Veiyalayalati ni Valetabu

Wilika ka masulaka na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira kina na marama oqo me yaco na iSoqosoqo ni Veivukei me dua na tiki bulabula ni nomu bula vakai iko. Me ikuri ni itukutuku, gole ki na reliefsociety.lds.org.

iVakatakilakila

Drega ni iSoqosoqo ni Veivukei

Vakabauta, Matavuvale, Veivukei

“Na veicakacaka vakalotu eda ciqoma ena valetabu ena vakatara vei keda meda lesu tale vei Tamada Vakalomalagi ena dua na siga ena dua na isema vakamatavuvale e tawamudu ka da vakalougatataki ena kaukauwa mai lomalagi e veiganiti vinaka kei na solibula kei na veisasaga yadua,”¹ e kaya o Peresitedi Thomas S. Monson. Kevaka o se bera ni curuma na valetabu, sa rawa mo vakarautaki iko mo ciqoma na cakacakatabu vakalotu ni valetabu ena nomu:

Vakabauta na Tamada Vakalomalagi, Jisu Karisito, kei na Yalo Tabu.
Susuga cake e dua na ivakadinadina ni Veisorovaki nei Jisu Karisito kei na kosipeli vakalesui mai.
Tokona ka muria na parofita bula.
Me ganiti iko na ivolatara ni valetabu ena nomu bula savasava, rokova na Vosa ni Vuku, saumi ikatini vakadodonu, ka bulataka na ivakavuvuli ni Kalou.
Solia na nomu gauna, taledi, kei na nomu iyau mo veivuke ena kena tarai cake na matanitu ni Kalou.
Vakaitavi ena volai ni kawa ni matavuvale.²

E tomana o Peresitedi Monson na nona veivakavulici, “Ni da nanuma na veiyalayalati eda cakava e loma [ni valetabu], sa na rawarawa cake kina vei keda me da sotava na veivakatovolei ka da vakamalumalumutaka na veivakatovolei,”³

Mai na iVolanikalou

Vunau kei na Veiyalayalati 14:7; 25:13; 109:22

Mai na Keda iTukutuku Makawa

“E sivia ni 5,000 na Yalododonu Edaidai era osota yani na Valetabu e Nauvoo ni oti na kena vakatabui. …

“Na igu, kaukauwa, kei na veivakalougatataki ni veiyalayalati ni valetabu [era tokoni ira tu] na Yalododonu Edaidai ena nodra ilakolako [ki na ra], ena nodra [sotava] na batabata, na katakata, viakana, tauvimate, vakacala-ka, kei na mate,”⁴

Me vakataki ira e vuqa na marama ena iSoqosoqo ni Veivukei, a cakacaka o Sarah Rich ena valetabu. A qai kaya e muri o koya: “Kevaka me a sega na vakabauta kei na kila-ka ka soli vei keimami ena valetabu o ya ena veivakauqeti … ni Yalo ni Turaga, na neimami ilakolako ena vaka ni dua e rika yani ki na vanua butobuto. … Ia keimami vakabauta na Tamai Keimami mai Lomalagi, … ni keimami nanuma ni sai keimami na Nona tamata digitaki … , sa sega kina na rarawa, keimami nanuma me keimami reki ni sa yaco mai na neimami siga ni veisereki.”⁵

Na ilakolako oqo a sega ni nodra “rika yani ki na vanua butobuto” na marama yalodina ni Yalododonu Edaidai. Era a tokoni mai na nodra veiyalayalati ni valetabu.

The End of Parley Street, mai vei Glen S. Hopkinson, ka me kakua ni lavetaki