O Le Vaegaau e Sili ona Malosi
Ata na tusia e Scott Greer
Na ou fuafua ia avea ma se fitafita i le vaegaau. Ae ina ua ou mafaufau i lou lumanai, na ou manatua le fesili a lou tina, “O afea ua e fuafua ai e te auauna atu faamisiona?”
Talu mai lava lou laitiiti, na ou fiafia lava i tala a taitai o le Ekalesia o e na auauna atu i vaegaau faaauupegaina. O le toatele o i latou na avea ma ni toa o le taua ma ni faataitaiga maoae o le lototoa ma le lotomaualalo i o latou atunuu. O o latou aafiaga na musuia ai au e auai i le militeli a lou atunuu.
Ina ua 13 ou tausaga, na ou ulufale atu i se aoga na lauiloa i le matua faatauaina o le puleaina faamiliteli ma aoaoga faafitafita. Sa faigata lava le faasologa o au mea e fai. Sa matuai ou lelava lava i le faaiuga o le aso lea sa foliga mai ai ua le mafai ona fai au suesuega o tusitusiga paia ma auai i le seminare.
E oo atu i lou tausaga lona lua i le aoga, ua ou faia ni fuafuaga mo lou olaga: pe a maea le aoga i le 18 tausaga, o le a ou alu sao loa i le aoga fitafita ma faauu ai i le fa tausaga mulimuli ane o se fitafita i le Vaegaau a Kuatemala. Ua foliga mai o ou moomooga ma miti uma lava ua amata ona taunuu.
Na ou tau atu au fuafuaga i lou tina i se tasi aso, ma na fesili mai o ia, “O afea ua e fuafua ai e auauna atu faamisiona?” Na amata mai lena aso ona pipii pea lana fesili i lou mafaufau i taimi uma lava ou te mafaufau ai i lou lumanai.
Sa i ai pea lau faasologa maioio o mea e fai, ae na amata ona ou faaalia le fiafia atili i au aoaoga faaleagaga. Na amata ona ou auai i le seminare, galulue faatasi ma faifeautalai faamisiona, ma auai i gaoioiga a le Ekalesia. I le mulimuli ai i le fautuaga a lou uso matua sa auauna atu faamisiona, na amata foi ona ou faitauina le Tusi a Mamona.
A o aoaoina au ia avea ma se tagata e oso i le faamalulele, sa matuai faigata lava a matou aoaoga i aso uma. Matou te foi atu i o matou faleie toetoe lava a fetolofi, ae na ou mauaina pea le malosi e faitau ai le Tusi a Mamona. O le faitauina i aso uma o tusitusiga paia na faamalosia ai lou agaga ma fesoasoani ai ia te au e faaauau a’u aoaoga faamasani.
Na potopoto faataaliolio i lou moega au uo i se tasi afiafi ma fesili mai nai fesili e uiga i le Tusi a Mamona ma le Upu o le Poto. O lou avanoa lea ia avea ai ma se fitafita sili—o se tasi e puipuia le upumoni ma aumaia le saolotoga e ala atu i se molimau mausali ma le talitonuina o le Tusi a Mamona.
Ina ua 19 ou tausaga, sa ou toe lesitala i le vaegaau—o le vaegaau a le Atua, o le vaegaau sili ona malosi i vaegaau uma. Na ou maua le avanoa o le tutu soosoo tauau ma alii ma tamaitai faifeautalai totoa o Siona i le autau o le Misiona a Mekisiko Puebla. I le faaofuina i le ofutau a le Atua, na matou folafola atu le talalelei ma tau mo le saolotoga i le lototele ma le malosi.
O loo tatou tau ma le autau o le pogisa, ae o le manumalo e a le Atua ia. Ou te manao e faaauau pea ona avea ma fitafita toa, e tau mo lo tatou Tupu. O loo ia i tatou ni mea tau malolosi: o le Tusi a Mamona, le Agaga Paia, ma le atoaga o le talalelei. Ua taitaiina i tatou i le manumalo e ni perofeta soifua. Afai tatou te aoaoina ma saunia i tatou lava mo le afio mai o lo tatou Faaola, o Iesu Keriso, o le a Ia tuuina mai ia i tatou ni palealii o le manumalo i le mamalu selesitila.