Ngaahi Fehuʻi mo e Talí
ʻE founga fēfē haʻaku “tuʻu ʻi he ngaahi potu toputapú” ʻi ha taimi ʻoku lahi ai e taʻemāʻoniʻoni ʻokú ne ʻākilotoa aú, ʻo hangē ko ʻete ʻi he ʻapiakó?
Ke tau mateuteu ki he ngaahi taimi faingataʻá, ʻoku fekauʻi kitautolu ʻe he ʻEikí ke “ke tuʻu ʻi he ngaahi potu toputapú” (T&F 45:32; toe vakai, T&F 87:8). Ke fai iá, ʻoku fie maʻu ke tau moʻui taau pea tau maʻu mo e Laumālie Māʻoniʻoní. ʻE tokoni mai e Laumālié ke tau ikunaʻi e ʻahiʻahí mo e ngaahi takiekina halá. Ko ha ngaahi founga ʻeni ke fakaafeʻi mai ai e Laumālié ki hoʻo moʻuí:
-
Lotu. Kamata ʻaki ho ʻahó ha lotu, kae tautefito ke ke lotu he lolotonga e ʻahó he taimi ʻokú ke ofi ai he ngaahi takiekina taʻe māʻoniʻoni he ʻapiakó pe ha faʻahinga feituʻu pē.
-
ʻAlu ki he seminelí pea ako fakaʻaho e folofolá. ʻE tokoniʻi koe ʻi hoʻo ako e ngaahi tokāteline ʻoku akoʻi mai ʻe he folofolá ke ke fonu he māmá mo e moʻoní—“ʻoku liʻaki ʻe he māmá mo e moʻoní ʻa e tokotaha angakoví na” (T&F 93:37).
-
Maʻu e sākalamēnití he uike takitaha. ʻI hoʻo toe fakafoʻou fakalelei hoʻo fuakava ke moʻui ʻaki e ongoongoleleí, te ke maʻu e talaʻofa ʻa e ʻEikí ke ʻiate koe maʻu ai pē ʻa Hono Laumālié.
-
Moʻui ʻaki e ngaahi tuʻunga moʻui ʻi he Ki Hono Fakamālohia ʻo e Toʻu Tupú. ʻE tokoniʻi koe ʻe he ngaahi tuʻunga moʻui ko ʻení ke ke fakafofongaʻi mo taukapoʻi e māʻoniʻoní.
-
Ofi maʻu pē ki hoʻo mātuʻá. ʻOku mālohi ange e fānau ʻoku feohi lelei mo ʻenau mātuʻá ʻi he ngaahi tūkunga faingataʻá.
ʻE fakamālohia fakalaumālie koe ʻe he ngaahi fokotuʻu ko ʻení. Te nau tokoniʻi koe ʻi he taimi te ke ʻi ha tūkunga ʻoku taʻe māʻoniʻoní pea ʻoku ʻikai lava ke ke toe kalo mei ai, hangē ko e ʻapiakó. Ka ko e lelei tahá kapau te ke lava ʻo fakaʻehiʻehi mei he ngaahi tūkunga taʻe māʻoniʻoni ko ʻení ʻi ha faʻahinga taimi pē.
Tauhi ha ʻUlungaanga ʻApasiá
Kuó u ako te ke lava ʻo ʻai e ngaahi feituʻu ʻokú ke ʻi aí ke māʻoniʻoni, koeʻuhí he ʻoku mahuʻinga ange ko hai kitautolu ʻi he feituʻu ʻoku tau ʻi aí. ʻOku lahi e ʻahiʻahi he ʻapiakó, ka ko e meʻa ʻoku mahuʻinga tahá ko hono maʻu ha ʻulungaanga ʻapasia ki he Tamai Hēvaní mo feinga ke toʻo kiate koe ʻa e huafa ʻo Kalaisí. Te ke lava ʻi he foungá ni ʻo ʻai ho ʻapiakó ke hoko ko ha feituʻu māʻoniʻoni kiate koe koeʻuhí he te ke manatuʻi e Tamai Hēvaní mo hotau Fakamoʻuí.
ʻEletā ʻOuseta, taʻu 21, Misiona Kolomupia Pokoutā Noaté
Fili e Leleí, Fakaʻehiʻehi mei he Koví
ʻOku ou feinga ke fakamamaʻo mei he ngaahi feituʻu ʻi hoku ʻapiakó ʻoku ou ʻiloʻi ʻoku fai ai ʻe he kakai kehé ha ngaahi meʻa ʻoku halá. ʻOku ou toe filifili lelei mo e tokotaha te u tangutu mo ia he kalasí pe lolotonga e maʻu meʻatokoni hoʻataá koeʻuhí he ʻoku nau uesia e anga ʻeku fakakaukaú mo e tōʻongá. Ka ʻoku tatau ai pē pe ʻoku lahi fēfē ʻetau tokangá, te tau meimei sio pe fanongo maʻu ai pē ʻi ha meʻa taʻe māʻoniʻoni. ʻI heʻene hoko ha meʻa peheni kiate aú, ʻoku ou hanga kehe leva pea hiva lotoʻi pē ha himi ke maʻa ai ʻeku fakakaukaú. ʻOku toe tokoniʻi foki au ʻi hono lau e folofolá mo talanoa mo e ngaahi kaungāmeʻa ʻoku nau poupouʻi mo tataki fakalaumālie aú. He ʻikai ke tau lava ʻo fili maʻu pē e ʻātakai pe tūkunga ʻoku tau ʻi aí, ka te tau lava ʻo fili e founga te tau fakafeangai ai ki aí.
