei ae ten ne ni maeka ae aki karaoaki ni bain te aomata, ae aki totoki are i karawa. (2 I-Korinto. 5:1).”2
A reitia ni kaotia bwa te anga karea ake e kantaningaia mai iroura te Atua, ti karekea te kakoaua n te Tamnei bwa ara kawai e eti ao e kakukurei nakon te Atua.3 Ma te atatai anne, ara onimaki ai akea tokina, ni karekea te kakoaua bwa te Atua n te taina e na bitii kanganga nakon korakorara. (Tara D&C 97:8–9.)
Kakorakoraki rinanon “Mwaakan te AronAtua”
Ti a tia ni maroroakinna te moan, te mwaaka ni kakabwaia ao, te kauoua, te entaumente n onimaki bwa te Atua e anganiia naake a kawakin aia berita ae tabu ma Ngaia. Te kabanea n te korakora rinanon berita aika a tabu are Nna taekinna n anga te mwaaka mai karawa. Ara berita ae tabu e kabaeaki Nakoina e karika Tamara are i Karawa n anga mwakana, “te mwaaka n “aronatua” (D&C 84:20), e rin inanonn maiura. E kona ni karaoa anne ibukin ara mwakuri n taian otenanti n nakoanibonga, ti karaoi inaomatara n rinerine ao n rineia ni karekea. Irakin otenanti akanne e kaotia naba bwa ti a tauraoi ni butimwaai tibwangara riki are a roko n raonaki ma te ota ao mwaakan te tamnei.
Inanon otenanti ni kabane, e kaineti nakoia naake n te tembora, bwa ngaira ti a tia n entaute ma te mwaaka mai karawa (tara D&C 109:22). Te “mwaaka n atua” e roko n aomata ao man ana wirikiriki te Tamnei ae Raoiroi. Ana bwaintangira te Tamnei ae Raoiroi bon mwakoron te berita ae boou ae akea tokina. Bon te mwakoro ae kakawaki n ara bwabetito, ni bwabetitoan te Tamnei. Bon ana tia ua rongorongo n akoi are e karaoaki n raraan Kristo ni kaitiaki ara bure ao ni kaitiakiira (tara 2 Nibwaai 31:17). Bon te bwaintangira are Atam bon te aomata ae “mwaaka iroun tamneina” (Moses 6:65). Bon mai iroun te Tamnei ae Raoiroi are Abotoro n taai akekei a kona ni karaoi bwai ni man kiingin te nakoanibonga are e uotia te euangkerio nakon te aonaaba ae aki ataaki n aia bong.
Ngke ti rin inanon berita aika a tabu mai karawa, te Tamnei ae Raoiroi bon ara tia karaunano, ara tia kairiira, ao e raoniira. Uaan te Tamnei ae Raoiroi bon bwaai aika a rau n te mimitong ae aki mamate, koauan bwaai ni kabane, are e karietatai bwaai ni kabane, are e kamaiui bwaai ni kabane, are e atai bwaai ni kabane, ao iai mwaaka ni kabane ni kaineti nakon te wanawana, te nanoanga, te koaua, te momotiraoi, ao te motikitaeka (tara Moses 6:61). Ana bwaintangira te Tamnei ae Raoiroi bon te kakoaua, te onimaki, te ataibwai, te wanawana, te kaotioti, te kakai, te kamaiu, ao te tangira ae itiaki, n nakon arana ma tabeua (tara D&C 46:13–26).
Bon te Tamnei ae Raoiroi are kakoaua n am taeka ngkana ko reirei ao ko kaota am koaua. Bon te Tamnei ae Raoiroi are, ngkana ko taetae n tabo aika aki iraorao, katikui taeka inanom n te bwai are ko riai n taekinna ao kakoroa bukin ana berita te Uea are “ko na bon aki ribaaki irouia aomata” (tara D&C 100:5). Bon te Tamnei ae Raoiroi are e kaota arom bwa ko na kanga ni kaitara te kakaewenako are imwiina are e tara n rang bubura nakoim ni kona n tokanikai iai. Bon mai iroun te Tamnei ae Raoiroi are a kona n namakinna tabeman mai iroum ana tangira ae itiaki Kristo ao ni karekea te korakora ni waaki nako. Bon mai iroun naba te Tamnei ae Raoiroi, n ana mwakuri te Tamnei ni Berita ae Tabu, are e kamatoa korakoran ao mwaakan am berita ae tabu ni kona ni kamanenaaki ao ni kabaea ana berita te Atua iaom (tara D&C 88:4–5; 109:14–15).
E na Raoniko Tamara are i Karawa
Berita aika tabu mai ieta e karikiia Kiritian aika Matoatoa “I kaumaki ngkami n tatabemani ngkami nako n tau ibukin ao karekean bwai ni kabane n te otenanti ao n te nakoanibonga are ko kona o imwiina ni kakaonimaki ni kawakin berita ake ko a tia ni karaoi man berita aika tabu. I nanon taai ni bwarannano, kariaia am berita aika tabu bwa a na riki n rangi ni kakawaki iroum ao kariaia am ongotaeka bwa e na karaoa raoi nanona. I mwiina ko kona ni bubuti n te onimaki, n aki nanokokoraki teutana, n aron kainnanom, ao te Atua e na kaeka. E na kateimatoako.”