Tauraoi ni Beku
“Reireiniko n am tai n ataei bwa ko na kawakin ana tua te Atua” Aramwa 37:35
I ikawairake n te kaawa ae Minas, Uruguay. Ngke I a tokara au kaonoua n ririki, tinau ma mwaaneu ake a ikawai riki a bwabetitoaki nakon te Ekaretia. E aki te roko ni kaaina te Ekaretia tamau, ma e rang ni kukurei n taai nako ngkai ti nanako n taromauri. E bon kawakina naba Tuan te Mauri ao ni kabwaka ana kabwianibwai.
E rang n uarereke ara mwaanga, ao akea ana auti ni kateitei ara aro. Ti bobotaki n te auti ae kakabwakaaki bona Iai te nei n uaua ae uarereke itinanikun te auti are ti kabongana ibukin te bwabetito.
Ngke e a kaan roko au kawaniua ni koronririki, I kukurei ngkai N nang bwabetitoaki. Ma n te bong are e boo iai te bwabetito, e bon kakarau ao n rang ni kamariri. E taku tinau bwa I aki riai ni bwabetitoaki n te bong anne ibukin te kamwaitorotoro. Ma bon bongin au koronririki, I tangiria ni bwabetitoaki n te bong anne.
I uringnga ngke I karin kunnikaiu aika mainaina ao n ruo inanon te nei bwa N nang bwabetitoaki. I ataia bwa e mwaitorotoro te ran, ma I aki namakina te mariri. I ataia bwa I karaoa te bwai ae eti, ao I namakina te rau n au iango.
Imwiina n te tai ae aki maan e a kateaki te umwantabu ibukin ara mwaanga. N te tai anne membwa n te Ekaretia a kona n ibuobuoki ni katei autinibootaki. Au mwakuri te rikorikoi neera ma tikuruu ake a bwaka iaontano bwa a aonga ni manga kona ni kabonganaaki. Bon te mwakuri ae bebete, ma e rang ni kakawaki irou. E reireinai bwa N na kanga ni beku, ao e buokai ni katauraoai ibukin te mwakuri n ibuobuoki n te Ekaretia n taai aika a na roko. Uringnga bwa e ngae ngke ko ataei, bwaai ake ko karaoi a boni kakawaki.