Te hepetoma Pasa
Ua faaoti to tatou Faaora Iesu Mesia i te Taraehara – tei roto atoa ïa To’na mamae i Gesetemane, To’na Faasatauroraa i Golagota e To’na Ti‘a-faahou-raa mai te menemea ra – i te hepetoma hopea o To’na oraraa
I te Apooraa i te Ra‘i ra na mua te fenua i hamanihia, ua hohora te Metua i te Ao ra i Ta’na opuaraa no tatou, Ta’na mau tamarii. Ua tuô tatou i to tatou oaoa i to te Metua i te Ao ra ma‘itiraa ia Iesu Mesia no te amo i te opuaraa no te faaoraraa (hi‘o Ioba 38:7 e Aberahama 3:27). I fanauhia na Maria i Betelehema, ua ora Iesu i te hoê oraraa hara ore. No Ta’na Taraehara, ua nehenehe ia tatou ia ho‘i e ora i piha‘i iho i to tatou Metua i te Ao ra e ia farii i te ora mure ore. E ho‘i faahou mai Iesu Mesia ma te mana e te hanahana no te noho i ni‘a i te fenua i te Mileniuma, e e parahi Oia ei Haavâ no te mau taata atoa i te mahana hopea.
I muri nei te tahi mau hoho‘a no roto mai i te mau hoho‘a video no ni‘a i te Bibilia e faaite ra i te hepetoma hopea i roto i te oraraa o te Faaora. A feruri e, e tai‘o i te mau irava papa‘iraa mo‘a tei tapurahia i raro a‘e i te hoho‘a tata‘itahi. No te apaparaa o te mau ohipa atoa i tupu, a hi‘o i te faatu‘atiraa o na Evanelia e maha i roto i te Bible Dictionary e aore râ te faahororaa o te mau papa‘iraa mo‘a. E roaa te mau video no ni‘a i te Bibilia i ni‘a ia biblevideos.lds.org.
I te paeraa o te mahana hou te Pasa, ua tomo Iesu i roto ia Ierusalema i ni‘a i te hoê asini mai tei tohuhia. Ua hi‘o te taata Ia’na ei Arii no ratou, ma te tuô roa « Hosana » e ma te vauvau i to ratou mau ahu e te amaa rii i raro na mua i te asini. (Hi‘o Mataio 21:1–11 ; Mareto 11:1–11 ; Zekaria 9:9.)
Hoho‘a © IRI
No te piti o te taime i roto i Ta’na ohipa i te tahuti, ua tamâ Iesu i te mau vahi o te hiero. « E parauhia to’u fare e fare pureraa e fare pureraa, faarirohia iho nei ra e outou ei ana no te eiâ haru », ua parau Oia i te feia hoo moni (Mataio 21:13). I muri iho e rave rahi mata po e te pirioi tei haere mai Ia’na i roto i te hiero, e ua haamaitai Oia ia ratou. I to te mau tahu‘a rarahi râ e te mau papa‘i parau iteraa i Ta’na mau semeio, ua riri ratou e ua imi i te haapohe Ia’na. (Hi‘o Mataio 21:12–17 ; Mareto 11:15–19.)
Hoho‘a © IRI
Iesu Mesia, te Tamaiti Fanau Tahi a te Metua, tei farii e pou i te fenua nei no te faaora i te mau taata atoa mai te Hi‘araa. (Hi‘o 1 Nephi 11:16–22, 26–33 ; Alama 7:10–13.)
Hoho‘a © IRI
I te roaraa o te hepetoma, ua parau te Faaora te tahi o Ta’na mau haapiiraa rahi roa a‘e, tera atoa haapiiraa Ta’na no ni‘a i te moni o te vahine ivi. (Hi‘o Mareto 12:41–44 ; Luka 21:1–4.)
Hoho‘a © IRI
I roto i te ô no Gesetemane, ua tuturi te Faaora i raro e ua pure, e ua tae roa i To’na mamae no te mau hara o te ao nei ia « mauiui tahe maira te toto na te mau poa’toa, e ua mauiui i te tino e te varua atoa hoi » (PH&PF 19:18). Aita i maoro roa, te tae mai nei o Iuda Isakariota e te tahi tiaa rahi e ta ratou omore no te haru ia Iesu, e i ô, ua faaru‘e te mau pĭpĭ atoa i te Fatu e ua horo ê. (Hi‘o Mataio 26:36–56 ; Mareto 14:32–50 ; Luka 22:39–53.)
Hoho‘a © IRI
I te taime no Ta’na tamaaraa hopea, ua fafau Iesu i Ta’na mau aposetolo e, e farii ratou i te Faa‘o, oia hoi te Varua Maitai, ia reva’tu Oia. Ua haapii Oia ia ratou ia haamana‘o mai Ia’na na roto i te raveraa i te oro‘a. I te hopea o tera ra pô, ua pûpû o Iesu i te pure arai, i reira ua pure Oia ia riro mai te mau pĭpĭ ei tino hoê. (Hi‘o Mataio 26:17–30 ; Mareto 14:12–26 ; Luka 22:14–32 ; Ioane 13–17.)
Hoho‘a © IRI
Na roto i te hoê haavâraa tano ore e te hamaniraa ino mau, ua faati‘a o Iesu Mesia ia faasataurohia Oia, oia ïa tei faaoti i te « tusia hopea ra » tei faatupu i te faaoraraa no te mau tamarii atoa a te Atua (hi‘o Alama 34:14–15). Na mua a‘e te pô, ua haapou te feia pee ia Iesu i To’na tino mai te satauro mai, ua ahu Ia’na i te ahu parupape e te raau no‘ano‘a, e tuu atura i roto i te menema. (Hi‘o Mataio 27 ; Luka 23 ; Mareto 15 ; Ioane 19.)
Hoho‘a © IRI
Aahiata sabati a‘era, ua haere mai o Maria Magadala e te tahi atu mau vahine faaroo i te menema ra no te tâvai â i te tino o Iesu. Ua tura‘ihia te ofa‘i o te menema e e piti melahi tei faaite mai i te parau apî oaoa : « Aore oia i ŏ nei, ua ti‘a faahou a‘enei ïa » (Mataio 28:6). Ua upootia te Faaora ti‘a faahou i te pohe pae tino e ua faati‘a ia tatou tata‘itahi ia ora faahou mai : « Mai te taata i hope i te pohe ia Adamu, e hope atoa i te faaorahia i te Mesia » (1 Korinetia 15:22). (Hi‘o Mataio 28 ; Mareto 16 ; Luka 24 ; Ioane 20).
Hoho‘a © IRI