Te misionare iti a Mama‘u Deny
Te ora ra o Emília Maria Guimarães Correa i roto i te area pû, te Federal District, i Brazil.
« Ia parau te taata na roto i te mana o te Varua Maitai, na te mana o te Varua Maitai e faatae i taua parau ra i roto i te aau o te tamarii a te taata nei » (2 Nephi 33:1).
Ua ora na Vítor e to’na metua vahine e to’na tuahine i te fare o mama‘u Deny. Ua ma‘ihia te mama‘u a Vítor e ua mau oia i roto i te ro‘i e rave rahi hepetoma. Vai otahi noa oia i roto i to’na piha, ona ana‘e.
Ua faaoti Vítor e nehenehe ta’na e faaea i piha‘i iho ia mama‘u Deny. I te mau mahana atoa, a ho‘i ai oia mai te haapiiraa, e rave oia i te Liahona i roto i te piha o mama‘u e e tai‘o oia ia’na te tahi mau aamu i ni‘a i te mau api na te mau tamarii.
I te otiraa ia’na te tai‘oraa i te mau Liahona atoa e vai ra i to’na utuafare, ua haamata oia i te tai‘o ia’na i te Buka a Moromona e te Bibilia. E ere mama‘u Deny i te melo o te Ekalesia, ua au roa râ oia i te faarooraa ia Vítor ia tai‘o mai. Ua oaoa oia i te haapiiraa i te evanelia.
Ua ani mama‘u e rave rahi uiraa. Aita ana‘e e roaa ia Vítor i te pahono atu, e ani oia i to’na orometua i te Paraimere e aore râ e imi oia i roto i te mau papa‘iraa mo‘a. E pii mama‘u ia Vítor, ta’na misionare iti.
Ua parau mama‘u Deny ia Vítor ua haapii rahi oia mai ia’na ra. Ua fafau oia e haere oia i te pureraa e o’na ra ia maitai mai oia. Na te mea ta’na i haapii i faahinaaro ia’na ia maitai mai te tino e ia tuatapapa no ni‘a i te evanelia.
I te maitairaa mai mama‘u, ua tape‘a oia i ta’na fafauraa. Ua haere oia i te pureraa e o Vítor no te haapii faahou mai no ni‘a i te mea ta’na i haapii ia’na. Aita i maoro roa, ua bapetizohia mama‘u e ua haamauhia. Ua tauturu Vítor ia’na ia haapii mai e, e parau mau te evanelia.
Ua rahi mai Vítor, e ua riro mai ei misionare rave tamau i roto i te misioni no Boston Massachusetts. Na mua te mahana faaru‘eraa, ua haere oia i te hiero – e mama‘u Deny.
Hoho‘a ho-mai-hia e Emilia Maria Guimarães Correa