Sa Latou Saunoa Mai ia i Matou
O Outou o le Malamalama o le Lalolagi
A o tatou punouai ai i le galuega faafaifeautalai, e mafai ona tatou maua musumusuga mai faataitaiga a le Faaola, Alema, ma Iosefa Samita.
E tele lava ina faatatau ia faifeautalai ua maea misiona i le latou auaunaga o ni tausaga aupito sili ia o o latou olaga. Aisea e faapea ai lea tulaga?
Atonu ona o le olioli o le vaaia o se isi agaga ua sau i le Faaola (tagai i le MF&F 18:15). Atonu o se mea e faatatau i sootaga latou te lagonaina ma tagata sailiili, tagata liliu mai, tagata o le ekalesia, soa, ma peresitene o misiona. Ou te manatu o nei mea o ni vaega ia, ae ou te manatu foi o se mea e faatatau i le malamalama o le Faaola latou te lagonaina—ma le malamalama latou te faasoa atu i le tulaga o le auaunaga ma le molimau.
Tatou te iloa na faailoa mai e le Faaola o Ia lava o le Malamalama o le Lalolagi (tagai i le Ioane 9:5; 12:46). Ae peitai i le Lauga i luga o le Mauga, na Ia folafola atu ai le mea lava lea e tasi i Ona soo:
“O outou o le malamalama o le lalolagi outou.E le mafai ona lilo le aai ua tu i luga o le mauga.
“Latou te le tutuina foi le lamepa i le tuu ai i lalo o le mea e fua a’i saito, a e tuu i luga lava o le tuugalamepa ia pupula atu ai i e o i le fale uma.
“Ia pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.” (Mataio 5:14–16).
O le faasoaina atu o lo tatou malamalama—o lona uiga, o le faasusuluina atu o le malamalama o le Faaola (tagai i le 3 Nifae 18:24)—o se mea e mafai ona tatou faia uma lava i o tatou olaga, ma o se mea e tatau ona tatou amataina a o tatou talavou. A o tatou punouai i tofiga faafaifeautalai aloaia ma galuega faafaifeautalai i le olaga atoa, e mafai ona tatou vaai i tagata e toatolu o e, i lou manatu, o ni faataitaiga sili o lenei galuega: Alema, le Perofeta o Iosefa Samita, ma le Faaola. O le toatolu uma lenei, na matuai aafia ai lava lou malamalama i le taua o le galuega faafaifeautalai—i le faaalia o le malamalama o le Faaola i le lalolagi.
Alema: E Lotomaualalo
O aoaoga a Alema na matua’i uunaia ai lo’u faamoemoega e auauna atu i se misiona. E ui lava na faamautinoa mai e lo’u tina matua na papatiso au ina ua valu ou tausaga, ae sa seasea lava ou alu i le lotu i lou talavou. A matou fetaui ma faifeautalai a o avea au ma se talavou matua ma na amata ona ou mafaufau e uiga i le Ekalesia, sa amata ona ou suesue i tusitusiga paia. O le aoaoga a Alema e uiga i le faamalosia ia lotomaualalo e feteenai ma le filifili ia lotomaualalo na faateia ai au (tagai i le Alema 32:13–15). Na ou lagonaina lou le agavaa ona o au agasala, ae na ou manatu mamafa i ai—o le filifili e auauna atu i se misiona o le a manaomia ai se suiga taua. Ua i ai sau galuega ma sau lava pisinisi, ma na ou manao e faaipoipo ma lau uo teine (lenei, ua avea nei, ma ou toalua). Pe mafai ea ona ou lafoai na mea uma ina ia auauna ai i le Alii?
Na ou alu i se nofoaga patino ma faaalu ai se taimi—se taimi moni lava—e tatalo ma talanoa ai ma lou Tama Faalelagi. I le faalotomaualaloina o au lava ia, na oo ina ou iloa sa finagalo le Tama Faalelagi ia te au e auauna atu. Na tonu ia te au e mulimuli i Lana fetalaiga, ma i le faia o lea mea, na ou iloaina ai le moni o le folafolaga a Alema: “O le ua ia faalotomaualaloina moni o ia lava, ma salamo i ana agasala, ma tumau e oo i le iuga, o ia lava lea o le a faamanuiaina—ioe, e sili atu ona faamanuiaina nai lo i latou o e ua faamalolosia ia lotomaualalalo” (Alema 32:15).
