Ana Mwakuri n Tangira ae Kororaoi te LDS ae Karaoaki n te United Nations iaon Bwaai aika a Riki
Ana mwakuri n Tangira ae Kororaoi te LDS bon te bwai ae maroroakinaki n te baano ae a tibwa nako n ana Etekuata te Untied Nationas i New York, USA. Te bwai ae riki, “Kuneakin te Moomon ao Tabena n Ibuobuoki ibukia te Botanaomata,” bon mwakoron waakin Mwanean te Onimaki ae tibwaontianaki man bootaki ake aki irekereke ma te tautaeka ni mwakoron ana Tararua te U.N. ibukin Rongorongon te Bwabiriki.
“Ana taakete te waak aei bwa e na karababaa te atatai n aron kaokoron kakoaua n tibwauakin aan taian reirei aika tabangaki n aron te taotaonannano n te tai ae maan, te karinerine ibukia naake a kaokoro ma ngaira, ao te motinnano n raoiakin taian kaeka aika rau nakon te kakauntaeka,” e kamatata te motereita n te baanoo ae Felipe Queipo, te tia ibuobuoki n rongorongon te bwabiriki n te U.N. are bon te membwa n te Ekaretia mai Tibein.
“N tararuakiia ake a kainnano bon aan mwiokoan temanna are e neneboa te Atua ao n riki bwa tariia ao mwaneiia ni kabane―ni beku, n tabekiarake, ni kakabwaia, ao ni katoka te korakai n akean te buoka man aia kakoaua aro, rabakaun te botanaomata, te aba, te bata, rikin te aomata, ke te baekuraaun,” e taku Sharon Eubank, te tarekita ibukin ana mwakuri n Tangira ae Kororaoi te LDS, are e ira waakin te maroro.
N ana maroro neiei e a manga rinanon naba ana botoniango te LDS n ana mwakuri n Tangira ae Kororaoi are e maroroakinaki: ni katoka te korakai, ni karikirakea te toronibwai, ao ni katauraoi taai ibukin te mwakuri n ibuobuoki ibukia utu n aba nako. Ana botoniango ae kakawaki, e taku neiei, bon raan aika itiaki, te tararua ae karina ibukia aika tibwa bungiaki, tararuan ana taratara te aomata, tibwatibwakin kaintekateka wiira, te iti, amwarake, ao kaekaan kabuanibwai aika karina.
Tabeman Aomata aika Itiaki n ira te waaki bon Ahmad S. Corbitt, te tarekita n Aobitin ana Ekaretia i Nu Ioki ibukin te Intanaetinoo Abeeati, ao John P. (Phil) Colton, are e beku ma buuna, Barbara, bwa ana tia tei U.N. ibukin ana Mwakuri n Tangira ae Kororaoi te LDS.
E taku te Tari ae Corbitt bwa iai “aomata aika a nanoanga inanon aaro n te aonaaba,” e katuruturua kakawakin te kaai ni mwakuri. E kamatatai kawai te Tari Colton bwa Ana mwakuri n Tangira ae Kororaoi te LDS e katauraoa te buoka nakoia aomata aika e kaania uoua te mirion n aaba aika 132 inanon 2013.