Ko ha Māmonga Nai Koe?
Kalo A. Poueni, Kalolaina Noate, USA
Naʻá ku mamaʻo mei ʻapi ki ha konifelenisi fakavahaʻa-puleʻanga ʻo ʻeku ngāué. Ne laungeau e kakai ne kau maí, ka ko au pē mei homau siteití mo e vahefonuá.
Ne fai ha maʻu meʻatokoni efiafi maʻanautolu kotoa ʻoku kau maí. ʻI heʻemau hū atu ki he falekaí, ne mau takitaha maʻu ha tikite ʻe fā ke fakaʻaongaʻi ke ʻota ʻolokaholo taʻe totongi he paá. Ne u fakakaukau ki he faingofua ki ha tokotaha mamaʻo mei ʻapi ke ʻahiʻahiʻi ʻi ha faingamālie peheni, ʻo fakakaukau he ʻikai ʻilo ʻe ha taha. Ko ha fakakaukau taimi siʻi, peá u fakafoki leva e ngaahi tikité ki he tokotaha he matapaá.
Lolotonga e maʻumeʻatokoni efiafí, ne u tangutu mo ha toko fitu ne ʻikai ke mau maheni. Ne u inu vai ʻi heʻemau kaí, talanoá, kakatá mo fevahevaheʻaki e ngaahi fakamatala te ne tokoniʻi kimautolu ʻi heʻemau ngāué.
ʻI he taimi kai he pongipongi hono hokó ne u fakafeʻiloaki ai ki ha tangata ne tangutu ʻi heʻeku tēpilé. Ne u fiefia ke fakatokangaʻi ʻa hono pine hingoá ko haʻane haʻu mei hoku kolo tupuʻangá—ko ha kolo ne ʻikai ke u toe nofo ai ha taʻu ʻe 35. Hili e ako māʻolungá ne u mavahe mei ʻapi ki he ʻunivēsití, mali pea hiki mei ai.
Hili ʻema talanoa ki he ngaahi feituʻu mo e ngaahi meʻa ʻoku hoko he koló ʻokú ma fakatou ʻiló, naʻá ne fehuʻi mai pe ʻoku kei ʻi ai haʻaku fāmili ai. Ne u talaange ʻikai ka ʻoku ʻi ai haʻaku kaungāmeʻa lelei ʻoku mau kei fetuʻutaki. Naʻá ne ʻeke mai pe ko hai kinautolu, ne u kamata fakalau leva ha niʻihi ʻo kinautolu.
Hili e ngaahi ʻuluaki hingoá naʻá ne taʻofi mai au mo pehē mai, “Tatali, ko e Māmonga koe? Ko e kakai kotoa kuó ke fakalaú ko e kau Māmonga.”
ʻI heʻeku fakahaaʻi ko ha mēmipa au ʻo e Siasí, naʻá ne talamai ko e kakai lelei ʻa hoku kaungāmeʻá pea mo ʻenau tokoni ki he koló pea hoko ko e sīpinga lelei ki he tokotaha kotoa. Naʻá ne vahevahe e ngaahi meʻa ʻoku saiʻia ai he Siasí mo hoku kaungāmeʻá, ʻo talanoa ki he founga ʻo ʻenau hoko ko e kau taukapo ʻo e leleí ʻi he koló.
ʻI heʻema mātukú, ne ʻikai ke u lava ʻo taʻe fakaukau ki he meʻa ne mei hoko kapau ne u fili ke fakaʻaongaʻi e ngaahi tikite inú. Ne akoʻi au ʻe he kakai ne ma talanoa ki aí ke fili ki he totonú. Ne u meimei ongoʻi taʻe fiemālie mo mā ke tala ko ha mēmipa au ʻo e Siasí kapau ne u fakaʻaongaʻi e ngaahi tikité.
ʻOku ou houngaʻia ko e sīpinga ʻa hoku kaungāmeʻa taau, mālohi mo ngāue tokoní—hili ha taʻu 35 pea mo ha maile ʻe 2,000 (km ʻe 3,220) mei he ʻapi ʻo ʻeku kei talavoú.