Ko ʻEtau Talí
Ne hoko ha kiʻi lotu faingofua ke ne liliu hoku fāmilí ke taʻengata.
“Te ne fakahā ʻa hono moʻoní kiate kimoutolu, ʻi he mālohi ʻo e Laumālie Māʻoniʻoní” (Molonai 10:4).
ʻOku ou kei manatuʻi ʻeku fuofua sio ki ha ongo tangata naʻá na tuʻu mai ʻi homau matapā ʻi Peluú. Naʻá na sote hina mo hēkesi, pea naʻá na māʻolunga ʻaupito! Ne u manatuʻi e anga fakakaumeʻa ʻena malimalí.
Ne u fakakaukau, “Pau pē ʻokú na angalelei.” ʻOku pau pē ne pehē mo e fakakaukau ʻa ʻeku ongomātuʻá koeʻuhí he naʻe vave e hokohoko ʻaʻahi ange ʻa e ongo faifekaú ki homau ʻapí.
Ne u saiʻia he fanongo ki he ongo faifekaú peá u ongoʻi maʻu pē ʻokú na fakamatalaʻi mai e moʻoní.
“Te ke loto ke papitaiso, Fineʻeiki?” Ko ʻeku fehuʻi ia ki heʻeku faʻeé ʻi ha ʻaho ʻe taha.
Naʻá ne malimali. “ʻIo, ʻoku ou loto ki ai. Ka ʻoku ou fie papitaiso fakataha mo hoʻo tamaí.”
Ne u kamokamo pē. Ne u taʻu hiva—ʻosi motuʻa feʻunga ke papitaiso. Ka naʻá ku loto ke papitaiso fakataha mo ʻeku tamaí, ka naʻe ʻikai ke ne fakapapauʻi pe ʻokú ne tui ki he meʻa ne akoʻi ʻe he ongo faifekaú.
Ne hangē ʻoku ʻiloʻi pē heʻeku Fineʻeikí ʻeku fakakaukaú ʻo ne pehē mai, “Hokohoko atu pē hoʻo lotú, pea ʻe hokosia mai e taimi te ne tui aí.”
Ne u ʻiloʻi ne ʻosi fakatukupaaʻi ʻe he ongo faifekaú ʻeku tamaí ke muimui ki he fakaafe ʻoku fai ʻi he fakaʻosinga ʻo e Tohi ʻa Molomoná ke kole ki he ʻOtuá ʻaki ha loto fakamātoato ke ʻilo pe ʻoku moʻoni e ongoongoleleí. Ko ia ʻi ha efiafi ʻe taha ne u loto ke u tokoniʻi ʻeku tamaí ʻi he tukupā ko iá. Ne u kole ange pe ʻe lava ke ma lotu fakataha hangē ko e meʻa ne kole mai ʻe he ongo faifekaú. Ne ma ō ki hoku lokí ʻo tūʻulutui. Naʻá ne ʻeke mai kiate au pe ko hai te ne fai e lotú.
Naʻá ku pehē ange, “Kātaki ke ke fai ʻe koe e lotú.”
Ne kamata lotu leva ʻeku tangataʻeikí ki he Tamai Hēvaní. ʻI heʻene kole ko ia pe ʻoku totonu ke mau papitaisó, ne ʻākilotoa kimaua ʻe ha ongo ʻo e ʻofa mo e melino. Ne fuʻu mālohi e ongó pea kiʻi fakalongolongo ʻeku tamaí. Ne ma ʻiloʻi ʻoku fie maʻu ke mau papitaiso.
He ʻikai ke toe ngalo ʻiate au e fofonga ʻeku tamaí hili e ʻosi ʻene lotu ko iá.
Naʻá ne fanafana mo fāʻofua mai kiate au, “Kuo maʻu ʻeta talí.”
Ne u malimali heʻeku fāʻofua atu ki heʻeku tangataʻeikí. ʻOku hanga ʻe he Laumālie Māʻoniʻoní ʻo ʻai ke tau malava ʻo ʻilo ʻa e moʻoní (vakai, Molonai 10:5).