E ui lava ua sili mamao i le 26 ou tausaga, na ou alu i lou epikopo, lea na fesoasoani e saunia au. Na ou lafoina au pepa o le misiona ma faatali mo ni masina. Mulimuli ane, na ou mauaina se valaauga e tau mai ai ia te au ou te le agavaa e auauna o se faifeautalai faamisiona ae mafai ona ou auauna i fesootaiga faalauaitele, le matata lea na ou galue ai. O se taimi fiafia tele. Na faia au aoaoga ma ou auai loa i talanoaga i faasalalauga i le taimi lava na faalauiloa aloaia ai le Ekalesia i Mekisiko e le malo o Mekisiko. Na ou fesoasoani e aoao tagata tomai faapitoa o siteki o le va i fafo ma faamautu sootaga ma taitai o le malo. O lenei avanoa e auauna atu ai na faamanuiaina ai au i auala e sili atu nai lo le mea e mafai ona ou faamatalaina ma auala semanu e le mafai ona ou mafaufauina. Na aafia ai le tele o vaega o lo’u olaga mo le lelei.
O lau auaunaga faafaifeautalai o le a avea ma le mea e tasi e sili ona taua e saunia ai oe mo lou olaga atoa. Na folafola mai e Peresitene Gordon B. Hinckley (1910–2008) i faifeautalai faaolioli: “O le taimi tou te faaaluina i le galuega faamisiona, afai o le a outou faaaluina na tausaga i auaunaga tuuto, o le a aumaia ai faamanuiaga sili atu ia te outou nai lo se isi lava lua tausaga o o outou olaga. … Afai e te auauna atu ma le faamaoni ma le lelei i se misiona, o le a avea oe ma se tane sili atu, o le a avea oe ma se tamā sili atu, o le a avea oe ma se tama aoga sili atu, ma se tagata faigaluega sili atu.”1 Afai o e i ai i le vaitausaga e auauna atu ai i se misiona faamamaluina, ia saunia nei e auauna atu. O faamanuiaga o le a outou maua o le a sili mamao atu i se isi lava osigataulaga atonu tou te faia.
Ou te iloa atonu e oo mai ia luitau a o outou mafaufau e auauna atu i se misiona. E faia e le fili mea uma na te mafaia e faavaivai ai le galuega a le Alii mai le agai i luma. Afai o e le mautinoa pe tatau ona e auauna atu i se misiona, ou te valaaulia oe ia e faalotomaualaloina oe lava ona e tootuli lea ma fesili atu i le Tama Faalelagi. Na Ia faaali mai Lona finagalo mo au, ma ou te iloa o le a Ia faia foi mo oe.
Iosefa Samita: Mauaina o se Vaaiga Faavavau
Na ou aoao mai ia Iosefa Samita o le taulai atu i le vaaiga faavavau e mafai ona faateleina ai lou tomai o se auauna a le Alii. E masani ona ou mafaufau pe na faapefea ona ia onosai i na mea uma na ia onosaia—o tofotofoga ae maise lava sauaga. Ae na oo ina ou malamalama ona sa vaai Iosefa i talaatu o le veli, na ia iloa ai o lenei olaga faaletino ua na o se vaega o la tatou malaga faavavau. Na ou mafaufau po o le a le mea o le a tupu ia te au pe ana ou malamalama i le mea na ia faia, ma a o mafaufau loloto i lenei mea, na oo ina ou iloa afai tatou te taulai atu iinei ma le taimi nei, ua faatapulaaina la tatou vaai. Pe a tatou faatumauina se vaaiga faavavau, tatou te malamalama i le taua tele o lo tatou tuuto atu i le fesoasoani atu i isi, laveaiina o isi, ma le tuuina atu o le molimau o upumoni ua tatou iloa.
