Ngaahi Fakakaukau Maʻá e Efiafi Fakafāmili ʻi ʻApí

ʻOku ‘i he pulusinga ko ʻení ha ngaahi fakamatala mo ha ngaahi ‘ekitivitī ‘e lava ke fakaʻaongaʻi ki he efiafi fakafāmili ʻi ʻapí. Ko ha sīpinga ‘eni ‘e ua.

“Fili ke ʻOua ʻe Ngutu Lau,” peesi 59: Fakakaukau ke lau e fakamatala ko ʻení pea mo e konga ki he leá ʻi he Ki Hono Fakamālohia ʻo e Toʻu Tupú (peesi 20). Aleaʻi ha ngaahi founga ke siviʻi ai pe ʻoku feʻunga pe ʻikai ke vahevahe atu ha meʻa ʻokú ke fanongo ai. ʻE lava ke hoko e ngaahi fehuʻi ko ʻení ko ha konga ia ʻo e fealēleaʻakí: ʻOku moʻoni nai e fakamatalá? ʻOku lelei nai hano toe talanoaʻi e fakamatala ko ʻení? ʻOku lelei nai hono toe vahevahe atu e meʻa naʻá ke fanongo aí? Ke hoko ko ha ʻekitivitií, te ke lava ʻo ʻave ha laʻipepa maʻá e mēmipa takitaha ʻo e fāmilí pea hiki hono hingoá ʻi ʻolunga he laʻipepá. Pea ʻave takai e ngaahi laʻipepá pea tuku ke tohi ʻe he kau mēmipa ʻo e fāmilí e ngaahi meʻa ʻoku nau houngaʻia mo ʻofa ai he tokotaha takitaha.

“Hola e Fanga ʻAlapakasi!” peesi 67, “ʻOku Fanongo Mai e Tamai Hēvaní mo Tali ʻEku Ngaahi Lotú,” peesi 70, mo e “Ko ʻEtau Talí,” peesi 75: Toe vakaiʻi e ngaahi talanoá ni pea aleaʻi e ngaahi ʻuhinga ʻoku tau lotu aí. Vahevahe ha meʻa ne ke aʻusia ʻi hoʻo lotú, kapau ʻe ueʻi ke ke fai pehē. Naʻá ke maʻu ha tokoni, ʻo hangē ko Lomenií? Kuó ke loto nai ke ʻilo e moʻoní, ʻo hangē ko Tatianá? Hili hono lau e ngaahi talanoá, te ke lava ʻo vahevahe ha ngaahi folofola kau ki he lotú, hangē ko e 2 Nīfai 32:8–9 mo e Tokāteline mo e Ngaahi Fuakava 10:5. Fakaafeʻi e mēmipa takitaha ʻo e fāmilí ke ne fokotuʻu ha taumuʻa ke fakatupulaki ai ʻene lotu fakatāutahá. Te ke lava ʻo fakaʻosi ʻaki hano hivaʻi ha foʻi himi kau ki he lotú, hangē “Ko e Houa ke Lotu” (Ngaahi himi, fika 72).

ʻI Hoʻo Lea Fakafonuá

ʻOku maʻu e Liahoná mo e ngaahi nāunau kehe ʻa e Siasí ʻi ha ngaahi lea fakafonua lahi ʻi he languages.lds.org.