ʻIlisa A., taʻu 14, ʻIutā, USA
Taukapoʻi Hoʻo Tuí
ʻAi ke māʻoniʻoni e feituʻu ʻokú ke ʻi aí. Feohi mo e ngaahi kaungāmeʻa ʻoku feʻunga mo e ngaahi fokotuʻu ʻoku ʻi he Ki Hono Fakamālohia o e Toʻu Tupú. ʻAi ke ʻiloʻi ʻe he kakai kehé hoʻo ngaahi tuʻunga moʻuí pea kole ange kiate kinautolu ke tuku ʻenau talanoa taʻe feʻungá pe tamateʻi e mūsika ʻoku ʻikai ke leleí he taimi ʻokú ke ʻi aí. ʻOua naʻá ke manavahē ke taukapoʻi hoʻo tuí.
Tōmasi S., taʻu 15, Siōsiá, USA
Mālohi mo Loto-toʻa
Kuo pau ke tau mālohi mo loto-toʻa. Kuo pau ke tau fili e totonú. ʻOku faingataʻa he taimi ʻe niʻihi, ka ʻo kapau te tau fai ia, te tau fiefia. ʻI he taimi ʻoku kole mai ai e kakaí ke tau inu ʻolokaholo pe ifi tapaka mo kinautolú, ʻoku fie maʻu ke tau loto-toʻa ʻo talaange, ʻikai. Te tau lava ʻo fakamatalaʻi kiate kinautolu ʻoku tau loto ke fili e totonú, koeʻuhí ke ʻoua naʻa tau fai e ngaahi meʻa ko iá.
ʻAnasitāsia N., taʻu 20, ʻIvano-Felengikisi, ʻIukuleini
Fekumi ki he Laumālié
ʻOku mau feʻiloaki mo ha kakai he ʻapiakó ʻoku ʻikai ke tatau ʻenau tuʻunga moʻuí mo kitautolu. Ka ʻi hono tataki ʻe he Laumālie Māʻoniʻoní hotau halá, te tau lava ke fai e ngaahi fili ʻoku totonú mo fokotuʻu ha sīpinga lelei maʻanautolu. ʻOku mahuʻinga maʻu pē ke tau “tuʻu ʻi he ngaahi feituʻu toputapú” ke lava ʻo ongoʻi ai e ʻofa ʻa e Tamai Hēvaní. Ko e founga ʻe taha ki hono fai iá ko e fekumi ki he takaua ʻo e Laumālie Māʻoniʻoní. ʻI he taimi ʻoku tau fili ai ke ʻi he ʻātakai ʻo e ʻOfa ʻa e ʻOtuá, te tau fuʻu fiefia lahi, ʻi he ʻiloʻi ʻoku hoifua e Tamai Hēvaní ki heʻetau tōʻongá.
Seniseni N., taʻu 18, Semipoanga, Filipaini
ʻOua Naʻa Teitei Fakangalokuloku
ʻI he ngaahi taʻu siʻi kuohilí, ko e taha au e kau mēmipa tokosiʻi ʻo e Siasí ʻi heʻeku kalasí. Ne pehē ʻe he kakaí ʻoku ou ngali kehe koeʻuhí he naʻá ku mateakiʻi hono moʻui ʻaki e ngaahi tuʻunga moʻui kotoa ʻa e Siasí. Ne ʻi ai ha ʻaho ʻe taha ne u fakakaukau ke kiʻi fakangalokuloku ʻeku ngaahi tuʻunga moʻuí. ʻI heʻeku fai iá, ne u fakatokangaʻi ʻoku lahi ange e tokanga mai ʻa e niʻihi kehé kiate aú. Hili ha ngaahi uike siʻi, ne u ongoʻi halaia peá u tafoki ki he ʻEikí ʻo fakatomala. Naʻá Ne tokoniʻi au, pea ne u fai ha ngaahi feilaulau lahi, ka naʻe ʻaonga ia! Ne u sio moʻoni ki he ngaahi tāpuaki ʻo hono moʻui ʻaki e ongoongoleleí ʻi he ʻapiakó. Ne mole hoku ngaahi kaungāmeʻá mo e tokangá, ka ne u maʻu e fakaʻapaʻapá mo e fiefiá.
Siutoni K., taʻu 15, Tekisisi, USA
Fakakaukau ki he Temipalé
Ko e feituʻu māʻoniʻoni taha ʻi he māmaní ko e temipalé. ʻE tokoniʻi koe ke ke fai e meʻa ʻoku totonú ʻi hoʻo fakakaukau ki aí, ʻo tatau ai pē pe ko e hā e tūkunga te ke ʻi aí. Te ke toe lava foki ʻo fokotuʻu ha laʻi tā ʻo e temipalé ʻi ha feituʻu te ke lava ʻo sio ki ai; ʻe ʻai ʻe he meʻá ni ke ke ongoʻi lelei ange pea maʻu e mālohi ke ʻoua naʻá ke tokanga ki he taʻe māʻoniʻoni ʻoku hoko ʻi he ʻapiakó.
ʻAnisela T., taʻu 18, ʻEkuetoa