iTukutuku ni Mataveiliutaki Taumada
Sa Tucaketale o Koya
Na ivakadinadina ni sa dina sara na nona Tucaketale o Jisu Karisito sa ivurevure ruarua ni inuinui kei na gugumatua. Ka sa rawa ni yaco vakakina vua e dua ga na luve ni Kalou sa rawa. A yaco vei au ena dua na siga ni vulaikatakata ni June 1969 ena gauna a mate kina o tinaqu, ka sa vakatu mai kina ena veiyabaki taucoko oqo, ka na yaco tikoga me yacova niu sa raici koya tale.
Na rarawa mai na veitawasei lekaleka oqo a vakaisosomitaki vakatotolo sara ena marau. E a sega walega ni dua na inuinui ni dua na sota vata marautaki. Ena vuku ga ni sa vakatakila mai na Turaga e vuqa na ka vei ira na Nona parofita kei na vuku talega ni sa vakadeitaka vei au na Yalo Tabu ni sa dina na Tucaketale, au rawa ni raitayalotaka na totoka ni rairai ni noda sa na vakaduavatataki tale kei ira na noda lomani era sa savasava ka tucaketale mai:
“Ia sai ira oqo era na tucaketale me ra bula. …
“Ia sai ira oqo sa volai tu na yacadra mai lomalagi, io sa lewa na ka kecega mai kea na Kalou kei na Karisito.
“Ia sai ira oqo na tamata yalododonu era sa vakasavasavataki e na vuku i Jisu, na dautataro ni veiyalayalati vou; io sa liviraka na nona dra me sorovaki ira kina; io na isoro sa uasivi sara” (V&V 76:65, 68–69).
Ena vuku ga ni sa mai vorolaka kina o Jisu Karisito na ivesu ni mate, o ira kece na luvena na Tamada Vakalomalagi era sucu mai ki na vuravura oqo era na tucaketale ena yagodra ena sega tale ni mate. Ia na noqu kei na nomu ivakadinadina baleta na dina lagilagi o ya ena rawa ni kauta laivi na batigaga ni kena takali e dua na lewe ni matavuvale se itokani lomani ka vakaisosomitaki ena nanamaki rekitaki kei na veivakadeitaki tudei.
Sa solia kece vei keda na Turaga na isolisoli meda tucaketale, o ya na kena vakatikori na yaloda ki na yago sa sega kina na veika ca vakayago (raica na Alama 11:42–44). Ena ituvaki gone ka ramase o tinaqu, sa vagalalataki na mawe ni balavu ni bula kei na gauna ni rarawa vakayago. Ena yaco mai qo vua vakakina vei keda ni sa isolisoli.
Ia kivei keda eda gadreva meda tiko tawamudu vata kei koya e dodonu me digitaka na veika e lavaki ki na duavata oqo me laki bula ena vanua rau tiko kina ena lagilagi na Tamada kei na Luvena sa tucaketale. Oqori ga na vanua e na laki tomani tawamudu kina na bula vakamatavuvale. Na ivakadinadina ni dina o ya sa mai vagumatuataki au meu sa mai rawata vakai au kei ira au lomana na ivakatagedegede cecere ni matanitu vakasilesitieli ena vuku ni sa cakacaka tiko ki na noda bula na Veisorovaki i Jisu Karisito (raica na V&V 76:70).
Sa solia vei keda na Turaga e dua na idusidusi e tiko ena masu ni sakaramede ena noda vakasaqara na bula tawamudu ka sa vukei au ka rawa ni vukei iko. Eda sa sureti kina meda vakavouya na noda veiyalayalati ni papitaiso ena soqoni ni sakaramede yadua.
Eda sa yalataka meda daunanuma tikoga na iVakabula. Na ivakatakarakara ni Nona solibula ena vukea meda na vakavinavinakataka na cecere ni isau sa mai sauma me vorolaka kina o Koya na ivesu ni mate, me solia vei keda na loloma vakalou, ka vakarautaka me vosoti na noda ivalavala ca kevaka eda sa digitaka meda veivutuni.
Eda yalataka me da maroroya na Nona ivakaro. Ni da wilika na ivolanikalou kei na nodra vosa na parofita era bula tiko ka vakarorogo vei ira na dauvunau vakauqeti vakayalo ena noda soqoni ni sakaramede ena vakavotuya vei keda na noda veiyalayalati meda cakava vakakina. Na Yalo Tabu ena vakavurea ki na noda vakasama kei na yaloda na ivakaro eda gadreva dina sara meda maroroya ena siga o ya.
Ena masu ni sakaramede, e yalataka tiko kina na Kalou me tala mai na Yalo Tabu me mai tiko vata kei keda (raica na Moronai 4:3; 5:2; V&V 20:77, 79). Au raica ni sa rawa vua na Kalou ena gauna o ya me solia vei au meu vakila ni vaka au sa vakatarogi tiko. E vakaraitaka vei au na veika au sa vakayacora e vakalomavinakataki Koya, niu sa gadreva dina na veivutuni ka meu vosoti, kei na yacadra kei na matadra na tamata e vinakata o Koya meu qarava ena Vukuna.
Ena kena vakayacori tikoga o ya, ena veiyabaki sa mai vuki na inuinui me dua na yalo ni loloma ka kauta mai e dua na veivakadeitaki ni sa mai soli vei au na loloma vakalou mai na Veisorovaki kei na Tucaketale ni iVakabula.
Au vakadinadinataka ni o Jisu na Karisito sa tucaketale, na noda iVakabula, ka sa noda ivakaraitaki ka idusidusi uasivi duadua ki na bula tawamudu.
Veivakavulici mai na iTukutuku Oqo
E dodonu me da “vakamacalataka na ivakavuvuli ni vola tabu me [da] kila ka taurivaka ena [noda] bula” (1 Nifai 19:23). Sa rawa mo wilika na masu ni sakaramede, e tiko ena Vunau kei na Veiyalayalati 20:76–79. Ni wiliki oti na ivakavuvuli nei Peresitedi Eyring baleta na masu ni sakaramede, sa rawa mo sureti ira o vakavulica tiko mera vakasamataka na sala eso ena rawa me idusidusi kina ki na nodra bula na masu oqo ka vukea mera lesu mai ka laki bula vata tale kei na Tamada Vakalomalagi kei Jisu Karisito.
iTaba mai vei Matthew Reier; He Is Risen, mai vei Del Parson, ka me kakua ni lavetaki.