Nahea e tavini i roto i te mau piiraa a te autahu‘araa
No roto mai i te a‘oraa no te amuiraa rahi no te ava‘e Eperera 1987.
Ua feruri maite a‘enei outou i te faufaa o te hoê varua taata ? Ua feruri a‘enei outou i ni‘a i te faito puai tei roto ia tatou tata‘itahi ?
Ua haere a‘enei au i te hoê amuiraa tĭtĭ i reira to’u peresideni tĭtĭ tahito o Paul C. Child huriraa i te api no Te Parau Haapiiraa e te Mau Parau Fafau 18 e ua haamata atura i te tai‘o mai : « A haamana‘o na e e faufaa rahi to te mau varua taata i to te Atua hi‘oraa mai » (irava 10).
Ua ani atura te peresideni Child e, « Eaha te faufaa o te hoê varua taata ? » Aita oia i ani i te hoê episekopo, te peresideni tĭtĭ e aore râ te hoê melo apooraa teitei no te pahonoraa. Aita, ua ma‘iti oia i te hoê peresideni no te pŭpŭ peresibutero.
Vai mû noa taua taata ra ma te hitimaue mai te huru ra e, ua mo‘e a muri atu to’na reo e i muri iho ua parau mai, « Te faufaa o te hoê varua taata, o te hiro‘a ïa ia riro mai ei Atua ».
Feruri maite a‘era te amuiraa atoa i teie pahonoraa. Ua rave noa te peresideni Child i ta’na a‘oraa, no’u nei râ, ua tamau noa ïa i te mana‘ona‘o i teie pahonoraa faaûru.
Ia tapapa, ia haapii e ia haaputapu i te mau varua tao‘a rahi ta te Metua i faaineine no Ta’na poro‘i, o te hoê hopoi‘a rahi roa ïa. Varavara roa te manuiaraa i te hoê ohipa ohie. Tei mâtauhia, e tupu na mua te roimata, te mau tamataraa, te tiaturiraa e te iteraa papû.
Tei roto te haapapûraa a te Fatu te tamahanahanaraa na te mau tavini a te Atua : « Tei pihai atoa iho ïa vau ia outou » (Mataio 28:20). Te turu nei teie fafauraa hanahana ia outou e au mau taea‘e no te Autahu‘araa a Aarona tei piihia i te mau ti‘araa faatere i roto i te mau pŭpŭ diakono, haapii e tahu‘a. Te faaitoito nei te reira ia outou i roto i ta outou faaineineraa ia tavini i roto i te aua misioni. E tamahanahana te reira ia outou i tera mau taime haaparuparu, e topa mai i ni‘a ia tatou paatoa.
« No reira, eiaha e rohirohi i roto i te ohipa maitai », te parau nei te Fatu, « no te mea te haamau atu nei outou i te niu no te hoe ohipa rahi roa. E na roto i te mau mea iti nei e tupu mai ai tei rahi roa ra.
Inaha, te titau nei te Fatu i te aau e te mana‘o anaanatae» (PH&PF 64:33–34). O te faaroo auraro, te tiaturi tamau e te hiaai rahi te mau tapa‘o tamau no ratou e tavini nei i te Fatu ma to ratou aau atoa.
Ia mana‘o noa’tu te hoê taea‘e e faaroo nei i to’u reo e, aita i ineine, aita e aravihi no te pahono i te hoê piiraa ia tavini, ia faatusia, ia haamaitai i te oraraa o vetahi ê, a haamana‘o i teie parau mau : « Te taata e pii te Atua, e faaaravihi atu te Atua ».
Hoho‘a faahoho‘araa na Cody Bell © IRI