iVolalailai ni Koniferedi ni Epereli
Vulica Vata na Vosa mai na Koniferedi
E vakaitikotiko o Greg Batty mai Utah, e Amerika.
Ni da veisautaka na ivakarau ni noda raicalesu na koniferedi ena vakarabailevutaka na noda veivosakitaka vakamatavuvake na kosipeli.
Sa vakayabaki mai oqo na neitou marautaka tiko vakamatavuvale na wilika na ilavelave ni koniferedi, vakayadudua ena dua na gauna. Keitou tekivu, ena neitou soqoni vata ga mai ena teveli ka wilika e cake na tamata yadua e dua na parakaravu. Ia keitou a raica ni sa wiliki ga me tasevu yani, ka sega mada ni cegu me digovi mada na itukutuku.
Ena kena gadrevi me yaga vakalevu na veika keitou wilika tiko, keirau a volia na veiwatini e dua na ilavelave ni tukutuku ni koniferedi me ratou yadua na lewe ni matavuvale ka tuvanaka na levu ni vosa e gadrevi me wiliki ena veimacawa me rawa ni wiliki taucoko kina ni bera na koniferedi raraba e tarava. Eso na macawa keitou dau wilika e dua na vosa, kei na macawa tale eso e dau rua, ia na tamata yadua me vulica na vosa ka makataka na tikina era taleitaka. Ena lotu vakamatavuvale keitou sa qai veivakavulici vakai keitou mai na wase sa makataki tu.
E ratou taroga na luvei keirau na veika e vakavurea na veivosaki, se keirau taro na veiwatini mai na veika keirau a vulica. Keirau vakamareqeta na nodratou vakamacalataka na gone na isau ni veitaro o ya, ka ratou wasea na veika sa vulici ena semineri, ena lotu, se ena nodratou vuli yadudua. Sa laki yaco oqo me dua na sala cecere ni rogoca na neitou dui ivakadinadina ena gauna vakarautaki e marautaki, ka veivakacegui.
E totolo sara na neitou raica ni sa laki tuvanaki vakaoqo na neitou vuli ivolanikalou ena mataka lailai. Eso na siga keitou dau rawata ga e vica na tikina ka sa toboki keitou koso na gauna ena vuku ni veivosaki baleta na veitikina oqori kei na kena vakayacori ki na veika e yaco volivoliti keitou tiko.
Sa mai vakasinaiti na neitou veimataka lailai ena veivosaki, veidredrevaki, kei na duavata ni bera ni keitou gole yani ki na neitou dui cakacaka. E qaqaco vinaka tu na neitou ivakadinadina me baleta na ivakasala ni noda parofita o ya meda vuli ka masu vata ena veisiga. Sa mai mataliataki na neitou matavuvale ki na kena e yaco kina na vuli kei na veivaqaqacotaki vakai keitou. Na veika kece oqo sa isau ga ni kena gadrevi me rawati vakalailai cake tale mai na koniferedi raraba.
iTaba mai vei Aubry Startin © IRI