ʻE Fakamoʻui Nai he ʻEikí Homa Fohá?

ʻAna Kelemasi Sanatu, Sanitiako, Silei

ʻI he taʻu ʻe fā ʻa homa fohá, naʻá ne toutou kole mai ke u hivaʻi ʻa e “Naʻe Tala pē ʻe Sīsū” (Ngaahi Himí, fika 51). Naʻe hā fiefia hono kiʻi fofongá lolotonga e taú ʻi hono fekau he ʻEikí e matangí mo e peaú ke tuʻu maʻú. Naʻá ne fehuʻi mai ʻo kau ki he mālohi ʻo Sīsuú. Ne u tali ʻe lava ke fai ʻe Sīsū ha faʻahinga meʻa pē ʻi he māʻoniʻoni he ʻokú Ne maʻu e mālohí kotoa. Ne hoko e Fakamoʻuí ko e moʻungaʻi tangata homa fohá.

Ka ʻi he taʻu 13 ʻa homa fohá, naʻá ne loto taʻotaʻomia lahi. Ne ʻikai ke ne toe maʻu ha holi ke lea pe kai. Ne ʻikai ke ne toe fie fai e ngaahi meʻa naʻá ne fakahoko kimuʻá, pea ʻikai ke fie kau ki he lotu fakafāmilí pe efiafi fakafāmilí ʻi ʻapí. Naʻe hangē ne ʻikai ke toe tokanga ki he lotú pe ko e ongoongoleleí.

Ne faʻa lotua mo ʻaukai e toenga ʻo e fāmilí maʻana, pea pehē ki he kāingalotu tokolahi mei homau uōtí mo e siteikí mo e niʻihi tokolahi homau kaungāmeʻa mo e kāinga. Naʻe hangē ʻoku ongo tatau ʻemau feingá ko e aʻusia ʻa ʻAlamā ko e Lahí ʻi heʻene lotua hono fohá (vakai, Mōsaia 27:14, 22–23).

ʻI he taʻu 13 ʻa homa fohá, naʻá ne loto taʻotaʻomia lahi pea ʻikai fie kau ki he lotu fakafāmilí pe efiafi fakafāmili ʻi ʻapí.

Naʻe ʻikai ke mau fie fakamālohiʻi ʻema tama tangatá ki he ongoongoleleí, ko ia ne ma talaange ʻoku ʻikai fie maʻu ia ke kau ʻi he lotu fakafāmilí pe efiafi fakafāmili ʻi ʻapí, ka naʻa mau loto ke ʻi ai mo kimautolu. ʻI heʻemau muimui ki he folofola ʻa e Fakamoʻuí ke “mou lotu ʻi homou ngaahi fāmilí ki he Tamaí … ke tāpuakiʻi ʻa hoʻomou … fānaú” (3 Nīfai 18:21), ne mālohi ange ʻemau lotu fakafāmilí mo e efiafi fakafāmili ʻi ʻapí fakatouʻosi. Ne mau ongoʻi e Laumālié ʻi homau ʻapí. Pea neongo naʻe fakalongolongo pē ʻa ʻema tama tangatá, naʻá ne ʻi ai.

ʻI he taʻu ʻe ua hono hokó ne māmālie ʻema sio ki he tokonia ʻe heʻemau lotu fakafāmilí mo e efiafi fakafāmili ʻi ʻapí ki heʻema tama tangatá. Lolotonga ha efiafi fakafāmili ʻe taha, naʻá ne fakamoʻoni ki he Fakamoʻuí peá ne kole mai pe ʻe lava ke ne teuteu ha efiafi fakafāmili ʻi ʻapi. Ne kamata ke ne kau ʻi he lotu fakafāmilí pea fiefia ke maʻulotu. Naʻá ne aʻusia ha fuʻu liliu lahi ʻo e lotó ʻi heʻene ongoʻi e ʻofa huhuʻi ʻa e Fakamoʻuí (vakai, ʻAlamā 5:26). Ko e moʻoni ne fakahaofi ʻe he ʻEikí homa fohá ʻaki ʻEne mālohi faifakamoʻuí.

Naʻe kamata ke ne fiefia pea toe longomoʻui mo loto fiemālie ke tokoni ki he niʻihi kehé pea mo ʻofa. Naʻá ne talamai ʻokú ne ʻilo ne fakamoʻui ia ʻe he Fakamoʻuí. Ne tokoni ʻa e faingataʻa ki homa fohá ke ne maʻu ha fakamoʻoni mālohi pea mo ha tupulaki ʻi he ʻofa mo e falala ki he Fakamoʻuí. Naʻá ne ngāue fakafaifekau maʻá e ʻEikí ʻi he Misiona ʻĀsenitina Puenosi ʻAealesi Sauté. Hili ʻene foki maí ne mali ʻi he temipalé, pea ʻoku ʻi ai ʻene tama fefine fakaʻofoʻofa mo hono uaifí.

ʻOku ou ʻilo ʻoku maʻu ʻe he Fakamoʻuí e mālohi ke fakamoʻui, ke fai ha mana, pea ʻai ke tau fiefia ʻi he moʻuí ni pea ʻi he moʻui ka hoko maí.