Nofo ʻi Keipi Tauni
Niki Pekoini Sāmita, ʻIutā, USA
Talu mei he’eku ngāue fakafaifekau ʻi he Misiona ʻIngilani Lonitoní, mo ʻeku fie foki ʻo nofo pea mo ngāue ai. Naʻá ku fakakaukau ʻi he toki ʻosi ko ʻeni hoku mataʻitohi MA, mahalo ko e taimi totonu ʻeni ke u hiki ai ki Lonitoni. Ne u kumi ʻo maʻu ha ngāue mou ongoʻi lelei fekauʻaki mo e hiki ko ʻení.
Ka, ʻi ha pō ʻe taha, naʻá ku lotu ai ke fakapapauʻi ʻa e finangalo ʻo e ʻEikí pea mo ʻilo pe ʻoku totonu ke u hiki ki Lonitoni. Naʻe haʻu maʻu pē ki heʻeku fakakaukaú ʻi he lolotonga ʻo ʻeku feinga ke mohé: “ʻOku fie maʻu ke ke nofo ʻi Keipi Tauni.” Naʻe toutou haʻu ʻa e fakakaukaú ni ʻo lauhoua. Fāifai peá u pehē ʻoku fie maʻu au ʻe he ʻOtuá ʻi Keipi Tauni. Ko ia, neongo naʻá ku siʻi fie hiki, ka naʻá ku fakakaukau ke u nofo. ʻI he ʻosi pē iá, ne u tō leva ʻo mohe.
Naʻá ku kamata ʻi he ʻaho pē hono hokó ke toe fakakaukauʻi ʻa e meʻa naʻe hoko ʻi he pō kuo maliu atú pea mo kei fifili pē ʻe kei hoko ai pē ʻeku ʻalu ki Lonitoní. Ka ʻi he pō hokó, ne toe kamata ke hoko ʻa e meʻa ne hoko ʻi he pō ki muʻá. Naʻe toutou haʻu pē ʻa e fakakaukau, “ʻOku fie maʻu ke ke nofo ʻi Keipi Tauní.” ʻI heʻeku fakalaulauloto ki he ngaahi fakakaukau ko ʻení¸ naʻá ku fakapapauʻi leva ʻoku fie maʻu moʻoni ʻe he ʻEikí ke u nofo pē ʻi Keipi Tauni, pea naʻá ku loto ke u fai e meʻa ʻoku finangalo e ʻEikí ke u faí.
ʻI he uike hono hokó, ne telefoni mai ʻeku palesiteni fakasiteikí ʻo kole mai ke ma talanoa. Naʻá ku ʻilo he taimi pē ko iá ʻoku ʻi ai ha fatongia ʻoku finangalo e ʻEikí ke u fai. Naʻe fakamoʻoniʻi ʻe he Laumālié ko e ʻuhinga ʻoku fie maʻu ai ke u nofo ʻi Keipi Tauní he naʻe ʻi ai ha ngāue ʻa e Eikí ke u fakahoko.
Naʻá ku tali ʻa e ui ke hoko ko e palesiteni ʻo e Kau Finemuí ʻi he siteikí, pea ʻi he lolotonga ʻo ʻeku ngāue ai ʻi he ngaahi taʻu siʻi hono hokó, naʻá ku lava ai ʻo hoko ko ha meʻangāue ʻi he toʻukupu ʻo e ʻEikí. Ko hono olá, naʻe tāpuekina ʻeku moʻuí mo e siʻi moʻui ʻa e kakai naʻá ku tokoni ki aí. Naʻá ku tupulaki ʻi he tuʻunga fakatakimuʻá, pea naʻe akoʻi au ʻe he ʻEikí ha ngaahi meʻa lahi ʻo fou ʻi heʻeku tokoni ki he kakai kehé.
Talu mei ai mo ʻeku fakatupulaki ha falala lahi ange ki he ʻEikí. ʻOku ou fakafetaʻi lahi ʻi he ngaahi ueʻi vanavanaiki ʻa e Laumālié ʻa ia naʻá ne tataki au ʻou ʻilo pea mo fakahoko Hono finangaló. ʻI he fakasiʻisiʻi ange ʻo ʻeku veiveiuá ka u loto fiemālie ke muimui ʻi he tataki fakalaumālie naʻá ku maʻú, kuo taki ai au ke u aʻusia ha fiefia pea mo ha nonga lahi ange, ʻi heʻeku ʻiloʻi ʻoku hōifua ʻeku Tamai Hēvaní ʻi heʻeku moʻuí.