Vagolei ki Valetabu
E vuqa vei ira na tamata vinaka, na valetabu e veivakauqeti vakayalo ka rawa ni curuma vakatotolo sara na yalo ni tamata.
Ni bera niu mai kacivi meu lewe ni iKarua ni Kuoramu ni Vitusagavulu, keirau a veiqaravi tu vakaveiwatini ena vica na yabaki ena Valetabu mai Campinas kei São Paulo Brazil. Ena valetabu ruarua oqo, au dau kurabuitaka tu na nodra vakauqeti o ira era dau lako sivita na valetabu ka ra dau tu vakadua, curu yani, ka vakataroga na valetabu.
Ni ra sa curu yani, keimami dau tukuna vei ira ni sega ni rawa mera lako sara i loma ke sega na vakavakarau vakadodonu. Keimami sa dau qai vakamacalataka na inaki ni valetabu, wasea eso na ivakavuvuli taumada ni kosipeli, ka sureti ira mera veivosaki kei ira na daukaulotu. E vuqa vei ira na tamata vinaka, na valetabu vakai koya sa dua na kaulotu cecekia baleta ni vakauqeta na yalo ka rawa ni curuma vakatotolo na yalo ni tamata.
O Elizabeth na watiqu, kei au, keirau kila sara ga vakai keirau na kaukauwa ni yalo vaka o ya. Voleka ni 40 na yabaki sa oti, a dau tekivu vakamacalataka tiko mai na kosipeli vei keirau, e dua na itokani ka ilawalawa vinaka, ka lewe ni Lotu. Eso na gauna, a vakauti rau mai na daukaulotu vei keirau. Keirau a taleitaki rau na daukaulotu ka lomavata me keirau tauri lesoni, ia keirau a sega sara ni taleitaka na ka rau a vakavulica tiko
A qai yaco na veisau ena Okotova ni 1978, ena gauna a sureti ira kina eso na itokani o noqu ilawalawa oqo, oka kina o keirau, ki na kena dolavi raraba na Valetabu e Paulo Brazil. A sauma ga vakai koya e vica na basi me rawa ni ra laki tomani koya na nona itokani ki valetabu, ka 50 na maile (80 na kilomita) na kena yawa.
Ni sa butuka yani o Elizabeth na tobu ni papitaiso, a vakila e dua na ka e se bera mada ni sotava e liu, oqo na ka e qai kila e muri ni Yalo Tabu. E vakila na reki cecere ki na yalona. Sa kila sara ga ena gauna o ya ni sa dina sara na Lotu ka sai koya oqo na Lotu me sa na lewena.
Au a vakila talega na yalo vakaoqo ni sa cava na siga dolavi raraba oqo, ena gauna keitou sa vakacurumi yani ki na rumu ni veivauci ka vakavulici na ivakavuvuli ni matavuvale tawamudu. E tarai au saraga na vunau o ya. Au vakaitutu cecere ena noqu cakacaka, ia au vakila na lala balavu tu mai ni yaloqu. Au sega ni kila na cava mena vakatawana na tikina lala o ya, ia au vakila ni sa baleta tiko na matavuvale. E kea, ena loqi ni veivauci, sa tekivu me biubiu donu mai na veika oqo ki na noqu vakasama kei na yaloqu.
Ena loma ga ni vica na siga, rau sa veitaratara tale mai na daukaulotu. Ena gauna oqo keirau sa gadreva sara me keirau rogoca na nodrau itukutuku.
Rau a veivakauqeti na cauravou daukaulotu me keirau masulaka vagumatua na dina. Au sa nanuma kina ni oqo ga na sala meu na masu kina. Au kila ni sega ni rawa meu vakadeitaka meu lewena na Lotu ke sega ni dua na noqu ivakadinadina bula. Au sa maqusa sara meu taroga na Tamada Vakalomalagi meu kerea e dua na veivakadeitaki mai Vua, ia ena gauna vata oqo, au kila ni na sauma mai o Koya. Au a wasea Vua na titobu ni gagadre ni yaloqu ka kerei Koya me solia mai vei au na kena isau me vakadeitaka ni noqu lewena na Lotu sa salatu dodonu.
Ena macawa e tarava ena Matawilivola ni Siga Tabu, a dabe toka e dakuqu na itokani a sureti keimami ki na dolavi raraba ni valetabu. A kala mai liu ka vosa mai. Na ka a tukuna mai a sauma sara ga vakadodonu na veika au a masulaka tiko. Sa sega tale niu vakatitiqataka ni sa vosa tiko mai vei au na Tamada Vakalomalagi mai vua. Ena gauna o ya, au a dua na tamata voravora, yalo kaukauwa, ia a waicala vakadua na yaloqu kau sa tekivu tagi. Ni sa vosa oti o noqu itokani, a sureti keirau vakaveiwatini me keirau papitaiso. Keirau a vakadonuya
Ni se bera ni oti e dua na vula mai na veika keirau a sotava ena valetabu e São Paulo, keirau a papitaiso ka vakadeitaki ena 31 ni Okotova, 1978. Ena siga e tarava keirau a vakaitavi ena ikarua ni soqoni ni vakatabui ni Valetabu e São Paulo Brazil. Ni oti e dua na yabaki keirau a lesu ki na valetabu vata kei rau na luvei keirau tagane ka vauci vata vakamatavuvale. A totoka dina na soqo e tolu oqo, ka daunanumi tikoga. Keitou sa tomana tiko na kena vakatorocaketaki na yalo vakaoqo ena sokalou vakawasoma e valetabu ena veiyabaki e tarava.
Nikua ni mai oti e ruasagavulu ka walu na yabaki ni oti na neirau papitaiso, keirau sa mai tu tale oqo ena Valetabu e São Paulo Brazil. Au se qai kacivi ga oqo meu peresitedi ni valetabu. E vakalomavinakataki keirau na kila oqo me keirau curuma lako na lalaga ni vale ni Turaga ka vakila tale na lomavinaka o ya sa mai veivakauqeti tiko ni veivosaki.
Sa kauta tiko ga mai na valetabu vei keirau vakaveiwatini na marau cecere. Ni keirau raica e dua na veiwatini gone me rau curuma na valetabu me rau vauci vakamatavuvale tawamudu, keirau vakila na inuinui e cecere.
E vuqa na tamata e vuravura era sa tu vakarau mera rogoca na itukutuku ni kosipeli. Rau vakila e dua na karamaca e tautauvata kei na kena a yaco vei au ena 30 na yabaki sa oti. E kaukauwa sara na valetabu kei na kena cakacakatabu vakalotu me vakaotia na karamaca o ya ka vakatawana na lala ni lomadrau.
iTaba mai vei Laureni Fochetto