Sa Boko Mai na Talevoni
Seda Meliksetyan, Armenia
Ena Maji 1997, ni keirau se vakaitikotiko ena siti o Rostov-on-Don, mai Rusia, keirau a papitaisotaki vakaveiwatini ki na Lotu i Jisu Karisito ni Yalododonu Edaidai.
Niu vulica na ivakavuvuli ni Lotu, a saumi mai kina e vuqa na noqu vakatataro. E ka taleitaki na vulica na veika e baleta na yavu ni veivakabulai, oka kina na kena vakayacori na papitaiso ena vukudra na mate Au kurabui niu vulica ni sa rawa meda papitaisotaki ena vukudra na noda qase era sa takali.
Ni oti e dua na yabaki na neirau papitaiso, a sureti keirau o peresitedi ni kaulotu me keirau vakavakarau ki na ilakolako ki valetabu. Me tiki ni neirau vakavakarau, keirau sa tekivu cakava na vakadidike ni tuva kawa. E dua na siga niu vakasamataka tiko meu sa tekivu cakava, sa taqiri na talevoni. Oqo o tinai watiqu. Au a kerei koya ke rawa ni vakauta mada mai na yacadra na qase era sa takali ena matavuvale nei watiqu. A kurabui sara o koya ka kaya mai vei au ni papitaiso ena vukudra na mate e sega ni ivakavuvuli i Karisito ia e dua ga na ka era bulia na Momani. Au sega ni kila meu sauma vakacava na nona vosa baleta ni se sega tiko ni matata vei au na kena tiki ni ivolanikalou e tokona na ivakavuvuli oqo.
Niu se vakasamataka tikoga na ka meu kaya lesu, sa boko mai na talevoni. Au veilecayaki vakalailai ena veika sa yaco, ia au sa mani biuta tale na talevoni ka gole ki na noqu rumu. Au sa qai taura na Veiyalayalati Vou tekiduru ka masu, ka kerea vua na Tamada Vakalomalagi me vakatakila vei au na kena isau.
Ni oti na noqu masu, au a dolava na iVola Tabu. Au vakila ni vaka e dua e tukuna vei au meu wilika na tikina e 29 ena draunipepa au sa cega. O ya na ika 15 ni wase ni 1 Korinica, ka vakamacalataka tiko na ivakavuvuli ni papitaiso ena vukudra na mate.
E tarai au kau kurabui ni sa sauma mai na Tamada Vakalomalagi na noqu masu ena gauna sara ga o ya. Sa dua na ka vinaka.
Au se vakasamataka sara toka vakabibi na ka oqo sa taqiri tale mai na talevoni. O ya o tinai watiqu, ka taroga mai na vuna sa boko kina na talevoni. Au sa mani kaya vua niu sega ni kila kau a kerei koya me dolava mada na nona iVola Tabu ka wilika na 1 Korinica 15:29.
Ni oti toka e vica na siga sa biu toka ena noqu teveli na yacadra era sa takali yani. Sa mai wilika o tinai watiqu na ivolanikalou ka sa vakabauta oqo ni iVakabula, a vakavulica vei ira na iApositolo na ivakavuvuli ni papitaiso ena vukudra na mate.
Sa yalataka kina na Kalou na veivakalougatataki cecere kivei ira era vakayacora na cakacaka ni veivakabulai oqo. Au kila ni dina na ka oqo.