ʻOku ʻOmi ʻe he Vahehongofulú ʻa e Nongá

Likato Leiesi Vilalata, ʻEla Salavatoa

ʻOku ou falala maʻu pē ki he ʻEikí mo ʻEne ngaahi fekaú. Ka neongo ia, ko e taimi naʻe tūʻulu ai ʻa e tuʻunga fakaʻekonōmiká, ne mole ʻeku ngaahi houa ngāue ʻovataimí pea tuʻusi mo hoku vāhengá. Naʻe ʻikai ke u totongi vahehongofulu ʻou pehē ʻoku mahino pe ki he ʻEikí. ʻI he taimi tatau, ne ʻalu hake hoku moʻuá kae holo hifo lahi ʻeku sieké.

Naʻe talamai ʻe hoku kāinga ʻe niʻihi ʻi heʻenau fakatokangaʻi ʻeku faingataʻaʻiá, neongo ʻa e ngaahi meʻa kotoa, ʻoku totonu ke totongi ʻeku vahehongofulú koeʻuhí he ʻe tokoni ʻeni ke u ikunaʻi ai hoku ngaahi faingataʻaʻiá. Ka naʻá ku fakaiku totongi maʻu pē ʻe au hoku ngaahi moʻuá. Naʻá ku loto fiemālie ke totongi e vahehongofulú ʻi ha taimi ʻe tuʻunga lelei ai hoku tuʻunga fakapaʻangá, ka naʻá ku manavasiʻi ʻi he taimi naʻe fetōʻaki ai hoku tuʻunga fakapaʻangá (vakai, Mātiu 14:28–31).

Lolotonga haʻaku foki ki ʻapi mei he ngāué ʻi ha efiafi ʻe taha ʻi he ʻosi e maʻu ʻeku vahé, naʻá ku fakakaukau ke totongi kotoa hoku ngaahi moʻuá. Naʻá ku kuikui peá u lotu, “Tamai, ko e hā e meʻa te u faí?” ʻI he momeniti ko iá, naʻe ʻāʻā hake hoku matá ʻo u fakatokangaʻi he ʻato ʻo e pasí ha pousitā ʻo Pita ʻi heʻene ngalo hifo ki he tahi hoú kae mafao atu ʻa e toʻukupu ʻo e Fakamoʻuí ke fakahaofi ia. Naʻe ʻi he konga ki lalo ʻo e pousitaá ʻa e fakalea, “Tui Taʻe-veiveiua.” Naʻá ku fakatokangaʻi ʻoku fie maʻu ke totongi ʻeku vahehongofulú kapau ʻoku ou fakakaukau ke totongi kakato hoku ngaahi moʻuá.

ʻI he taimi naʻá ku aʻu atu ai ki ʻapí, naʻá ku kumi leva ha sila ʻo faʻo ki loto ʻeku vahehongofulú. ʻI he taimi naʻá ku fakapipiki ai ʻa e silá, naʻá ku ongoʻi ʻa e lea, “ʻOku lelei ʻa e meʻa kotoa” pea mo ongoʻi ha fiefia naʻá ne ʻomi ha nonga ki hoku laumālié.

ʻOku ou ʻilo ʻe ʻomi ʻe he ʻOtuá ʻEne ngaahi tāpuakí ki heʻeku moʻuí ʻi he taimi te Ne ʻafioʻi ai ʻoku feʻunga ke fakahoko iá. Ka, ki muʻa aí, ʻe kei hou pē ʻa e tahí, ka ʻoku feʻunga pē ʻa e nonga ʻoku ou maʻu ʻi he talangofua ko iá.