Pe afai tatou te taulai atu, e pei ona faia e Iosefa, i mea mai se vaaiga faavavau, o le a se tele o lo tatou naunau ma le manao e faasoa atu le talalelei i o tatou olaga i aso taitasi? O le faasoa atu o lo tatou malamalama—e faasusulu atu ai le malamalama o le Faaola—e le tatau ona faatapulaaina i tofiga aloaia faafaifeautalai. Afai e tatala atu ou lagona ma faalogo lelei, e mafai ona e faasoa atu le Malamalama o Keriso ia i latou o siomia ai oe, i le faasoa atu lea po o ai oe i le avea ai ma se tagata o le Ekalesia ma mea e te talitonu i ai. A o e fesiitai mai lea nofoaga i lea nofoaga i lou olaga atoa ma fesootai ma le tele o tagata eseese, ou te faamalosiauina oe e faamasani i ou tuaoi, au paaga i le vasega, ma e tou te galulue faatasi o isi faatuatuaga. Mulimuli i le faatonuga a Elder M. Russell Ballard e faasoa atu ai le talalelei i le initoneti, e aofia ai uepi saite o agafesootai ma faasalalauga, poloka, ma saite e fefaasoaa’i ai vitio.2
E ui e mafai ona tatou aoao isi e uiga i le talalelei e ala i se talanoaga aloaia, ae o nisi taimi e na o le pau lava le mea e manaomia e liliu ai se tasi i le talalelei o se faataitaiga amiotonu ma se naunautaiga e faasoa atu lau molimau e ala i le auala o loo e ola ai i lou olaga. A e ola agavaa mo le Agaga ma faasusulu atu lou malamalama, ona iloa lea e tagata “la outou amio lelei, latou te vivii atu ai i lo outou Tama o i le lagi” (Mataio 5:16).
O Le Faaola: Taulai Atu i Isi
Ma le mea mulimuli, o le Faaola, o lo tatou faataitaiga i mea uma, na aoaoina au e aua le popole tele ia te au lava ia ae taulai atu i le faaolataga o isi. O Lona olaga atoa lava sa faaaoga mo isi. O nisi taimi a mafaufau i le faasoa atu o le talalelei ia i latou o isi faatuatuaga, tatou te fefefe pe o le a lo latou manatu ia i tatou ae pe o le a faapefea foi ona latou tali mai. I le mafaufau atu i le auaunaga a faifeautalai faamisiona, e tele lava ina tatou popole tele e uiga i tupe maua po o aoga po o mafutaga—o mea lelei ma taua nei ae o mea ia e mafai lava ona faatali. O le Faaola lava Ia na “leai se mea e moe ai” (Mataio 8:20). Na Ia aoao Ona soo e “saili … muamua le malo o le Atua,” ma “o na mea uma” o le a faaopoopoina ia i latou (Mataio 6:33).
E moni foi lena mea mo i tatou. A o tatou saili e mulimuli ma faasusulu atu le Malamalama o le Lalolagi, o le a oo mai faamanuiaga i le lalolagi ma iu mai ia i tatou o tagata taitoatasi. Talosia ia tatou saili e aua le nanaina lena malamalama ae faasusulu atu i luma i o tatou olaga atoa.
Ata na tusia e Matthew Reier; Keriso ma le Fafine Samaria, saunia e Carl Heinrich Bloch, faaaogaina i le faatagaga a le National Historic Museum i Frederiksborg i Hillerød, Tenimaka, e le mafai ona kopiina; Alema le Itiiti o loo Aoao Lona Atalii, saunia e Darrell Thomas © IRI; Iosefa Samita i le Falepuipui i Liperate, saunia e Greg K. Olsen, e le mafai ona kopiina
Agavale: Ata na tusia e Christina Smith ma Matthew Reier © IRI; taumatau: ata na tusia e Chris Wills © IRI; ata o Peresitene Monson na pueina e Craig Dimond © IRI