O I Latou o I Ai Manaoga Faapitoa ma le Auaunaga o loo Tuuina Atu

Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalolosia ai ou uso ma avea ai le Aualofa ma se vaega ola o lou lava olaga.

Ata

Faamaufaailoga a le Aualofa

Faatuatua, Aiga, Toomaga

“E i ai lava manaoga o isi,” na saunoa ai Peresitene Thomas S. Monson, “ma e mafai e i tatou uma taitoatasi ona faia se mea e fesoasoani ai i se tasi. … vagana ua tatou faamaumau o tatou ola ona o isi, o le a itiiti se faamoemoega o o tatou lava olaga.”¹

I le avea ai ma ni faiaoga asiasi ua mafai ai ona tatou iloa ma alolofa ma le faamaoni i uso taitasi o loo tatou asia. O le a tafe fua atu lava auaunaga ia i latou tatou te asia ona tatou te alolofa i ai (tagai i le Ioane 13:34–35).

E mafai faapefea ona tatou iloa ia manaoga faaleagaga ma le faaletino o o tatou uso ina ia mafai ai ona tatou tuuina atu le auaunaga pe a manaomia? I le avea ai ma ni faiaoga asiasi, ua tatou maua ai le aia tatau o le mauaina o se musumusuga pe a tatou tatalo mo i latou tatou te asia.

O le faatumauina o le fesootaiga faifai pea ma o tatou uso e taua foi. O asiasiga patino, valaau atu i le telefoni, o se tusi faamalosiau, i-meli, saofai faatasi ma ia, se upu faalaeiau faamaoni, aapa atu ia te ia i le lotu, fesoasoani atu ia te ia pe a ma’i po o se mea e manaomia, ma isi galuega tau auaunaga e fesoasoani uma lava ia i tatou e tausia ma fefaamalosiau ai i le tasi ma le isi.²

Ua talosagaina faiaoga asiasi e lipoti atu le soifua manuia o uso, soo se manaoga faapitoa ma le auaunaga o loo tuuina atu ia i latou. E fesoasoani ia ituaiga lipoti ma a tatou auaunaga i o tatou uso e faaalia ai lo tatou tulaga o le avea ai ma soo.³

Mai Tusitusiga Paia

Ioane 10:14–16; 3 Nifae 17:7, 9; Moronae 6:3–4

Mai lo Tatou Talafaasolopito

O le auauna atu i isi ua avea lava pea ma faamoemoega tutotonu o faiaoga asiasi. O le faatinoina o auaunaga faifai pea o le a tatou aumaia ai le agalelei ma le faauoga lea e sili atu nai lo asiasiga faalemasina. E taulia lo tatou amanaiaina o i latou.

“O lo’u faanaunauga o le talosagaina lea o o tatou uso ina ia soia le popole e valaau i se telefoni po o se asiasiga faalekuata pe faalemasina,” o le tala lea a Mary Ellen Smoot, o le peresitene aoao lona 13 o le Aualofa. Sa talosaga mai ia i tatou ina “ia taulai atu i le faafaileleina o agaga mu’amu’a.”⁴

Sa aoao mai Peresitene Spencer W. Kimball (1895–1985) faapea, “E taua tele lo tatou auauna atu o le tasi i le isi i le malo.” Peitai sa ia silafiaina e le o auaunaga uma e tatau ona avea ma se tulaga lototoa. “E tele naua taimi, o a tatou aga o le auauna atu e aofia ai ni nai faamalosiauga faigofie po o le tuuina atu … fesoasoani i ni galuega masani,” sa ia saunoa mai ai, “ae maeu le matagofie o taunuuga e mafai ona tafe mai … nai galuega faatauvaa!”⁵

Ata na tusia e Matthew Reier