ʻE founga fēfē haʻaku fakahoko ha pōtalanoa fekauʻaki mo e ongoongoleleí kapau ko e meʻa pē ʻa e tokotaha kehé ia ʻoku faí ko e feinga ke tipeití? ʻOku ʻikai fie fanongo ʻa e kakai peheé ki he fakamoʻoní.
ʻE lava ʻo tokoni ʻa e fakakaukau leleí mo e fakaʻuhinga meʻá ke mahino ai kiate kitautolu ʻa e moʻoní, pea ʻoku lava foki ke fai ha ngaahi fakafepaki ʻi he fakaʻuhinga lelei ʻo taukaveʻi ʻa e Siasí mo hono ngaahi akonakí. Ka ko e taimi pē ʻoku mahuʻingaʻia ange ai ha taha ia ke ikunaʻi ha fakakikihi lea kae ʻikai ko e mahino ʻo e tui ʻa ha tahá, ʻe hoko maʻu pē ai ʻa e fakakikihí. Tuʻu maʻu ʻi hoʻo fakamoʻoniʻi ʻa e meʻa ʻokú ke tui mo ʻilo ʻoku moʻoní.
Kapau ʻoku taʻe ʻunua e fakakikihi e taha ʻokú ke talanoa mo iá, ʻai ke ʻilo ʻe he taha ko iá ʻokú ke fakaʻapaʻapaʻi e meʻa ʻoku tui ki aí ka kuo pau ke mo felotoi ʻoku ʻikai te mo tui tatau. ʻOku ʻikai kaveinga ʻaki e fepōtalanoaʻaki ʻo e tui fakalotú ke “mālohi.” Pea kapau te ke aʻu ʻo fakakikihi pe ʻita, he ʻikai ke ke hoko koe ai ko ha sīpinga ʻo e meʻa ʻoku tau tui ki aí, pe ʻe ʻiate koe ʻa e Laumālie Māʻoniʻoní.
Naʻe akoʻi ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá ko e taimi ʻoku tau talanoa ai ki he kakaí fekauʻaki mo e Siasí, “ʻI heʻetau hoko ko e kau ākonga moʻoní, kuo pau ke tau ʻuluaki tokanga ki he lelei ʻa e niʻihi kehé, kae ʻikai ko hono fakamoʻoniʻi ʻetau totonú. ʻOku hoko ʻetau fakamoʻoni ongoʻi lotó ko e tali mālohi taha ia te tau lava ʻo fai ki he kakai ʻoku nau tukuakiʻi kitautolú. Pea ko e ngaahi fakamoʻoni peheé ʻoku toki lava pē ke fai ʻi he ʻofa mo e angamalū.”1
Pea ko ʻeku lea mo ʻeku malangá, naʻe ʻikai ʻi he ngaahi lea fakaoloolo ʻo e poto ʻo e tangata, kae ʻi he fakamoʻoni ʻo e Laumālie mo e mālohi.” (1 Kolinitō 2:4). Neongo he ʻikai ke ne liliu ha fakakaukau ʻa ha taha, ka ʻoku totonu ke ke fai hoʻo fakamoʻoní pea ʻai ke ʻilo ʻe he kakaí ʻa e meʻa ʻokú ke tui ki aí. Pea ko e taimi te ke vahevahe ai ʻa e ongoongoleleí, ʻe ala mahuʻinga tatau pē ʻa e founga hoʻo leá mo e meʻa ʻokú ke leaʻakí. Lea fakalelei pē ʻi he ʻofa. Muimui ʻi he Laumālié pea ʻe ueʻi koe ke ke ʻilo ʻa e meʻa ke ke leaʻakí (mo e meʻa ke ʻoua te ke leaʻakí) pea mo e founga ke ke tali ʻakí.